سرجمیں راج پاکستانی اُرد حنیف عباسی ءِ کش ءَ اوشتاتگ

راولپنڈی۔7دسمبر  (اے پی پی):ریلوے ءِ وفاقی وزیر محمد حنیف عباسی ءَ گشتگ کہ سرجمیں راج پاکستانی فوج ءِ کش ءَ اوشتاتگ انت ءُ ہچ وڑیں جاوراں ملک ءِ یکوئی ءَ را ہلاس کنگ ءِ موہ نہ دیاں۔ تحریک انصاف ءِ بُن ھشت ایر کنوک زانت ءُ زانت ءَ ملک ءِ راجی ایمنی ءُ برجائی ءَ تاوان دیگ ءَ اِنت ۔ گوستگیں روچ ءَ راولپنڈی ءَ پریس کانفرنس ءَ گوں تران کنان ءَ آئی ءَ گوشت کہ پی ٹی آئی ءِ بانی ءِ بیانیہ راجی مفاد، راجی سلامتی ءُ ریاستی ادارگ آنی ھلاپ اِنت ءُ آئی ءَ وتی بیان ءُ کار آنی وسیلگ ءَ اے گپ ثابت کتگ کہ آ یک خطرناکیں مہم ءِ بھر اِنت۔ آئی ءَ گوشت کہ فیلڈ مارشل سید عاصم منیر ءِ سروکی ءَ پاکستان ءَ ھندوستان ءَ را راجدپتری شکست داتگ، ایشی ءِ سر ءَ سرجمیں راج وتی سلاہ بندیں اُرد ءِ سر ءَ پھر کنت، بلے دومی نیمگ ءَ تحریک انصاف ءِ بُن ھشت ایر کنوک ءَ مُدام ھما بیان داتگ کہ راجی نپ ءِ ھلاپ اَنت۔ ریلوے ءِ وزیر ءَ گوشت کہ مئے اُرد ءَ چہ دہ رند ءَ مزنیں دژمن ءَ را شکست داتگ، ایشی ءَ را سرجمیں دگنیا من ایت، شھید آنی برکت ءَ مرچی سرجمیں دگنیا ءَ پاکستان زند ءِ نعرہ چست کنگ بوھگ ءَ انت۔ تحریک انصاف ءِ بن ھشت ایر کنوک وھدے جیل ءِ سکیاں برداشت نہ کت گڈا سرجمیں دگنیا ءَ وتی صلاحیت ثابت کتگیں فوج ءِ ھلاپ ءَ پاد اتک۔ آئی ءَ گوشت کہ 9 مئی ءَ شھید آنی یاتگار آنی تہ ءَ توڑ ءُ پُر کنگ بوتگ، کور کمانڈر گس ءُ جی ایچ کیو ءِ سر ءَ اُرش کنگ بوتگ ءُ ھمے پندل ءَ کہ دژمن ءَ لوٹ اتگ ات عملی دروشم گپتگ۔ آئی ءَ گوشت کہ پی ٹی آئی ءَ را بھارت ءُ اسرائیل ءِ نیمگ ءَ چہ مالی کمک ءِ رسگ برجاہ اِنت کہ آئی ءَ درملکی فنڈنگ ​​ءِ کیس ءَ ایشی ءِ نیمگ ءَ اشارہ کتگ ات۔ وفاقی وزیر ءَ گشتگ کہ ملک ءِ راجدپتر ءَ سیاست دان جلاوطن کنگ بوتگ انت، دار ءَ چگل دیگ بوتگ انت ءُ زندان ءَ بند کنگ بوتگ انت بلے کس ءَ ریاستی ادارہ نشانگ جوڑ نہ کتگ انت۔ نواز شریف ءِ سرکار سئے رند ءَ ہلاس کنگ بوتگ، مریم نواز جیل ءَ بند کنگ بوتگ بلے آئی ءَ کدی ملک ءِ یکوئی ءَ را ہترہ نہ داتگ۔ حنیف عباسی ءَ گشتگ کہ خیبرپختونخوا ءَ تحریک انصاف ءِ سرکار 13 سال انت بلے مہلوک جان سلامتی، وانگ ءُ زانگ ءُ ساپیں آپ ءِ وڑیں بنیادی آسراتی آں چہ زبہر انت۔ یک جُستے ءِ پسو ءَ آئی ءَ گوشت کہ خیبر پختونخوا ءِ سرکار خوارج آنی وسیلگ جوڑ بوتگ وھدے کہ خیبر پختونخوا ءِ سر وزیر اڈیالہ جیل ءِ دپ ءَ زھرشانی کنگ ءَ گندگ بوھگ ءَ اِنت، کے پی کے ءَ گورنر ءِ ھاکمیت ءِ سر ءَ زورگ بہ بیت یا نہ بیت اے گپ ءِ پیسلہ پد ءَ بیت۔ ریلوے ءِ وزیر ءَ گوشت کہ پی ٹی آئی ءِ بانی ءِ ٹویٹ ءُ بیان مدام ریاستی ادارگ آنی ھلاپ ءَ اَنت، تاں روچ ء مرچی کس ءَ اوگانستان ءُ بھارت ءِ کمک ءَ ملک ءِ ایمنی ءَ را نشانگ جوڑ نہ کتگ۔ آئی ءَ گوشت کہ ملک ءِ یکپارگی ءَ گوں لیب کنت آ ذہنی نادراہ بوت کنت پاکستانی نہ بیت، تو اقتدار ءِ واستہ ھمک سیمسراں چہ ٹپّ اِتگ، ما تئی بیانیہ ءَ سوبمند نہ کن ایں۔ آئی ءَ گوشت کہ آئی ءِ گھار بھارتی میڈیا ءِ سر ءَ یک انچیں بیانیہ دیگ ءَ اَنت کہ اے سرجم ءَ ملک ءِ مفاد ءِ ھلاپ اِنت۔ حنیف عباسی ءَ گوشت کہ 9 مئی ءِ وئیل آنی سرجمیں شواہد ادارگ آنی گور ءَ اَنت ءُ ایشی ءَ ھواریں مردم بے سبب ءَ ای سی ایل ءِ سر ءَ ایر کنگ نہ بوتگ اَنت۔ آئی ءَ گوشت کہ 10 مئی ءَ سرجمیں دگنیا ءَ دیست کہ پاکستان ءِ بامردیں قوت آں ملک ءِ عزت ءُ شرپ برز ءَ داشتگ۔ راج شہیداں سلام اِنت ءُ پاکستان مدام مھکم مان اِنت ۔