کاروباری برادری، ایف پی سی سی آئی ءَ انڈونیشین صدر پرابووو سبیانتو ءِ پاکستان ءِ تر ءُ تاب ءَ را وش آتک

اسلام آباد۔7دسمبر  (اے پی پی):پاکستان ءِ کاروباری براتی ءُ فیڈریشن آف پاکستان چیمبرز آف کامرس اینڈ انڈسٹری ءَ انڈونیشین صدر پرابووو سبیانتو ءِ دو روچی (8-9دسمبر) ءَ پاکستان ءِ تر ءُ تاب ءَ را وش آتک کتگ ءُ اے تر ءُ تاب ءَ را راجدپتری ءُ معاشی رد ءَ المی لیک اتگ۔ یک شمبے ءِ روچ ءَ اے پی پی ءَ گوں تران کنان ءَ فیڈریشن آف پاکستان چیمبرز آف انڈسٹری ءِ صدر عاطف اکرام شیخ ءَ گوشت کہ انڈونیشیا ءِ صدر پرابو سوبیانٹو ءِ دو روچی تر ءُ تاب کہ دو شمبے ءَ چہ بندات بوھگ ءَ اِنت دوئیں ملک آنی نیام ءَ اقتصادی ءُ تجارتی سیادی آنی واستہ سنگ میل ءِ رنگ ءَ ثابت بیت۔ ایف پی سی سی آئی ءِ صدر ءَ گوشت کہ انڈونیشیا پاکستان ءِ یک ھاسیں تجارتی شریک اِنت ایشی ءِ گوما گوستگیں مالی سال 2024-25 ءَ دو نیمگی تجارت 4.7ارب ڈالر ءَ سر بوتگ، ایشی ءِ تہ ءَ گیش گہتری ءِ گنجائش است اِنت۔ آئی ءَ گوشت کہ استیں دو نیمگی تجارت ءِ تہ ءَ اے اصل گنجائش ءَ چہ کم اِنت ءُ ایشی ءَ را گیش کنگ ءِ واستہ دوئیں ملک آناں آزاد تجارتی معاہدے ءِ سر ءَ گپ ءُ تران کنگی اِنت۔ عاطف اکرام شیخ ءَ گوشت کہ پاکستان ءُ انڈونیشیا ءَ را یک ءِ دومی ءِ بازار آناں سرپد بوھگ ءِ ضلورت انت، ایشی ءِ واستہ سرجمیں سال ءَ دوئیں ملک آنی تجارتی ڈل آنی بدلی المی انت ءُ انڈونیشیا ءِ صدر ءِ انوگیں پاکستان ءِ تر ءُ تاب ءِ ساھت ءَ اے درگت ءَ سرجمیں رنگ ءَ گپ ءُ تران کنگ بہ بیت۔ آئی ءَ گوشت کہ انڈونیشیا آسیان ءِ ملک آنی تہ ءَ پاکستان ءِ واستہ پُل ءِ رنگ ءَ ثابت بوت کنت، وھدیکہ پاکستان میاں اوستمانی ملک آنی گوما انڈونیشیا ءِ سیادی ءَ را مھکم کنگ ءِ واستہ ھاسیں کرد پیلو کت کنت۔ صدر پرابو ءِ تر ءُ تاب اے درگت ءَ سک باز ارزشت داریت۔ دومی نیمگ ءَ اسلام آباد چیمبر آف کامرس اینڈ انڈسٹری ءِ صدر سردار طاہر خان ءَ گوشت کہ انڈونیشیا پاکستان ءِ مزنیں تجارتی شریک اِنت، ایشی ءِ گوما پاکستان ءِ تجارتی سیادی سک باز ارزشت دار اَنت۔ آئی سی سی آئی ءِ صدر ءَ گوشت کہ اے وھد ءَ انڈونیشیا ءِ صدر ءِ پاکستان ءِ تر ءُ تاب ءَ چہ دوئیں ملک آنی نیام ءَ اقتصادی ءُ تجارتی سیادی آناں نوکیں رھشونی رس ایت ءُ دگنیا ءِ دو گیشتریں آبادی ءِ ملک آنی نیام ءَ وت مہ وتی اقتصادی یکوئی ءِ ضلورت اِنت۔ لاہور چیمبر آف کامرس اینڈ انڈسٹری ءِ صدر فہیمور رحمان سیگول ءَ ھم انڈونیشیا ءِ صدر ءِ پاکستان ءِ تر ءُ تاب ءِ توسیپ کت ءُ گوشت کہ دوئیں ملک آنی نیام ءَ دہائی آنی تجارتی ءُ اقتصادی سیادی است انت۔ آئی ءَ گوشت کہ دو نیمگی تجارت 2024ءَ نزیک ءَ 4.7ارب ڈالر ءَ سر بوتگ ءُ 2025ءَ گیش گیش بوھگ ءَ انت۔جنوری ءَ چہ ستمبر 2025ءَ تجارت 2.92ارب ڈالر بوتگ کہ گوستگیں سال ءَ 2.69ارب ڈالر بوتگ۔ کراچی چیمبر آف کامرس اینڈ انڈسٹری ءِ صدر محمد ریحان حنیف ءَ ھم انڈونیشیا ءِ صدر ءَ را آئی ءِ تر ءُ تاب ءِ پد ءَ مبارکی دات ءُ گوشت کہ اے مزن تک ءِ تر ءُ تاب ءَ چہ دوئیں ملک آنی اقتصادی سیادی آناں نوکیں موہ ءُ موہ رس ایت۔ آئی ءَ گوشت کہ تجارت ءِ تہ ءَ گیشی برجاہ بوتگ، 2023 ءَ 3.36ارب ڈالر ءَ چہ 2024 ءَ 4.7ارب ڈالر ءَ سر بوتگ۔2025ءَ ایوک ءَ جنوری جولائی ءِ ساھت ءَ پاکستان ءَ انڈونیشیا ءِ برآمدات 2.16ارب ڈالر بوتگ، ایشی ءَ چہ سرجمیں تجارت ءَ را گیش دیمروئی رستگ۔ تجارت ءِ تہ ءَ گیشی ءِ گمان اِنت۔ پاکستان انڈونیشیا بزنس کونسل ءِ چیئرمین حسیب خان ءَ اے پی پی ءَ گوں تران کنان ءَ گوشت کہ انڈونیشیا ءِ نکل ءِ ذخیرہ ءِ سر ءَ ٹیکسٹائل، حلال پروڈکٹس، زرعی کاروبار، دوائی، آئی ٹی، ڈیجیٹل انوویشن، قابل تجدید توانائی ءُ ای وی بیٹری آنی تہ ءَ دوئیں ملک آنی نیام ءَ مزنیں موہ است انت۔ آئی ءَ گوشت کہ دوئیں ملک آنی ارادہ اِنت کہ آسیان مارکیٹ آنی تہ ءَ رسائی ءَ را گیش کنگ ءُ سروسز، کنسٹرکشن ءُ سی پیک زون آنی تہ ءَ سرمایہ کاری ءَ را گیش کنگ بہ بیت۔ انڈونیشیا ءِ صدر ءِ تر ءُ تاب ءِ تہ ءَ اسٹریٹجک ءُ اقتصادی سیادی آناں مھکم کنگ ءِ سر ءَ دلگوشی دیگ بوتگ ایشی ءِ تہ ءَ تجارت، دفاع، بنیاتی ڈھانچہ، توانائی ءِ سرمایہ کاری ءُ مردم آنی نیام ءَ رابطہ ھوار اَنت۔ آئی ءَ گوشت کہ دوئیں ملک یک مزنیں ایجنڈے ءِ سر ءَ گپ ءُ تران کن اَنت ایشی ءِ تہ ءَ دمگی ءُ جھان ءِ کمک ءِ تہ ءَ گیشی ءِ موہ ھوار اَنت ایشی ءِ تہ ءَ تجارت، سرمایہ کاری، دفاع، جان سلامتی، آئی ٹی، موسمی مٹ ءُ بدلی، وانگ ءُ زانگ ءُ دود ءُ ربیدگ ھوار اَنت۔ زانگ بہ بیت کہ انڈونیشیا ءِ صدر پرابو سوبیانتو ءَ 2024 ءَ وتی اگدہ ءِ سر ءَ نندگ ءَ پد اقتصادی دیمروئی، وردن ءُ وراک ءُ توانائی ءِ تہ ءَ وت واجہی، وانگ ءُ زانگ ءُ صنعتی دیمروئی ءِ بنیات ءَ اصلاحات ءِ سر ءَ عمل درآمد کتگ۔ آئی ءَ 2025ءِ بندات ءَ جی ڈی پی ءَ را گیش کنگ ءِ واستہ 8 پالیشی آنی جار جتگ ایشی ءِ تہ ءَ مفت غذائیت ءِ وردن، چاگردی کمک، قدرتی وسیلگ آنی برآمد ءِ آمدنی ءِ ملکی کارمردی ءُ داننتارا نیشنل انویسٹمنٹ فنڈ ءِ جوڑ کنگ ھوار اِنت۔ دیمتر ءِ گامگیج آنی تہ ءَ ہاؤسنگ سبسڈی (ایف ایل پی پی پروگرام)، ایم ایس ایم ایز ءِ واستہ قرضہ ءِ معافی ءُ برکس ءِ باسک بوھگ، او ای سی ڈی ءِ رسائی ءُ کینیڈا ءُ یورپی یونین ءِ گوما سی ای پی اے ءِ معاہدہ ءِ وڑیں میاں اوستمانی تجارت ءِ تہ ءَ گیشی ھوار اِنت۔ جنوری 2025 ءَ بجٹ ءَ 306.6کرب کلدار ءِ کفایت شعاری ھم کنگ بوتگ تانکہ چاگردی پروگرام آنی واستہ جاگہ ​​جوڑ کنگ بہ بیت۔ پاکستان ءِ تر ءُ تاب ءِ وھد ءَ صدر پرابو مزن وزیر محمد شہباز شریف ءِ گوما ڈل ءِ تک ءَ گپ ءُ تران کنت ءُ صدر آصف علی زرداری ءَ گوں ھم گند ءُ نند کنت۔