پارلیمانی نگرانی ءُ جوانیں ھمگرنچی ءَ چہ دیمروئی منصوبگ آنی شفاف ءُ جوانیں رنگ ءَ سرجم کنگ بیت کنت ، بلوچستان ءِ سر وزیر

کوئٹہ۔ 05 دسمبر (اے پی پی): پی ایس ڈی پی ءِ ھوالگ ءَ پارلیمانی کمیٹی ءِ دیوان جمعہ ءِ روچ ءَ بلوچستان ءِ سر وزیر میر سرفراز بگٹی ءِ سروکی ءَ برجم دارگ بوت ایشی ءِ تہ ءَ سرکار ءُ اتحادی گل آنی نامینتگیں پارلیمانی باسک آنی تہ ءَ بھر زوری بوت۔ دیوان ءَ سرکاری شوبگ ءِ دیمروئی پروگرام ءِ چیر دستی ءَ برجا بوھوکیں منصوبگ آنی دیمروئی ءِ سر ءَ سرجمی ءَ چار ءُ تپاسی کنگ بوت ءُ آیوکیں مالی سال ءِ دیمروئی پروگرام ءِ ھوالگ ءَ شور ءُ سلاھ کنگ بوت۔ بلوچستان ءِ سر وزیر میر سرفراز بگٹی ءَ دیوان ءَ گوں تران کنان ءَ گوشت کہ صوبگ ءَ دیمروئی منصوبگ آناں وھد ءِ سر ءَ سرجم کنگ ءُ مالیاتی وسیلگ آناں شفافیں رنگ ءَ کارمرد کنگ مئے اولی ترجی انت۔ آئی ءَ گوشت کہ ھمک منصوبگ صوبہ ءِ عوامی نپ ءُ اقتصادی دیمروئی ءِ واستہ عملی گامگیج آنی بھر بہ بیت۔ بنجاھی وزیر ءَ پارلیمانی کمیٹی ءِ باسک آناں زور پر دات کہ آ جاری منصوبگ آنی دیمروئی ءِ سر ءَ مُدام چار ءُ تپاسی بہ کن اَنت ءُ ھرچ وڑیں دیر ءُ رکاوٹ ءِ زوت دور کنگ ءِ واستہ گامگیج چست بہ کن اَنت۔ دیوان ءَ جاری دیمروئی منصوبگ آنی کوالٹی ءُ رفتار ءَ را گہتر کنگ ءِ واستہ گامگیج آنی سر ءَ ھم چار ءُ تپاسی کنگ بوتگ ءُ آیوکیں مالی سال ءِ دیمروئی پروگرام ءِ واستہ پنت ءُ شون ھم ھوار کنگ بوتگ۔ آئی ءَ گوشت کہ صوبائی حکومت ھمک رنگ ءِ کوشست کنگ ءَ انت تانکہ توامیں دیمروئی منصوبگ وھد ءِ سر ءَ سرجم بہ بنت ایشی ءَ چہ الس ءَ را براہ راست سیت بہ رسیت۔ آئی ءَ باسک آناں گوشت کہ پارلیمانی نگرانی ءُ جوانیں ھمگرنچی ءَ گوں دیمروئی منصوبگ آنی شفاف ءُ جوانیں رنگ ءَ سرجمی ءَ را ممکن جوڑ کنگ بوت کنت۔ گند ءُ نند ءَ جتاجتائیں شوبگ آنی تہ ءَ دیمروئی پروگرام آنی مول ءُ مراد آنی سر ءَ ھم گپ ءُ تران کنگ بوت تانکہ دست کپتگیں وسیلگ آناں گیش ءَ چہ گیش موثر کارمرد کنگ ءِ وسیلگ ءَ بلوچستان ءَ دیمروئی، روزگار ءِ موہ ءُ بنیاتی آسراتی آنی پھجاری ءَ را دل یکیمی کنگ بہ بیت۔