علامہ اقبال ءِ پیغام پہ سرجمیں انسانیت ءَ اِنت، ما آئی ءِ ھیال ءُ لیکہاں چہ سرجمیں رنگ ءَ کارمرز بہ کنیں، اورنگزیب خان کھچی

اسلام آباد۔17دسمبر  (اے پی پی):راجی ورثہ ءُ دود ءُ ربیدگ ءِ وفاقی وزیر اورنگزیب خان کھچیءَ گشتگ کہ علامہ محمد اقبال ءِ فکر ءُ فلسفہ مرچیگیں دور ءَ ہم سک باز المی انت ءُ رہشونی ءِ لائق انت۔ اے ھیالانی درشانی آئی ءَ اقبال ءِ روچ ءِ درگت ءَ راجی زبان ءِ دیمروئی ءِ محکمہ ءِ نیمگ ءَ برجم داشتگیں راجی کانفرنس ’’اقبال ءِ ھیال نوکیں دور ءَ ضلورت ءُ ارزشت‘‘ ءِ تہ ءَ صدارتی گشتانک ءِ ساھت ءَ کت۔ وفاقی وزیر ءَ اے گپ ءِ سر ءَ جیڈھ ءِ درشانی کت کہ مرچیگیں ورنائیں نسل علامہ اقبال ءِ فلسفہ، وژن ءُ مسلم امت ءِ وشھالی ءِ واستہ آئی ءِ کوشست ءَ چہ گیشتر بے ھال اِنت۔ اقبال ءِ کلوہ ایوک ءَ مئے واستہ نہ انت بلکینگ ءَ سرجمیں انسانیت ءِ واستہ انت ءُ مارا آئی ءِ فکر ءُ سکین آں چہ سرجمی ءَ کارمرز کنگی انت۔ اورنگزیب خان خیچی ءَ مرحومیں سینیٹر عرفان صدیقی ءَ را شگر ءُ منت گپت ءُ گوشت کہ آئی ءَ راجی زبان ءِ دیمروئی ءِ محکمہ ءِ وڑیں ادارگ آنی مھکم ءُ دیمروئی ءِ واستہ ارزشتی ایں ازمت کتگ ءُ آئی ءِ کوشست آنی سبب ءَ اے ادارگ مرچی ھم وتی موثریں کرد ءَ پیلو کنگ ءَ اَنت۔ آئی ءَ چہ ڈائریکٹر جنرل این ایل پی ڈی ءَ لوٹ کت کہ آ لبزانکی ادارگ ءُ یونیورسٹیانی وائس چانسلراں گوں مشاورتی دیوان ءِ برجم دارگ ءَ بہ کنت دانکہ اقبال ءِ ھیال ءِ رژنائی ءَ زبان، دود ءُ ربیدگ ءُ میراث ءِ رکھینگ ءِ ھاترا رہشونی ءُ سوج زورگ بہ بنت۔ وفاقی وزیر ءَ اے درگت ءَ وتی وزارت ءِ سرجمیں کمک ءِ دل یکیمی ھم داتگ۔ وفاقی وزیر ءَ گوشت کہ پنجاب حکومت ءَ را نمدی دیم دیگ بوتگ کہ ایشی ءِ تہ ءَ اسکول ءِ زھگ آناں لوٹ کنگ بوتگ کہ آ راجدپتری ھند، لبزانکی مرکز، زوءُ دود ءُ ربیدگی ھند آنی تہ ءَ اسٹڈی ٹور ءِ بندوبست بہ کن اَنت تانکہ ورنا آنی تہ ءَ سرپدی ودی بہ بیت۔ آئی ءَ گوشت کہ راجی زبان، دود ءُ ربیدگ ءُ مراگش ءِ پھازگ مئے راجی زمہ واری انت۔ آئی ءَ ڈائریکٹر جنرل این ایل پی ڈی ءِ منت گپت کہ آئی ءَ کانفرنس ءَ بہر زورگ ءِ دعوت داتگ ءُ آئی ءَ را سروکی ءِ موہ داتگ۔ اے موہ ءِ سر ءَ شعبہ ءِ راجی زبان ءِ دیمروئی ءِ شعبہ ءِ ڈائریکٹر جنرل پروفیسر ڈاکٹر سلیم مظہر ءَ وش آتکی گشتانک دات۔ آئی ءَ شرپداریں مہمان ءُ شریکیں مردمانی منت گپت ءُ گوشت کہ اے راجی دیوان ءِ برجائی ءِ مول ءُ مراد برصغیر ءِ مسلمان آناں بیدار کنگ ءُ جتاھیں وطن ءِ جہد ءِ واستہ تیار کنگ ءِ تہ ءَ علامہ اقبال ءِ کلیدی کرد ءَ را پدر کنگ اِنت۔ آئی ءَ گوشت کہ اقبال ءِ ھیال سرجمیں مسلمانیں چاگرد ءِ واستہ رژن ءِ چراگ انت کہ آ جذبہ، بے وس، آجوئی ءُ اُمیت ءِ پیغام ءَ دنت ءُ مرچی ھم مارا رھشونی کنت۔ ڈاکٹر سلیم مظہر ءَ 10 دسمبر ءَ اقبال ڈے ءِ درگت ءَ برجم داشتگیں مقابلہ ءَ اولی، دومی، سیمی ءُ چارمی نمبر گپتگیں نودربراں مبارک بات دات ءُ جج ءُ استاد آنی ھزمت آناں ساڑات۔ آئی ءَ عسکری بینک لمیٹڈ ءُ وزارت راجی میراث ءُ دود ءُ ربیدگ ڈویژن ءِ کمک ءِ سر ءَ ھم شگر ءُ منت گپت۔ مراگش ءَ گوں تران کنان ءَ پاکستان ءَ ایران ءِ سفیر ڈاکٹر رضا امیری مقادم ءَ این ایل پی ڈی ءِ ڈائریکٹر جنرل ءِ منت گپت ءُ گوشت کہ پروفیسر ڈاکٹر سلیم مظہر ایران ءُ پاکستان ءَ ھاسیں رنگ ءَ دود ءُ ربیدگ ءِ پڑ ءَ نامدار ءُ شرپداریں شخصیت انت آئی ءِ شخصیت دود ءُ ربیدگ ءِ دیمروئی ءِ واستہ نعمت انت۔ آئی ئَ پاکستانی الس ئِ دود ءُ ربیدگی ازمت ئِ ھم ساڑاتگ۔ ایران ءِ سفیر ءَ گوشت کہ علامہ اقبال، قائد اعظم محمد علی جناح، شیخ سعدی ءُ اے دگہ مزنیں شخصیت مئے واستہ رول ماڈل ءُ رہشونی ءِ وسیلگ اَنت ءُ ھما چاگرد کہ وتی سروکاں چہ شموشکار بیت آئی ءِ آیوکیں باندات ءِ وشیں باندات بوت نہ کنت۔ علامہ اقبال مدام یک مزنیں شاعر، فلسفی، آجوئی لوٹوک ءُ انقلابی ءِ بستار ءَ یات کنگ بیت۔ مراگش ءِ گڈسرا 10 دسمبر ءَ ”قلم اقبال“ ءِ سرھال ءَ برجم داشتگیں مقابلہ ءَ اولی، دومی، سیمی ءُ چارمی نمبر گپتگیں ھشت نودربر آنی نیام ءَ نقد داد ءُ سرٹیفکیٹ بھر ءُ بانگ کنگ بوت، وھدے کہ مقابلہ ءَ بھر زرتگیں درستیں نودربراں سرٹیفکیٹ ھم دیگ بوت۔