حکومت بجلی ءِ شوبگ ءِ زندگ کنگ ءِ واستہ مزنیں کچے ءَ اصلاحات کنگ ءَ اِنت، ملک ءَ شمسی توان ءِ جوانیں توانائی ءُ سبزیں ٹیکنالوجی ءِ واستہ جوانیں چاگرد است اِنت، اویس احمد لغاری، احسن اقبال

لاہور۔6دسمبر  (اے پی پی): وفاقی وزیر توان (پاور ڈویژن) سردار اویس احمد خان لغاری ءَ گوشت کہ پاکستان توان ءِ شوبگ ءَ ترندیں اصلاحات ءُ ساپیں توان ءِ دیمروئی ءِ وسیلگ ءَ خطہ ءِ تہ ھاسیں سروکیں کرد پیلو کنگ ءَ انت۔ حکومت بجلی ءِ شوبگ آناں زندگ ءُ نوک کنگ ءِ واستہ مزنیں کچے ءَ اصلاحات کنگ ءَ انت۔ آئی ءَ اے ھیالانی درشانی شمبے ءِ روچ ءَ زوم ءِ وسیلگ ءَ لاہور یونیورسٹی آف مینجمنٹ سائنسز ءَ دومی ایشیاء  انرجی ٹرانزیشن سمٹ ءَ گوں تران کنان ءَ کت۔ اے موہ ءِ سر ءَ پیسریگیں وفاقی وزیر خزانہ ڈاکٹر شمشاد اختر، سابق جج سپریم کورٹ آف پاکستان جسٹس منصور علی شاہ، پروگرام ڈائریکٹر مصطفی امجد ،ڈاکٹر طارق جدون، ڈاکٹر عمیس عبدالرحمان ، حمزہ علی ہارون   سروک دیوان ءَ مزنیں کساسے ءَ راجی ءُ میاں اوستمانی ماہریں نودربر آنی بھر زوری بوتگ۔ سروک دیوان ءِ برجم دارگ پاکستان قابل تجدید توانائی ءِ اتحاد ءُ الائنس برائے موسمیاتی انصاف ءُ ساپیں توانائی ءِ کمک ءَ کنگ بوتگ۔ وزیر توانائی ءَ گوشت کہ توانائی ءِ سفارتی ءُ اقتصادی توازن ءِ تہ ءَ جھان ءِ تک ءَ گوں ترندی ءَ گوں بدلی آرگ بوھگ ءَ اِنت ایشی ءِ اثر دیمروئی کنوکیں ملک آنی سر ءَ ھاسیں رنگ ءَ ایشیا ءِ سر ءَ سک باز انت۔ آئی ءَ بین الاقوامی انرجی ایجنسی ءُ اقوام متحدہ ءِ رپورٹ آنی حوالہ ءَ گوشت کہ اے وھد ءَ براعظم توانائی ءُ موسمیاتی گورننس ءِ تہ ءَ یک نازرکیں موڑ ءِ سر ءَ اِنت۔ آئی ءَ گوشت کہ اے براعظم ءِ 48درسد توانائی ءِ کارمردی ءِ مرکز اِنت، وھدیکہ دگنیا ءِ 60درسد آبادی براعظم ءَ نندوک اِنت، اے دمگ ءَ را جھان ءِ توانائی ءِ ٹرانزیشن ءِ محور جوڑ کنت۔ وزیر توانائی ءِ رد ءَ گوستگیں دہ سال ءِ تہ ءَ براعظم ءِ سرمایہ کاری ءَ 900درسد گیشی بوتگ۔ پاکستان ءِ حوالہ ءَ آئی ءَ گوشت کہ ملک ءِ کاربن ءِ کشگ ءِ کساس جھان ءِ تک ءَ یک درسد ءَ چہ کم اِنت بلے اے براعظم ءِ تہ ءَ چاگردی ھترہ آنی تہ ءَ گیشتر آماچیں دہ ملک آنی تہ ءَ ھوار اِنت۔ آئی ءَ گوشت کہ پاکستان ءَ مزنیں کساس ءَ سولر انقلاب معمولی رنگ ءَ دیمروئی کتگ ءُ انوگ ءَ تاں ملک ءِ تہ ءَ نزیک ءَ 50 گیگاواٹ سولر پینل درآمد کنگ بوتگ۔ وزیر توانائی ءَ گوشت کہ اے وھد ءَ پاکستان ءَ وتی 52درسد بجلی ساپ ءُ پلگار وسیلگ آنی تہ ءَ چہ رسگ ءَ اِنت وھدیکہ اے بھر ءَ را 2035 ءَ تاں 90درسد ءَ چہ گیش کنگ ءِ ٹارگٹ ایر کنگ بوتگ۔ سرکلر قرضہ ءِ کمی، 118 ہیلپ لائن ءِ بندات کنگ، راجی گرڈ ءِ نوکیں رنگ ءَ جوڑ کنگ، زرعی بجلی گس آنی سولرائزیشن ءُ الیکٹرک گاڑی آنی چارجنگ ٹیرف ءِ تہ ءَ کمی کنگ بوتگ۔ آئی ءَ گیش گوشت کہ پاکستان ءَ یک مسابقتی بجلی ءِ مارکیٹ ءِ سر ءَ عمل کنگ بوتگ ایشی ءَ چہ شفافیت، سرمایہ کاری ءُ مقابلہ ءِ تہ ءَ گیشی بیت۔ مراگش ءِ گڈ ءَ وزیر توانائی ءَ برجم داروکیں ادارگ، میاں اوستمانی شریک ءُ بھر زوروک آنی منت گپت ءُ گوشت کہ اے سروک دیوان نہ ایوک ءَ تجروبت آنی مٹ ءُ بدلی ءِ پلیٹ فارم ءِ رنگ ءَ ثابت بیت بلکیں خطہ ءَ یکجائی کارروائی آنی واستہ سنگ میل ءُ پائیدار توانائی ءِ آیوکیں وھد ءِ نیمگ ءَ گامگیج ءِ رنگ ءَ ھم ثابت بیت۔ ایشی ءَ چہ پیسر سروک دیوان ءَ گشتانک دیان ءَ وفاقی وزیر برائے منصوبگ بندی ءُ دیمروئی پروفیسر احسن اقبال ءَ گوشت کہ موسمیاتی مٹ ءُ بدل یک جھان ءِ جیڈھ انت۔ موسمیاتی بدلی دنیا ءِ ھاتر ءَ مستریں چیلنج جوڑ بوتگ کہ ایشی ءِ گیش ءُ گیوار ءِ ھاتر ءَ یکجائی عالمی ذمہ واری ءُ شریکداری ءِ ضلورت اِنت۔ اے درگت ءَ پاکستان ءَ دیمروئی کتگیں ملک ءُ میاں اوستمانی مالیاتی ادارگ آنی سر ءَ زور پر داتگ کہ آ موسمیاتی فنانسنگ ءِ تہ ءَ وتی کرد ءَ را گیش بہ کن اَنت تانکہ دیمروئی کنوکیں ملک کمیں ھرچ ءُ درچ ءَ گرین ٹیکنالوجی ءَ را وتیگ بہ کن اَنت۔ آئی ءَ گوشت کہ موسمیاتی بدلی ءِ سبب ءَ ہنگامی جاور ءُ اقتصادی بوجھ گیش بوھگ ءَ انت، پمیشکا مالی ترغیب ءُ رعایتی مالی کمک المی انت۔ آئی ءَ گوشت کہ جھان ءِ مالیاتی نظام ءَ را نوں یکجائی زمہ واری ءِ بنیاد ءَ نوک جوڑینگ ءِ ضلورت انت۔ آئی ءَ گوشت کہ دگنیا گرین آرکیٹیکچر ءُ چاگرد دوستیں ٹیکنالوجی ءِ نیمگ ءَ رھادگ بوھگ ءَ انت، پاکستان قابل تجدید توان، شمسی ءُ سبز ٹیکنالوجی ءَ را دیمروئی دیگ ءِ واستہ وتی دیمروئی منصوبگ آنی تہ ءَ ٹوھیں اصلاحات ھم آرگ ءَ انت۔ ملک ءَ شمسی توانائی ءِ جوانیں توانائی، یک مھکمیں قابل تجدید مارکیٹ، انجینئرنگ ءُ سائنس ءِ تہ ءَ مزنیں ٹیلنٹ پول ءُ سبز ٹیکنالوجی ءِ واستہ جوانیں چاگرد ھست۔ آئی ءَ گیش گوشت کہ پاکستان ءَ میاں اوستمانی ادارگ، کثیر جہتی شریک ءُ نجی سرمایہ کار آنی کمک ءَ موسمیاتی مالی کمک ءُ سبز دیمروئی ءِ واستہ نوکیں ماڈل جوڑ کنگ ءَ انت ایشی ءِ تہ ءَ گرین بانڈ ءُ بلو فنانس ھوار انت کہ اے نوکیں وسیلگ انت۔