پاکستان ءَ شہزاد اکبر ءُ عادل راجہ ءَ را زوت برطانیہ ءَ چہ   ھوالگ کنگ  ءِ لوٹ کتگ، تہی کارانی وزیر ءَ دستاویزی ثبوت برطانیہ ءِ ہائی کمشنر ءِ دست ءَ داتگ

اسلام آباد۔4دسمبر  (اے پی پی): وفاقی وزیر داخلہ محسن نقوی ءَ برطانیہ ءَ چہ لوٹوکیں ملزم شہزاد اکبر ءُ عادل راجا ءِ زوتیں حوالہ کنگ ءِ  یک شلی ءَ  لوٹ کتگ۔ آئی ءَ اے لوٹ پنچ شمبے ءِ روچ ءَ اسلام آباد ءَ برطانیہ ءِ ہائی کمشنر جنرل مرہت ءِ گوما ترندیں ءُ ھاسیں گند ءُ نند ءِ ساھت ءَ کتگ۔ گند ءُ نند ءِ ساھت ءَ تہی کارانی وزیر محسن نقوی ءَ شہزاد اکبر ءُ عادل راجہ ءِ حوالہ ءَ ھوالگ ءَ سرکاری کاگد ءُ کاگد برطانیہ ءِ ہائی کمشنر ءِ دست ءَ دات انت۔ محسن نقوی ءَ دوئیں مردمانی نیمگ ءَ پاکستان ءِ ھلاپ ءَ شنگ بوتگیں پروپیگنڈا ءِ ھم ٹھوس شواہد پیش کتگ ءُ اے گپ پدر کتگ کہ اے دوئیں مردم پاکستان ءِ کانود ءِ رد ءَ لوٹگ بنت پمیشکا آ زوت پاکستان ءِ دست ءَ دیگ بہ بنت۔ محسن نقوی ءَ دو گال ءَ گْوشتگ کہ ما آزاتی ءَ گوں درشان  ءِ  سرجمیں حمایت ءَ کن ایں بلے اے وھد ءَ جعلی ھال ءُ ردیں ھال ءُ اھوال پہ ھر ملک ءَ ایمنی ءِ جیڈھ جوڑ بوتگ اَنت۔ آئی ءَ گیش گْوشتگ کہ ھچ ملک ریاست ءُ راجی ادارگانی سر ءَ تہمت ءُ بدنامی ءِ موہ ءَ دات نہ کنت کہ سرجمیں ملک ءَ شنگ ءُ تالان بہ بیت۔ آئی ءَ وتی امیت سہرا کت کہ اے مردم آنی  لوٹائینگ ءِ واستہ برطانیہ پاکستان ءِ گوما کمک کنت ۔ گند ءُ نند ءِ تہ ءَ برطانیہ ءَ کانودی رنگ ءَ نندوکیں پاکستانی آنی وطن واتر کنگ ءُ پاک برطانیہ ءِ سیکورٹی کمک ءِ تہ ءَ گیشی ءِ سر ءَ ھم گپ ءُ تران کنگ بوت۔ وزیر داخلہ ءَ گوشت کہ وزارت داخلہ ءَ ھم وزارت ءِ درئی کار آنی وسیلگ ءَ مردم ءِ دیم دیگ ءِ عمل بندات کتگ۔ گند ءُ نند ءَ وفاقی سیکرٹری داخلہ محمد خرم آغا ءُ وزارت ءِ ایندگر مزنیں کارندہ ھم ھوار اتنت۔