پاکستان نا شونداری ویل آتا بنداوی سوب سیاسی سوگوی، چرجوئی و چناتیا پدریسہ زرکاری نا کمتی ءِ، احسن اقبال

اسلام آباد۔ 17 دسمبر (اے پی پی) بنجائی وزیر ڈٹ بندی، شونداری و خصوصی گام گیج احسن اقبال پارینے کہ پاکستان نا شونداری ویل آتا بنداوی سوب پالیسی یا خیال آتا کمتی اف بلکن سیاسی سوگوی، چرجوئی و چناتیا پدریسہ زرکاری نا کمتی ءِ۔ چارشنبے نادے آ یونیسیف، پائیڈ و حکومت پاکستان نا اسیجائی کمک اٹ Strenthening systems for children in Pakistan Shaping policy through evidence: نا سرحال آ اڈ ہلوک کانفرنس آن تران کرسا اوپارے کہ بیرہ فزیکل انفراسٹرکچر بامعنی شونداری نا ضمانت جوڑ مننگ کپک۔ اوپارے کہ نم اخس کہ سرمایہ فزیکل انفراسٹرکچر آ خلبو، اگہ راجی و زرگزرانی بنداو نزور مرے تو او سرمٹ و سٹیل آن زیات حیثیت تخپک۔ احسن اقبال پارے کہ قومی وژنز، ہرافتے ٹی وژن 2010 ووژن 2025 اوار ءِ، ڈٹ بندی ٹی تسلسل ءِ مرکزی حیثیت ترساکرینن، ولے سیاسی نزوری نا سوب اوفتیا عملدرآمد مننگ کتو۔ اواست ہسونی نا درشانی ءِ کرساپارے کہ ننا سیاسی تاریخ اٹی ہر زرگزرانی ڈٹ ءِ تسلسل اتون مون آ ہِننگ کن اِلنگتو۔ پروگرام وار اوار منقطع مس و ہندا سوب آن درکار نتیجہ دوئی مننگ کتو۔ اوساڑی آ دور ءِ ملک اکن فیصلہ کن رسیہ گوندسا پارے کہ دا نازرک آخا بلکن فیصلہ کن موڑ ءِ۔ ننے طے کروئی مریک کہ نن تدوک آ 78 سال آتا ردینک آتے کرسا کینہ یا پوسکن ءُ کسر اس اختیار کینہ۔ اوپالیسی ساز و رائے عامہ نا راہشون تیا زور شاغا کہ او سرسہب زرگزران تا آزموندہ غاتیان سبخ ہلیر ۔ بنجائی وزیر السی پالیسی ءِ بج اتون تشبیہ ترساپارے کہ گچین تیارکروک آ پالیسیک ہم کمکار چاگڑد آن بیدس نتیجہ تننگ کپسہ۔ اوپارے کہ پالیسیک بج آنبار ءُ۔ بیرہ بج فصل انا ضمانت ءِ تفک ، داڑکن سہی مِش ، نمبی، موسم و سوگوی المی ءِ، پاکستان نا بے سہبی ہندا مسنے کہ او داوڑنا سازگار چاگڑد ودی کننگ کتنے۔