یوسف رضا گیلانی ءَ ایشیا کپ 19 ءَ ہندوستان ءِ ھلاپ ءَ زبردستیں سوبمندی ءِ پد ءَ راجی انڈر 19 ٹیم ءَ را مبارک بات

اسلام آباد۔21دسمبر  (اے پی پی):پاکستان ءِ ادارُکی صدر سید یوسف رضا گیلانی ءَ ایشیا کپ 2025ءِ فائنل ءَ وتی حریف بھارت ءِ ھلاپ ءَ راجی انڈر 19 کرکٹ ٹیم ءَ را وشیں سوبمندی ءِ سر ءَ مبارکی دات۔ پاکستان ءِ ادارُکی صدر ءَ گوشت کہ سرجمیں ٹورنامنٹ ءِ تہ ءَ انڈر 19 ءِ راجی ٹیم ءَ جوانیں، مھکم ءُ پیشہ وارانہ کارکردگی ءِ درشان کتگ ءُ جوانیں ٹیم ورک ءُ دلیری ءِ گوما فائنل ءِ سوبمندی ءَ چہ راج ءِ دل وتی نیمگ ءَ کتگ۔ آئی ءَ گوشت کہ ایشیا کپ ءِ اے سوبمندی نہ ایوک ءَ پاکستان کرکٹ ءِ وشیں آیوکیں باندات ءِ درشان انت بلکینگ ءَ ورنائیں لیب کنوک آنی تہ ءَ دلجمی ھم گیش بوتگ۔ سید یوسف رضا گیلانی ءَ پاکستان کرکٹ بورڈ ءِ چیئرمین سید محسن رضا نقوی، ٹیم مینجمنٹ ءُ کوچنگ اسٹاف ءَ را ھم مبارک بات دات ءُ گوشت کہ اے سوبمندی ءِ تہ ءَ لیب کنوک آنی جوانیں تربیت ءُ رہشونی ءَ مزنیں کردے پیلو کتگ۔ آئی ءَ اے گپ ءِ سر ءَ زور پر دات کہ ورنا لیب کنوک آنی دلبڈی ءُ سرپرستی برجاہ بہ بیت تانکہ آ جھان ءِ تک ءَ ملک ءَ را شان ءُ شُہرت آرگ بہ بیت۔ پاکستان ءِ ادارُکی صدر ءَ گوشت کہ پاکستان ءِ ورنا لیب کنوک آنی تہ ءَ بے دروریں ٹیلنٹ است انت ءُ اے ورنا ملک ءِ وشیں باندات انت۔ آئی ءَ راجی انڈر 19 ٹیم ءِ واستہ نیکیں واھگ آنی درشان کت ءُ امیت کت کہ اے ٹیم آیوکیں وھد ءَ ھم ھمے جذبہ ءُ پیشہ وارانہ لیکہ ءِ گوما سوبمندی ءِ ھاترا دیم ءَ روان کنت۔ گڈ سر ءَ سید یوسف رضا گیلانی ءَ گوشت کہ راجی انڈر 19 ٹیمب ءِ اے شانداریں سوبمندی ءِ سر ءَ سرجمیں راج ءَ را پھر اِنت ءُ اے سوبمندی ملک ءِ واستہ وشی ءُ وشھالی ءِ آدینک اِنت۔