پاکستان دود ءُ ربیدگی سفارتکاری ءَ را سک باز ارزشت دنت، ڈیجیٹل میڈیا راجی رابطہ، دود ءُ ربیدگ ءِ ہم آہنگی ءُ جوانیں بیانیہ ءِ دیمروئی ءِ تہا کلیدی کرد پیلو کنگ ءَ انت، وفاقی وزیر ءِ اطلاعات عطا اللہ تارڑ ءَ تاجکستان ءِ دود ءُ ربیدگ ءِ وزیر ءَ گوں گند ءُ نند ءِ ساھت ءَ گپ ءُ تران

اسلام آباد۔20دسمبر  (اے پی پی):وفاقی وزیر ءِ اھوالکاری ءُ نشریات عطا اللہ تارڑ ءَ ڈیجیٹل میڈیا ءِ پڑ ءَ تاجکستان ءِ گوما کمک ءَ را گیش کنگ ءِ عزم ءِ یک رندے پدا گوشت کہ ڈیجیٹل میڈیا استیں دور ءَ السی رابطہ، دود ءُ ربیدگی یکوئی ءُ جوانیں بیانیہ ءِ دیمروئی ءِ واستہ کلیدی کرد پیلو کنگ ءَ انت، پاکستان دود ءُ ربیدگی سفارتکاری ءَ را مزنیں ارزشتے دنت۔ آئی ءَ اے ھیالانی درشانی تاجکستان ءِ دود ءُ ربیدگ ءِ وزیر ستاریون متلوبوخون امونزودا ءَ گوں گند ءُ نند ءِ ساھت ءَ کت کہ آ اے وھد ءَ تاجکستان ءِ دود ءُ ربیدگ ءِ ھپتگ ءِ برجم دارگ ءِ ھاترا پاکستان ءِ ھاسیں تر ءُ تاب ءَ اِنت۔ گند ءُ نند ءِ تہ ءَ وت مہ وتی کمک، ڈیجیٹل میڈیا ءِ تہ ءَ کمک، میڈیا ءِ سیادی ءِ دیمروئی، وت مہ وتی سیادی ءُ دو نیمگی لبزانکی ءُ دود ءُ ربیدگی ورثہ ءِ رکھینگ ءُ سہرا کنگ ءِ سر ءَ ھیال ریچی کنگ بوت۔ دوئیں بامرد آں پاکستان ءُ تاجکستان ءِ نیام ءَ دود ءُ ربیدگی، میڈیا کمک ءُ السی سیادی ءَ را گیش دیمروئی دیگ ءِ سر ءَ زور پر دات۔ وزیر ءِ اھوالکاری ءَ تاجک دود ءُ ربیدگ ءِ وزیر ءَ را پاک تاجک دود ءُ ربیدگ ءِ ھپتگ ءِ برجم دارگ ءِ پد ءَ مبارک بات دات ءُ گوشت کہ تاجک صدر ایموملی رحمون ءُ پاکستان ءِ مزن وزیر محمد شہباز شریف ءِ نیام ءَ گند ءُ نند ءَ اے گپ ءِ سر ءَ تپاک کنگ بوتگ کہ پاکستان ءَ تاجک دود ءُ ربیدگ ءِ ھپتگ برجم دارگ بیت۔ آئی ءَ گوشت کہ پاک تاجک دود ءُ ربیدگی میلہ ءِ وڑیں پروگرام دوئیں ملک آنی الس آنی نیام ءَ رابطہ ءُ دود ءُ ربیدگی کمک ءَ را گیش گیش کنگ ءِ واستہ یک مھکمیں بنیات ءِ پجارینگ ءَ انت۔ آئی ءَ گوشت کہ دوئیں ملک آنی نیام ءَ کوھنیں، گہتریں راجدپتری ءُ دود ءُ ربیدگی سیادی است انت کہ ایشی ءِ تہ ءَ سداں سال ھوار انت، پاکستان دود ءُ ربیدگ ءِ سفارتکاری ءَ را سک باز ارزشت دنت۔ گند ءُ نند ءَ تاجکستان ءِ صدر ءِ پاکستان ءِ متوقع تر ءُ تاب ءِ موہ ءَ دود ءُ ربیدگی کمک ءَ را دیمروئی دیگ ءِ واستہ باقاعدہ معاہدہ کنگ ءِ سر ءَ ھم تپاک کنگ بوت۔ وفاقی وزیر ءِ اھوالکاری ءَ گوشت کہ علامہ محمد اقبال ءِ شاعری پاکستان ءُ تاجکستان ءِ الس آنی نیام ءَ فکری یکوئی ءُ وت مہ وتی نزیکی ءِ علامت اِنت۔ شاعر فارسی ءِ مزنیں شاعراں دوئیں ملکاں گوں احترام ءَ چارگ بیت۔ دوئیں براتیں ملک اے مشترکہ لبزانکی ءُ دودمانی میراث ءِ رکھینگ ءُ دیمروئی ءَ را ارزشت دئینت۔ تاجکستان ءِ وزیر دود ءُ ربیدگ ءَ تاجکستان ءِ وزیر ءِ اھوالکاری ءَ تاجک فیسٹیول ویک ءِ برجائی ءِ تہ ءَ کمک ءِ سر ءَ منت گپت ءُ گوشت کہ تاجکستان دود ءُ ربیدگی تبادلہ ءُ ڈیجیٹل میڈیا ءِ شوبگ ءَ پاکستان ءِ گوما نزیکی ءَ گوں کمک ءَ برجاہ دار ایت۔ آئی ءَ گوشت کہ دوئیں ملک آنی نیام ءَ سیادی ءَ را گیش مھکم کنگ ءِ واستہ یکجائی ادبی ءُ دود ءُ ربیدگی ورثہ ءِ سر ءَ زور دیگ بیت۔ گند ءُ نند ءَ تاجکستان ءِ سفیر شریف زادہ یوسف ٹوئیر، مزن وزیر ءِ موسمی بدلی ءِ کوآرڈینیٹر رومینہ خورشید عالم، سیکرٹری انفارمیشن ءُ براڈکاسٹنگ اشفاق احمد خلیل، ڈائریکٹر جنرل ای پی ونگ، ڈائریکٹر جنرل ڈائریکٹوریٹ آف الیکٹرانک میڈیا ءُ پبلکیشنز ءُ ڈائریکٹر جنرل ڈائریکٹوریٹ ءَ ھم بھر زوری کتگ۔