راجی اسمبلی ءِ اسپیکر سردار ایاز صادق ءَ کرغزستان ءِ صدر صادر ژپاروف  ءَ گوں گند ءُ نند کتگ، دو نیمگی سیادی، دمگی ءُ میان استمانی جیڈھ آنی سر ءَ گپ ءُ تران کتگ

اسلام آباد۔4دسمبر  (اے پی پی): پاکستان ءِ تر ءُ تاب ءَ   اتکگیں  کرغزستان ءِ صدر صادر ژپاروف  ءَ پنچ شمبے ءِ روچ ءَ راجی اسمبلی ءِ اسپیکر سردار ایاز صادق ءَ گوں گند ءُ نند کت۔ اے موہ ءِ سر ءَ راجی اسمبلی ءِ چیئرمین صادق یوسف رضا  گیلانی  ھم ساڑی ات۔ قومی اسمبلی ءِ سیکرٹریٹ ءِ رد ءَ گند ءُ نند سک باز مہروانیں چاگرد ءَ بوت۔ گند ءُ نند ءَ دو نیمگی سیادی ءِ دیمروئی، پارلیمانی سیادی ءَ را مھکم کنگ، تجارت ءُ سرمایہ کاری، توانائی، جان سلامتی، وانگ ءُ زانگ ءُ دود ءُ ربیدگ ءِ تبادلہ ءُ ھاسیں دمگی ءُ میاں اوستمانی جیڈھ آنی سر ءَ گپ ءُ تران کنگ بوتگ۔ اسپیکر سردار ایاز صادق ءَ گوشت کہ پاکستان کرغزستان ءِ گوما وتی دیریں دوستی ءِ سیادی ءَ را سک باز ارزشت دنت ۔ آئی ءَ کرغزستان ءِ صدر ءِ پاکستان ءِ تر ءُ تاب ءَ را وش اتک کت ءُ گوشت کہ کرغزستان ءِ صدر صدیر ژاپاروف ءِ تر ءُ تاب دوئیں ملک آنی نیام ءَ دلپھکی ءُ نزیکیں سیادی آناں گیش مھکم کنگ ءِ واستہ یک ھاسیں سنگ میل ءِ ثابت بیت۔ قومی اسمبلی ءِ اسپیکر سردار ایاز صادق ءَ گشتگ کہ کرغزستان خطہ ءِ تہا ھاسیں ملک انت ءُ پاکستان خطہ ءِ تہا امن، برجائی ءُ اقتصادی کمک ءِ دیمروئی ءِ واستہ کوشست کنگ ءَ انت۔ آئی ءَ گوشت کہ برجمیں امن دمگی تجارت ءِ دیمروئی ءِ واستہ المی انت ۔ آئی ءَ گوشت کہ پاکستان ءَ ناشرکاری ءِ ھلاپ ءَ جنگ ءَ بے دروریں قربانی داتگ، بلے اپسوز ءِ گپ ایش انت کہ اوگانستان ءِ سرزمین انگت ءَ پاکستان ءِ ھلاپ ءَ ناشرکاری ءَ کارمرد کنگ بوھگ ءَ انت، ایشی ءِ سبب ءَ دمگ ءِ تجارتی چست ءُ ایر ءُ روانی آماچ بوھگ ءَ انت۔ راجی اسمبلی ءِ سروک ءَ دمگ ءِ امن ءُ ایمنی ءُ برجائی ءِ واستہ یکجائی حکمت عملی ءُ کمک ءَ را وھد ءِ ضلورت لیک اتگ۔ اے موہ ءِ سر ءَ بھارتی زوراکی ءِ ھوالگ ءَ آئی ءَ گوشت کہ پاکستان ءَ مدام وتی وت واجہی ءِ سرجمی ءَ رکھینگ کتگ ءُ بھارتی زوراکی ءِ لائکیں پسو داتگ، ایشی ءِ تہ ءَ پاکستان ءَ دژمن ءِ 7 بالی گراب ایر جتگ۔ دوئیں بامرد آں پارلیمانی ءُ السی تک ءَ سیادی ءَ را گیش دیمروئی دیگ ءِ سرا تپاک کتگ۔ دوئیں نیمگ ءَ میاں اوستمانی ءُ دمگی دیوان آنی تہ ءَ وت مہ وتی کمک آناں دیمروئی دیگ ءِ واستہ وتی جزم ءِ پدا زور دات۔ کرغزستان ءِ صدر صدر ژاپاروف ءَ پاکستان ءِ سروکی ءُ الس ءِ شگر ءُ منت گپت کہ آئی ءَ را پاکستان ءَ سر بوھگ ءِ وھد ءَ آئی ءَ را گرمیں وش اتک ءُ مہمان داری کتگ۔ پاکستان ءِ الس ءُ سروکی ءِ نیمگ ءَ پیش داشتگیں مہر ءُ مخلصی پہ دائم ءَ یات کنگ بیت۔ کرغزستان ءِ صادر ژاپاروف ءَ گوشت کہ کرغزستان پاکستان ءِ گوما وتی دوستی ءِ سیادی ءَ را ارزشت دنت ءُ پارلیمانی تک ءَ سیادی آنی تہ ءَ گیشی ءَ چہ دوئیں ملک آنی پارلیمنٹ آنی نیام ءَ یکوئی ءُ کمک ءَ را گیش مھکم بیت۔ آئی ءَ پڑ ءَ امن ، دیمروئی ءُ وشھالی ءِ واستہ پاکستان ءِ جوانیں کرد ءِ توسیپ کت۔