مزن وزیر شہباز شریف ءُ کرغزستان ءِ صدر صادر ژپاروف  ءِ نیام ءَ ڈل ءِ تک ءَ گند ءُ نند کنگ بوتگ، دو نیمگی بیپار ءُ سرمایہ کاری ءِ تہ ءَ گیشی ءِ سر ءَ تپاک کنگ بوتگ

اسلام آباد۔4دسمبر  (اے پی پی): پاکستان ءُ کرغزستان ءَ دو نیمگی تجارت ءُ سرمایہ کاری ءِ تہ ءَ گیشی ءِ سر ءَ تپاک کتگ ءُ وت مہ وتی اقتصادی کمک ءَ را گیش کنگ ءِ ضلورت ءِ سر ءَ زور پر داتگ ءُ ھمے وھد ءَ پرامن ءُ مھکمیں اوگانستان ءُ اوگان الس ءِ واستہ برجمیں آیوکیں وھد ءِ واستہ وتی عزم ءِ سر ءَ پدا زور داتگ۔ آہاں اے گپ ءِ سرا ہم تپاک کت کہ اوگان طالبان حکومت ءَ را میاں اوستمانی براتی ءَ گوں وتی وعدہ پیلو کنگی انت ءُ پاکستان ءِ جائزیں سیکورٹی جیڈھ آنی گیواری ءِ ھاترا ناشرکاریں مردم آنی   ھلاپ ءَ مھکمیں  ءُ تسدیک  ءِ لائکیں گامگیج چست کنگی انت۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءُ کرغزستان ءِ صدر صادر ژپاروف ءِ نیام ءَ مزن وزیر گس ءَ ڈل آنی تک ءَ گند ءُ نند بوتگ۔ دو نیمگی گپ ءُ تران ءِ تہ ءَ مزن وزیر ءِ کمک ءَ نائب مزن وزیر ءُ دری کارانی وزیر محمد اسحاق ڈار، چیف آف آرمی اسٹاف فیلڈ مارشل سید عاصم منیر، ٹوھیں ٹوھیں  بنجاھی  وزیر ءُ مزنیں سرکاری کارندہ آنی نیمگ ءَ چہ کمک کنگ بوت۔ بیان ءِ رد ءَ مزن وزیر ءَ اے گپ ءِ سر ءَ زور پر دات کہ پاکستان جمہوریہ کرغزستان ءِ گوما وتی براتی سیادی ءَ را سک باز ارزشتی چاریت۔ مزن وزیر ءَ وتی "وژن سینٹرل ایشیا” ءِ پالیشی ءِ چیر دستی ءَ میاں اوستمانی ملک آنی گوما سیادی ءَ را دیمروئی دیگ ءِ واستہ پاکستان ءِ جزم ءِ سر ءَ پدا زور دات۔ دوئیں رہشوناں پاکستان ءُ کرغزستان ءِ نیام ءَ سیادی ءِ دیمروئی ءُ گیش کنگ ءِ سرا زور پر دات کہ ایشی ءِ بنیات اسٹریٹجک سیادی، یکجائی تہذیب ءُ قدر ءُ دمگی امن ءُ وشحالی ءِ یکجائی وژن ءِ سرا انت۔ دوئیں رہشوناں ھاسیں رنگ ءَ تجارت، توانائی، رابطہ ءُ مردم آنی نیام ءَ تبادلہ ءِ شوبگ آنی تہ ءَ برجاھیں دو نیمگی کمک آناں گیش مھکم کنگ ءِ وتی جزم ءِ پدا پدر کت۔ دو نیمگی اقتصادی کمک ءَ را گیش گیش کنگ ءِ ضلورت ءَ را پدر کنان ءَ دوئیں رہشون آں دو نیمگی تجارت ءُ سرمایہ کاری ءَ را گیش کنگ ءِ سر ءَ تپاک کت۔ ایشاں تر ءُ تاب ءِ ساھت ءَ دستخط کتگیں معاہدہ ءُ مفاہمت نامہ آنی جوانیں رنگ ءَ عمل درآمد ءِ وسیلگ ءَ 2027-2028 ءَ تاں دو نیمگی تجارت ءِ کساس ءَ را 200ملین ڈالر ءَ سر کنگ ءِ سر ءَ تپاک کت۔ گند ءُ نند ءِ ساھت ءَ دوئیں رہشوناں 28-29جولائی 2025 ءَ اسلام آباد ءَ کرغزستان ءُ پاکستان ءِ یکجائی حکومتی کمیشن ءِ پنچمی دیوان ءِ سوبمندیں برجم دارگ ءِ سر ءَ ھم وشھالی ءِ درشانی کت۔ کاسا 1000 منصوبہ ءِ نفاذ ءِ سرا کار کنگ ءَ انت۔ اے منصوبگ دمگی توانائی ءِ کمک ءِ تہ ءَ یک سنگ میل ءُ میان اُستمانی ءُ جنوبی ایشیا ءِ نیام ءَ یک ھاسیں رابطہ یے ۔ دوئیں رہشوناں جمہوریہ کرغزستان ءُ پاکستان ءِ نیام ءَ ایمن، مھکم، پائیدار ءُ کثیر جہتی سیادی ءِ ضلورت ءِ سر ءَ ھم زور پر دات۔ اے درگت ءَ آھاں پاکستان ءُ کرغزستان ءِ نیام ءَ ’’ٹرانزٹ ءِ تہ ءَ چار نیمگی ٹریفک ءِ معاہدے‘‘ ءِ چیر دستی ءَ سڑک ءِ راہداری ءِ آپریشنل کنگ ءِ سر ءَ وشھالی ءِ درشانی کت تانکہ دو نیمگی ءُ دمگی تجارت ءَ را گیش گیش کنگ بہ بیت۔ گپ ءُ تران ءِ ساھت ءَ دوئیں ملک آنی سروک آنی تہ ءَ ھاسیں دمگی ءُ جھان ءِ جیڈھ آنی سر ءَ ھم ھیال ءُ لیکہ ءِ درشان کنگ بوت ءُ دمگی امن ءُ ایمنی ءِ واستہ گیش بوھوکیں ھترہ آنی سر ءَ جیڈھ آنی درشان کنان ءَ اے گپ ءِ سر ءَ تپاک کت کہ جیڈھ آناں میاں اوستمانی کانود ءِ رد ءَ ھاسیں رنگ ءَ اقوام متحدہ ءِ منشور ءُ ھمگرنچیں سیکورٹی کونسل ءِ رد ءَ امن ءُ ایمنی ءِ رنگ ءَ گیش ءُ گیوار کنگ بہ بیت۔ دوئیں رہشوناں یک پرامن ءُ مھکمیں اوگانستان ءُ اوگان الس ءِ پائیداریں آیوکیں وھد ءِ ھاترا وتی عزم ءِ پدا پدر کت ءُ اے گپ ءِ سر ءَ تپاک کت کہ اوگان طالبان حکومت ءَ را میاں اوستمانی براتی ءِ دیم ءَ وتی عزم آنی سر ءَ عمل کنگ ءُ پاکستان ءِ جائزیں سیکورٹی جیڈھ آنی گیواری ءِ واستہ ناشرکاریں عناصر ءِ ھلاپ ءَ ٹھوس ءُ تصدیق ءِ لائکیں گامگیج چست کنگ لوٹ ایت۔ دوئیں رہشوناں غزہ ءَ برجاھیں امن ءِ کوشست آنی سر ءَ ھم ھیال ءُ لیکہ ءِ درشان کت ءُ فلسطین ءِ اُلس ءِ وت واجہی ءِ ھک ءِ واستہ ءُ فلسطین ءِ یک آجوئیں، زندگ داروکیں، نزیکیں ءُ وت واجہیں ریاست ءِ واستہ وتی بے دروریں حمایت ءِ پدرائی کت کہ ایشی ءِ بنیات ءَ جون 1967 ءَ پیسر ءِ دارالحکومت ءِ بستار ءَ ءُ بیت المقدس ءِ گوما بوتگ۔ اے موہ ءِ سر ءَ توانائی، معدنیات، تجارت، وانگ ءُ زانگ، کانود ءُ انصاف، دود ءُ ربیدگ ءُ سیل ءُ سواد ءَ ھوار جتا جتائیں شوبگ آنی تہ ءَ دوئیں ملک آنی نیام ءَ 15 مفاہمت نامہ ءِ بدلی ءُ وت مہ وتی مفاد ءِ معاہدہ آنی سر ءَ دستخط کنگ ءِ مراگش ھم برجم دارگ بوت، ایشی ءِ تہ ءَ پاکستان ءِ مزن وزیر ءُ جمہوریہ کرغزستان ءِ صدر ءَ بھر زوری کت۔ ایشی ءَ چہ پیسر مزن وزیر محمد شہباز شریف ءَ جمہوریہ کرغزستان ءِ صدر ءِ مزن وزیر گس اسلام آباد ءَ وش اتک کت۔ مزن وزیر گس ءَ سر بوھگ ءَ پد جمہوریہ کرغزستان ءِ صدر صدر ژاپاروف ءَ را پاکستان ءِ سلاہ بندیں اُرد ءِ ٹروپ  ءِ نیمگ ءَ گارڈ آف آنر پیش کنگ بوت۔ سرکاری استقبالیہ ءَ چہ پد دوئیں راہشونانی نیام ءَ دو نیمگی گند ءُ نند ءِ برجم دارگ بوت۔ ایشی ءَ ابید مزن وزیر ءَ جمہوریہ کرغزستان ءِ صدر ءُ آئی ءِ ڈل ءِ شرپ ءَ نان ءِ ورگ ءِ میزبانی ھم کت۔ پد ءَ دوئیں سروکاں یکجائی میڈیا بریفنگ ھم کتگ کہ ایشی ءِ تہ ءَ گند ءُ نند ءِ تہ ءَ گپ ءُ تران بوتگیں نکات آنی سر ءَ چمشانک دیگ بوتگ۔