ہندوستان ءِ ریاست بہار ءَ یک مسلمانیں جنینے ءِ حجاب ءِ کشگ ءِ واقعہ ہندوستان ءَ گیش بوہوکیں اسلاموفوبیا ءُ عدم برداشت ءِ درشان اِنت، عطا اللہ تارڑ

اسلام آباد۔20دسمبر  (اے پی پی):وفاقی وزیر اطلاعات ءُ نشریات عطا اللہ تارڑ ءَ ہندوستان ءِ ریاست بہار ءَ یک مسلمانیں جنینے ءِ حجاب ءِ کشگ ءِ واقعہ ءِ سر ءَ ہندوستان ءِ سر ءَ سک باز ایراد گپتگ ءُ گشتگ کہ اے وئیل ہندوستان ءَ گیش بوھوکیں اسلاموفوبیا ءُ عدم برداشت ءِ درشان اِنت۔ شمبے ءِ روچ ءَ ”وی نیوز انگلش“ ءَ داتگیں انٹرویو ءِ تہ ءَ وفاقی وزیر ءِ اطلاعات ءَ گوشت کہ اے سکیں غمناکیں واقعہ پدر بوتگ کہ ایشی ءِ تہ ءَ یک مسلمانیں میڈیکل گریجویٹ نودربرے ءَ را زوراکی ءَ وتی حجاب ءِ کشگ ءِ سرا مجبور کنگ بوتگ۔ آئی ءَ گوشت کہ بھارت اخلاقی دیوالیہ کاری، شدیدیں چاگردی تپاکی ءُ زوراکیں انتہا پسندی ءِ آماچ بوتگ وھدیکہ بہار ءِ سر وزیر نتیش کمار ءِ وڑیں مزنیں سیاسی رہشون ءِ اے وڑیں رویہ سک باز مذمت ءِ لائک اِنت۔ وفاقی وزیر ءَ گوشت کہ اے وئیل بھارت ءَ اسلاموفوبیا ءِ تہ ءَ گیشی ءِ یک ھاسیں مثال اِنت کہ ایشی ءَ را منفی پروپیگنڈا ءُ مسخ بوتگیں بیانیہ آنی وسیلگ ءَ گیش کنگ بوھگ ءَ اِنت۔ آئی ءَ گوشت کہ درئی کارانی کارگس ءَ اے واکیہ ءِ باقاعدہ مذمت کتگ ایشی ءِ پد ءَ اسلام آباد ءَ سفارتی تک ءَ پسو داتگ۔ آئی ءَ گوشت کہ اے وڑیں کارروائی ءِ ھچ وڑیں جواز بوت نہ کنت، اے وڑیں وئیل آناں ایوک ءَ گندگ مہ بیت پرچا کہ آ گیشتر منظم پروپیگنڈا ءُ مسخ بوتگیں بیانیہ ءَ گوں بندوک انت کہ ڈیجیٹل پلیٹ فارم آنی وسیلگ ءَ مبالغہ آرائی کنگ بنت۔ وزیر ءِ اھوالکاری ءَ گوشت کہ پاکستان ءَ را بھارت ءِ نیمگ ءَ چہ مُدامی اھوالکاری جنگ ءِ دیمپانی کنگ ءَ انت ھاسیں رنگ ءَ ایٹمی سلاھبندیں دوئیں ھمساھگیں ملک آنی نیام ءَ کش ءُ چیل ءِ وھد ءَ۔ آئی ءَ گوشت کہ نا ایوک ءَ ملکی بلکینگ ءَ میاں اوستمانی رائے ءِ سر ءَ ردیں ھال ءُ اھوال ءُ مبالغہ آمیزیں دعویٰ کارمرد کنگ بوھگ ءَ انت۔ اے سال ءِ بندات ءَ پاکستان ءِ راستی ءِ جنگ ءِ حوالہ ءَ وفاقی وزیر ءِ اھوالکاری ءَ گوشت کہ اے کش ءُ چیل ءِ وھد ءَ اھوالکاری ءِ پڑ سفارتی ءُ فوجی زور ءِ گوما یک مزنیں محاذ ءِ رنگ ءَ ابھر بوتگ۔ آئی ءَ گوشت کہ تناؤ ءِ وھد ءَ بھارتی میڈیا ءُ آن لائن وسیلگ آنی نیمگ ءَ مزنیں کچے ءَ دروگیں ءُ گمراہ کنوکیں دعویٰ شنگ کنگ بوھگ ءَ انت۔ عطا اللہ تارڑ ءَ گوشت کہ بھارت ءِ یک ھمگرنچیں انفارمیشن ءِ حکمت عملی ءِ نہ بوھگ ءِ سبب ءَ دروگیں رپورٹ آنی شنگ ءُ تالان بوھگ برجاہ اِنت کہ ایشی ءَ چہ گڈسرا نئی دہلی ءِ میاں اوستمانی ساکھ ءَ را تاوان رستگ۔ پاکستان ءِ نقطہ نظر ءَ را اجالا کنان ءَ وفاقی وزیر ءِ اھوالکاری ءَ گوشت کہ ادا وھد ءِ سر ءَ ءُ تصدیق بوتگیں اھوالکاری ءِ شنگ کنگ ءَ را اولیت دیگ بوتگ۔ آئی ءَ گوشت کہ تناؤ ءِ وھد ءَ پاکستان ءَ یک ھمگرنچیں کمیونیکیشن ءِ حکمت عملی ءِ سرا عمل کتگ ایشی ءِ تہ ءَ مزن وزیر کارگس، وزارت ءِ درئی کار، وزارت ءِ اھوالکاری ءُ پاک اُرد ءِ میڈیا ونگ آئی ایس پی آر ءِ نیام ءَ سرجمیں ھمگرنچی جوڑ کنگ بوتگ۔ آئی ءَ گوشت کہ مزن وزیر ءَ پہلگام ءِ واکیہ ءِ ھوالگ ءَ منصفانہ ءُ غیر جانبداریں پٹ ءُ پول ءِ پیشکش کتگ ءُ باقاعدہ میڈیا بریفنگ ءِ گوما سفارتی رابطہ برجاہ انت۔ ادارگ آنی نیام ءَ وھد ءِ سر ءَ زانتکاری شیئر کنگ بوت ءُ پاکستانی نشریات ءُ میاں اوستمانی رسانکدر ءِ ادارگ آناں ترندیں رنگ ءَ دست کپت۔ وفاقی وزیر ءَ پاکستانی میڈیا ءِ نیمگ ءَ چہ ذمہ واریں رنگ ءَ ھال ءُ اھوال ءِ شنگ ءُ تالان کنگ ءَ را ساڑات ءُ گوشت کہ میاں اوستمانی میڈیا ءَ ھم اسلام آباد ءِ نیمگ ءَ پیش کتگیں رپورٹ آنی سر ءَ انحصار کتگ پرچا کہ اے رپورٹ پدر بوتگیں راستی آنی سر ءَ بنیات بوتگ اَنت۔ آئی ءَ گوشت کہ ملکی تک ءَ پاکستانی حکومت ءَ کش ءُ چیل ءِ وھد ءَ سیاسی یکوئی ءِ سر ءَ زور داتگ وھدیکہ بھارت ءَ سیاسی بہر ءُ بانگ ءَ چہ آئی ءِ پیغام آنی یکوئی ءَ را متاثر کتگ۔ آئی ءَ گوشت کہ پاکستان ءَ ردیں ھال آنی گر ءُ دار ءِ واستہ ڈیجیٹل ٹولز آنی سر ءَ سک باز انحصار کتگ، وھدیکہ بھارتی واکداراں پاکستانی یوٹیوب چینل ءُ کمنٹیٹر آنی سر ءَ بندش جتگ، وھدیکہ پاکستان ءَ ڈیجیٹل اشتہار آنی وسیلگ ءَ بھارت ءَ ھندی ناظرین ءَ را براہ راست پاکستانی مواد سر کتگ۔ آئی ءَ گوشت کہ پاکستانی سلاہ بندیں اُرد ءِ پیشدارگ ءِ مواد لاکھوں ناظرین آنی گور ءَ سر بوتگ ءُ بھارت ءَ بنجاہی پلیٹ فارم آنی سر ءَ پاکستانی بیانیہ ءِ ارزشت ءُ بحث پیداک کتگ۔ آئی ءَ گوشت کہ اے گامگیج ءَ چہ یکے دومی ءَ گوں بندوکیں میڈیا ءِ چاگرد ءَ ڈیجیٹل سنسر شپ ءِ سیمسر آنی درشان کنگ بوتگ۔ آئی ءَ گوشت کہ حکومت ءَ ردیں رپورٹنگ ءِ ھلاپ ءَ جنگ ءِ واستہ وتی فیکٹ چیکنگ میکانزم ءَ را چالو کتگ۔ عطا اللہ تارڑ ءَ گوشت کہ وزارت ءِ اھوالکاری ءَ سرکاری ”جعلی نیوز بسٹر“ سوشل میڈیا اکاؤنٹس ءُ یک ھاسیں تصدیق سیل ءِ جوڑ کتگ کہ آ ڈیجیٹل پلیٹ فارمز ءِ سر ءَ نگرانی کنت، دروگیں مواد ءِ پجارینگ ءُ اصلاحات ءِ جاری کنت۔ آئی ءَ گیش کرتگ کہ واکدار میاں اوستمانی ھال رسانکی ادارگ آنی اھوالکار آنی گوما باقاعدہ رابطہ ءَ اَنت تانکہ وھد ءِ سر ءَ ھاسیں ھال ءُ اھوال ءُ راستیں رپورٹنگ ءِ ھاترا دل یکیمی کنگ بہ بیت۔ حکومت ءِ انفارمیشن پالیشی ءُ ڈیجیٹل محکمہ ءِ حوالہ ءَ وفاقی وزیر انفارمیشن ءَ گوشت کہ اے گامگیج پاکستان ءِ انفارمیشن ءُ کمیونیکیشن پالیشی ءِ گیشیں نوکیں رنگ ءُ دروشم ءِ بھر انت۔ آئی ءَ گوشت کہ حکومت ءَ انتظامی کانود آنی تہ ءَ ترمیم کنگ ءَ پد پاکستان ءِ اولی سرکاری ڈیجیٹل کمیونیکیشن محکمہ جوڑ کتگ۔ محکمہ ڈیجیٹل نگرانی ءِ نظام، مواد ءِ پیداوار ءِ آسراتی، پوڈ کاسٹ اسٹوڈیو ءُ ڈیجیٹل میڈیا ءِ ماہرین ءُ اثر رسوخ ءِ ان ہاؤس ٹیم ءِ گوما یک مرکزی مرکز ءِ رنگ ءَ کار کنگ ءَ اِنت۔ محکمہ ءِ کرد روٹین سرکاری کار ءُ تناؤ ءِ جاور ھال آنی وھد ءَ بیانیہ ءِ نگرانی، پیغام آناں ھمگرنچ کنگ ءُ ترندیں وڑے ءَ تصدیق شدہ زانتکاری آنی سر کنگ اِنت۔ آئی ءَ محکمہ ءَ را ’’اعصابی مرکز‘‘ لیک ات کہ بھارت ءِ گوما کش ءُ چیل ءِ وھد ءَ ھاسیں رنگ ءَ کارآمد ثابت بوتگ پرچا کہ ایشی ءَ چہ جتا جتائیں ریاستی ادارگ یکیں مواصلاتی فریم ورک ءِ چیر دستی ءَ کار کنگ ءِ اہل بوتگ انت۔ وفاقی وزیر ءِ اھوالکاری ءَ گوشت کہ استیں حکومت ءِ حکمت عملی گوست ءِ حکومت ءَ چہ جتا اِنت ایشی ءَ ایوک ءَ روایتی پریس ءِ سر ءَ دلگوشی داتگ۔بریفنگ ءُ یک ردیں رابطہ ءِ حکمت عملی ءِ سرا انحصار کن اِت۔ آئی ءَ گوشت کہ پیسریگیں حکومت آنی تہ ءَ یکجاھیں ڈیجیٹل ھست نہ بوتگ ءُ بحران آنی وھد ءَ ایڈہاک بنیات ءِ سر ءَ پسو داتگ۔ انوگیں حکمت عملی ءَ گورننس ءِ بنیاتی عناصر ءِ رنگ ءَ فعال ڈیجیٹل مشغولیت، ادارگ آنی نیام ءَ ہم آہنگی ءُ ترندیں حقیقت ءِ پٹ ءُ پول ءَ را اولیت داتگ۔ وفاقی وزیر ءَ گوشت کہ انفارمیشن پالیشی حکومت ءِ گیشیں مول ءُ مراد آنی گوما ھمگرنچ اِنت ایشی ءِ تہ ءَ سفارتکاری، اقتصادی ریکوری ءُ میاں اوستمانی ساکھ ءِ بندوبست ھوار اِنت۔ آئی ءَ ردیں ھال آنی ھلاپ ءَ جھان ءِ تک ءَ یکجاھیں پسو ءِ لوٹ کت ءُ گوشت کہ ردیں ھال، اسلاموفوبیا ءُ ڈیجیٹل پروپیگنڈا جھان ءِ چیلنج اَنت۔ آئی ءَ گیش گوشت کہ پاکستان اقوام متحدہ ءُ اسلامی کمک ءِ گل ءِ وڑیں کثیر جہتی فورم آنی تہ ءَ اے جیڈھ آناں چست کنگ ءَ برجاہ دار ایت۔ آئی ءَ یکجائی معیار ءِ جوڑ کنگ، مھکمیں میاں اوستمانی کمک ءِ جوڑ کنگ ءُ سوشل میڈیا کمپنی آنی گیش احتساب ءَ را دل یکیمی کنگ ءِ ضلورت ءِ سر ءَ زور پر دات۔ آئی ءَ گوشت کہ پاکستان راجی نپ آنی رکھینگ ءُ میاں اوستمانی تک ءَ وتی پوزیشن ءَ را مھکم کنگ ءِ واستہ جوانیں رابطہ ءُ معتبریں ھال آنی انتظامی ءَ را سک باز المی لیک ایت۔