درجہ حرارت ءِ گیش بوھگ ءُ گلیشیر ءِ تیزی ءَ گوں آپ بوھگ موسمی بدلی ءِ براہ راستیں آسر انت، ڈاکٹر مصدق ملک

اسلام آباد۔5دسمبر  (اے پی پی): موسمیاتی بدلی ءُ چاگردی رابطہ ءِ وفاقی وزیر ڈاکٹر مصدق ملک ءَ گوشت کہ درجہ حرارت ءِ گیش بوھگ ءُ گلیشیر آنی ترندیں آپ بوھگ ھما آلودگی ءِ براہ راست آسر اَنت کہ ما شنگ ءُ تالان کنگ ءَ ایں ءُ موسمی بدلی ءِ سبب اِنت۔ اے ھیالانی درشانی آئی ءَ دریائے سندھ ءِ ڈالفن ءِ رکھینگ ءِ 25سال ءِ سرجمی ءِ درگت ءَ ورلڈ وائڈ فنڈ فار نیچر ءِ نیمگ ءَ برجم داشتگیں کانفرنس ءَ گوں تران کنان ءَ کت۔ آئی ءَ گوشت کہ راوی دریا ءِ آپ ءِ سکیں آلودگی ءِ سر ءَ من ءَ سک باز پریشانی اِنت ءُ گوشت کہ اے آپ نوں کشت ءُ کشاری ءِ واستہ کارمرد نہ اِنت۔ انوگیں سیلاب ءِ سبب ءَ بوتگیں معاشی تاوان چہ 9.5 درسد ءَ گیش بوتگ بلے اے موسمی آفتانی انسانی ھرچ ءُ درچ باز دردناک تر اِنت۔ آئی ءَ گوشت کہ گوستگیں چار مزنیں سیلاب آنی ساھت ءَ 4700 ءَ چہ گیش مردم بیران بوتگ وھدیکہ 17000 ءَ چہ گیش مردم ناتوان بوتگ اَنت۔ ڈاکٹر مصدق ملک ءَ سندھ دریا ءِ ڈالفن ءِ رکھینگ ءِ ھاتر ءَ ڈبلیو ڈبلیو ایف ءِ دیریں وھد ءِ ھزمت آناں ساڑات ءُ وزارت ءِ سرجمیں کمک ءِ پدرائی کت۔ آئی ءَ گوشت کہ پاکستان ءِ حکومت ڈبلیو ڈبلیو ایف ءِ گوما اوشتاتگ ءُ زندمان ءِ تنوع ءِ رکھینگ ءُ چاگردی پائیداری ءِ واستہ دیم ءَ ھم نزیکی ءَ کمک کنت۔ آئی ءَ اے گپ ءِ سر ءَ زور پر دات کہ سندھ دریا ءِ ڈالفن ءِ رکھینگ ایوک ءَ چاگردی ذمہ واری نہ اِنت بلکینگ ءَ اے زندمان ءُ انسانیت ءِ جیڈھ اِنت۔