پی سی بی ءِ چیئرمین محسن نقوی ءَ ایشیا کپ ءِ سوبمندی ءِ سر ءَ پاکستان ءِ انڈر 19 ٹیم ءَ را مبارک بات داتگ، ورنائیں لیبی آنی   توسیپ

دبئی۔21دسمبر  (اے پی پی):پی سی بی ءِ چیئرمین محسن نقوی ءَ پاکستان ءِ انڈر 19 ٹیم ءَ را انڈر 19 ایشیا کپ ءِ فائنل ءَ وتی مستریں حریف بھارت ءَ را بے شرپیں رنگ ءَ شکست دیگ ءَ چہ وشیں سوبمندی ءِ سر ءَ مبارک بات داتگ۔ چیئرمین پی سی بی ءَ اے راجدپتری سوبمندی ءَ را ورنائیں لیبی آنی محنت، جوانیں حکمت عملی ءُ مثالی ٹیم ورک ءِ آسر لیک اتگ۔ محسن نقوی ءَ گوشت کہ پاکستان انڈر 19 ٹیم ءِ لیبی آناں فائنل ءَ بیٹنگ، باؤلنگ ءُ فیلڈنگ ءِ سئیں پڑ آنی تہ ءَ جوانیں کارکردگی پیش داشتگ ءُ وتی مزنیں حریف بھارت ءَ را بے شرپیں رنگ ءَ شکست دیگ ءَ راج ءَ را فخر کتگ۔ آئی ءَ ھاسیں رنگ ءَ سمیر منہاس ءِ بیٹنگ ءِ کارکردگی ءِ توسیپ کت ءُ گوشت کہ بھارت ءِ ھلاپ ءَ سوبمندی ءِ تہ ءَ سمیر منھاس ءِ اننگز ستا کرز انت۔ پی سی بی ءِ چیئرمین ءَ گوشت کہ اے سوبمندی پی سی بی ءِ رائزنگ اسٹار آنی تہ ءَ سرمایہ کاری ءِ یک ھاسیں ثبوت اِنت، آیوکیں وھد ءَ پاکستان ءِ کرکٹ ءِ واستہ نیکیں ثابت بیت۔ آئی ءَ اے سوبمندی ءَ را کرکٹ ءِ شائقین آنی واستہ وشی ءُ فخر ءِ ساھت لیک اتگ۔ پی سی بی ءِ چیئرمین ءَ پاکستان انڈر 19 ٹیم ءِ لیب کنوکاں گوں ھم گند ءُ نند کتگ ءُ ایشیا کپ ءِ سوبمندی ءِ واستہ دلبڈی داتگ۔ آئی ءَ ٹیم ءِ کوچ سرفراز احمد ءُ مینجمنٹ اسٹاف ءِ ھزمت آناں ھم ساڑات ءُ گوشت کہ کوچنگ اسٹاف ءِ رہشونی ءَ ٹیم ءِ سوبمندی ءِ تہ ءَ مزنیں کردے پیلو کتگ۔ محسن نقوی ءَ میچ ءِ ساھت ءَ پاکستان ٹیم ءِ دلبڈی ءِ واستہ گراؤنڈ ءَ ھواریں شائقین آں گوں ھم گند ءُ نند کتگ۔ شائقین آں انڈر 19 ایشیا کپ ءِ سوبمندی ءِ سر ءَ پی سی بی ءِ چیئرمین ءَ را مبارکی دات ءُ گوشت کہ پاکستان ءِ ٹیم ءَ مزنیں کارے کتگ ءُ مرچی مئے دل گپتگ اَنت۔ پاکستان انڈر 19 ٹیم ءِ اے وشیں سوبمندی ءَ سرجمیں ملک ءَ وشی ءِ لہر شنگ کتگ ءُ ورنائیں لیب کنوک آنی وشیں باندات ءِ ھوالگ ءَ کرکٹ ءِ پڑ آنی تہ ءَ امیت گیش مھکم بوتگ اَنت۔