تحریک انصاف ءِ نیمگ ءَ فوج ءِ ھلاپ ءَ زبان ءِ کارمرد کنگ پاکستان ءِ ھلاپ انت، خواجہ محمد آصف

سیالکوٹ۔ 06 دسمبر (اے پی پی): وفاقی وزیر دفاع خواجہ محمد آصف ءَ گشتگ تحریک انصاف ءِ سروکی ءُ آئی ءِ درملکی عنصر گندی زبان ءِ کارمرد کنگ ءَ ملک ءِ فورسز ءُ شہیدانی قربانی ءَ را نادلگوش کنگ ءَ انت۔ شمبے ءِ روچ ءَ صدالکوٹ مند میڈیا ءَ گوں تران کنان ءَ آئی ءَ گوشت کہ لس گچین کاری ءَ پد پاکستان تحریک انصاف ءِ سروکی ءُ اگدہ دار آنی نیمگ ءَ زورگ بوتگیں رویہ شرپ ءِ روح ءِ ھلاپ انت۔ آئی ءَ گوشت کہ تحریک انصاف ءِ لھتے سروک ءُ اگدہ دار سوشل میڈیا ءِ سر ءَ پدریں رنگ ءَ نندگی ءِ توہین ءَ کن اَنت۔ تحریک انصاف ءِ انوگیں سروکی ضلع ءَ چہ ڈن بہ بیت، پارلیمنٹ ءَ بہ بیت، گس ءَ بہ بیت یا ڈن ءَ ہرکس ءِ سٹائل گپ ءُ تران یک پیم ءَ بے ادب ءُ بے ادبی انت۔ تحریک انصاف ءِ ہما مردم  کہ ملک ءَ بدمعاشی ءِ شنگ کنگ ءَ بوتگ انت آ ہم سکیں تُرسناکیں ءُ غیر ذمہ داریں زبان ءَ کارمرز کن انت۔ اگاں چہ آ دعویٰ کن اَنت کہ آ پی ٹی آئی ءِ ھمراہ نہ اَنت بلے عملی رد ءَ دوئیں یک نہ اَنت ءُ یکیں گندی زبان ءَ دیم ءَ برگ ءَ اَنت۔ وزیر دفاع ءَ گوشت کہ اگاں مردم ءُ ادارگ آنی بابت ءَ اے رنگیں زبان کارمرد کنگ بہ بیت گڈا رد عمل ءِ رسگ طبیعی انت۔ آئی ئَ گوشت کہ اے مردم اقتدار ئِ تہ ئَ ھم ھمے کار ئَ کنگ ئَ بوتگ اَنت۔ ایشانی سروک ءَ دگرانی سرا ھبر کنگ ءِ ھاترا دپٹہ پوش اِتگ ات، آ محمود خان اچکزئی صاحب ءِ نقل ءَ کنت کہ مرچی آئی ءِ ھمراہ اوشتاتگ۔ زالبولانی بابت ءَ نامناسبیں زبان ءِ کارمرز کنگ ھم آئی ءِ پیسریگیں رھبندانی بھر بوتگ۔ خواجہ محمد آصف ءَ گشتگ اگاں ڈی جی آئی ایس پی آر ءَ اے رویہ ءِ سرا ہچ وڑیں رد عمل داتگ گڑا اے سک باز مناسب ءُ متوازن انت۔ من بے کساس شہیدانی جنازہ ءَ بہر زرتگ، آہانی گساں تر ءُ تاب کتگ، مزن وزیر ءُ آہانی کہول ءَ گوں گند ءُ نند کتگ، بلے ہچ شہید ءِ جنازہ ءَ من کدی تحریک انصاف ءِ راہشون نہ دیستگ۔ تحریک انصاف ءِ دست چیری ءَ یک صوبہ یے است ءُ ھمے صوبہ ءَ گیشتریں شہید بوہگ ءَ انت ۔ سلاہ بندیں اُرد ءِ سپاھیگ بہ بنت پنجابی بہ بنت، پشتون بہ بنت، بلوچ بہ بنت، سندھی بہ بنت، گلگت بہ بنت یا بلتستان بہ بنت درست پہ دوستداریں وطن ءَ وتی سراں ندر کنگ ءَ اَنت، بلے تحریک انصاف ءِ سروکی اے ندر کنگ ءَ ھم نہ منّ اِیت۔ وفاقی وزیر دفاع ءَ گشتگ کہ تحریک انصاف شہیدانی جنازہ ءَ بہر بہ زوریت، وتی مجاہدین ءُ شہیدانی حق ءَ توار چست بہ کنت، ناشرکارانی نظریہ ءَ مہ زوریت، طالبان ءِ سرا نرمی ءِ درشان مہ کنت ءُ آہانی سرا مہر ءُ رواداری ءِ گپ مہ جنت۔ وھدے کہ یک گلے ناشرکارانی حمایت ءَ ءُ وتی لشکر ءِ ھلاپ ءَ زبان ءَ کارمرز کنت گڑا رد عمل ناگزیر اِنت۔ آئی ءَ گوشت کہ عمران خان ہر جیڈھ ءِ سر ءَ گپ جنت گڑا جنگ ءِ وھد ءَ آئی ءَ وتی مجاہدین، وتی زھگ، وتی ایئر فورس، نیوی ءُ آرمی ءِ واستہ پرچا گپ نہ جتگ؟ آئی ءَ گوشت کہ جنگ ءِ وھد ءَ ھم تحریک انصاف ءِ ارادہ وتی اُرد آناں نشانگ جوڑ کنگ، ردیں زبان کارمرد کنگ ءُ شھید آنی ھلاپ ءَ بے پرواہی ءُ توھین آمیزیں لہجہ ءِ زورگ بوتگ۔ ھما مردم کہ آھانی زبان ءُ کردار انچیں کچے ءَ کپتگ کہ یک شھیدے ھم سلامت نہ اِنت چہ آھاں شرپ ءُ زمہ واری ءِ اُمیت کنگ نہ بیت۔ آئی ءَ گوشت کہ کجام بنیاد ءَ ھما مردم کہ آیانی کردار چشیں تک ءُ پھنات ءَ کپتگ آ گشت کن اَنت کہ چشیں ءُ چشیں گپ مہ بیت؟ ڈی جی آئی ایس پی آر ءَ اے گپ ءَ گوں دلجمی ءَ گشگی اِنت۔ تحریک انصاف ءِ پجار پاکستان ءِ دژمنانی پجار انت۔ اگاں سادہ بوھگ لوٹ ئے گڑا بکن، زھرشانی کنگ لوٹ ئے گڑا بکن بلے پاکستان ءِ سرڈگار، شان ءُ شرپ ءَ چیلنج کنگ ءِ جرات مہ کن۔ خواجہ محمد آصف ءَ گشتگ کہ گوستگیں زمانگ ءَ ہم ما پوجی حکومتانی وہد ءَ اسٹیبلشمنٹ حقیقت ءِ آماچ کتگ، بلے شہیدانی جنازہ ءِ موہ ءَ زبان ءِ کارمرز کنگ، آہانی جنازہ ءَ چہ رکگ ءِ وھد ءَ اے پاکستان نہ انت بلکیں پاکستان ءِ گوں دژمنی انت ءُ ایشی ءِ سرا ما کدی چپ نہ بئیں۔