پاکستان ءُ کرغزستان ءِ نیام ءَ 15 منوگری ءُ تپاک نامہ ، دو نیمگی تجارت ءِ کساس ءَ 200 ملین ڈالر ءَ سر کنگ ءِ وعدہ کتگ

اسلام آباد۔4دسمبر  (اے پی پی): مزن وزیر محمد شہباز شریف ءَ پاکستان ءُ کرغزستان ءِ نیام ءَ دو نیمگی تجارت ءِ کساس ءَ را 200 ملین ڈالر ءَ سر کنگ ءِ وتی جزم ءِ یک رندے پدر کتگ ءُ گوشت کہ پاکستان کرغزستان ءِ گوما سیادی ءَ را سک باز ارزشت دنت ءُ سیاست، دود ءُ ربیدگ، دود ءُ ربیدگ، توانائی ءُ رابطہ کاری ءِ پڑ ءَ نوکیں بالاد آنی سر ءَ سیادی آناں سر کنگ ءِ واھشت مند اِنت۔ کرغزستان ءَ را وتی بندرگاہ آنی وسیلگ ءَ دمگی ءُ جھان ءِ مارکیٹ آناں رسائی دیگ بیت۔ پاکستان ءُ کرغزستان بزنس فورم ءَ چہ کمک ءِ نوکیں راہ پچ بنت۔ وھدیکہ کرغزستان ءِ صدر صادر ژاپاروف ءَ گشتگ کہ اقتصادی استحکام ءُ دیمروئی ءِ ھاتر ءَ کوشست پاکستان ءِ مزن وزیر ءِ وژن ءِ عکس انت۔ مئے ھیال ءُ لیکہ جتا جتائیں دمگی ءُ میان استمانی جیڑہانی سرا یک اَنت۔ پاکستان کرغزستان ءِ دوست ءُ معتبریں شریک انت۔ تجارت، وانگ ءُ زانگ، سائنس ءُ اے دگہ شوبگ آنی تہ ءَ کمک ءَ را گیش کنگ لوٹ ایت۔ توانائی ءِ شوبگ ءَ کاسا 1000 منصوبگ ءِ وھد ءِ سر ءَ عمل کنگ ءَ چہ دوئیں نیمگ ءَ فائدگ مند بیت۔ آئی ءَ اے ھیالانی درشانی پنچ شمبے ءِ روچ ءَ پاکستان ءُ کرغزستان ءِ نیام ءَ جتاجتائیں شوبگ آنی تہ ءَ کمک ءَ دیمروئی دیگ ءِ واستہ 15 منوگری ءُ تپاک نامہ آنی مراگش ءَ گشتانک دیان ءَ کت۔ مزن وزیر ءَ گوشت کہ کرغزستان ءِ صدر ءَ را اسلام آباد ءَ وش آتک کنگ بیت۔ پاکستان ءُ کرغزستان ءِ نیام ءَ دل ءِ جہلانکی ءَ براتی سیادی است انت۔ کرغزستان ءِ صدر دو دہائی ءَ پد پاکستان ءِ تر ءُ تاب ءَ انت۔ ما حکومت ءُ پاکستان ءِ 240 کروڑ الس ءِ نیمگ ءَ شرپداریں مہمان ءَ را وش آتک کناں ۔ پاکستان کرغزستان ءِ گوما سیادی ءَ سک باز ارزشت دنت ۔ اے تر ءُ تاب دو نیمگی سیادی ءَ را مھکم کنگ ءِ واستہ سک باز ارزشت ءِ واھند اِنت۔ اے تر ءُ تاب ءَ چہ دوئیں ملک آنی نیام ءَ استیں دو نیمگی سیادی ءَ را توامیں شوبگ آنی تہ ءَ گیش دیمروئی رسیت۔ آئی ءَ گوشت کہ پاکستان ءُ جمہوریہ کرغزستان ءِ نیام ءَ راجدپتری سیادی گیش ءُ گیوار انت۔ جغرافیائی اہمیت ءِ ملک اَنت۔ مئے دل یکجاہ بوت انت۔ آئی ءَ گوشت کہ کرغزستان ءِ صدر ءِ گوما گپ ءُ تران ءَ بازیں شوبگ آنی تہ ءَ تعاون ءِ بابت ءَ دمگی ءُ جھان ءِ جیڈھ آنی سر ءَ گپ ءُ تران بوتگ۔ ما مردم ءِ نیام ءَ رابطہ، دود ءُ ربیدگ ءُ اے دگہ پڑ آنی تہ ءَ کمک ءِ تہ ءَ گیشی ءِ سر ءَ ھم گپ ءُ تران کت۔ ما تعلقات ءَ را نوکیں بالاد ءَ سر کنگ ءِ وتی یکجائی جزم ءِ دوبر پدر کتگ۔ آئی ءَ گوشت کہ 1992ءَ چہ دوئیں ملک آنی نیام ءَ سفارتی سیادی ءِ برجائی ءَ پد وت مہ وتی دل یکیمی ءِ بنیاد ءَ مئے سیادی ءَ را گیش دیمروئی کتگ۔ دوئیں ملک آنی نیام ءَ اقتصادی جتا جتائیں شوبگ آنی تہ ءَ سیادی آناں دیمروئی دیگ ءِ واستہ بزنس فورم ءِ ھم برجم دارگ بوھگ ءَ اِنت، ایشی ءَ چہ دوئیں ملک آنی نیام ءَ تجارتی سیادی آناں دیمروئی رسیت۔ مزن وزیر ءَ گوشت کہ جتاجتائیں شوبگ آنی تہ ءَ کمک ءِ واستہ 15 منوگری ءُ تپاک یک سک باز المی ئیں دیمروئی انت۔ آئی ءَ گوشت کہ پاکستان کرغزستان بزنس فورم ءَ چہ کمک ءِ نوکیں راہ پچ بنت۔ کاروباری فورم ءِ تہا 200 ملین ڈالر ءِ تپاک نامہ ءِ سرا دستخط کنگ بیت، ایشی ءِ سبب ءَ مئے دو نیمگی تجارت ءِ حجم کہ اے وھد ءَ 15 ءَ چہ 16 ملین ڈالر انت، دو سال ءَ پد 200 ملین ڈالر ءَ سر بیت۔ مزن وزیر ءَ گوشت کہ پاکستان بحر ہند ءِ گیٹ وے انت ءُ ما کراچی ءِ بن قاسم ءُ گوادر بندرگاہ آنی وسیلگ ءَ کرغزستان ءَ را دمگی ءُ جہانی مارکیٹ آناں رسائی ءِ آسراتی ءَ دئیں۔ آئی ءَ گوشت کہ ما دود ءُ ربیدگی تبادلہ، سیل ءُ سواد ءُ وانگ ءُ زانگ ءِ شوبگ آنی تہ ءَ کمک ءِ وسیلگ ءَ مردم آنی نیام ءَ رابطہ آناں دیمروئی دیگ ءِ سر ءَ ھم گپ ءُ تران کت۔ ما دو نیمگی سیادی ءَ را گیش مھکم کنگ ءِ واستہ کرغزستان ءِ صدر ءِ منت وار ایں ۔ ما تعلقات ءَ را نوکیں بالاد ءَ سر کنگ ءِ وتی یکجائی جزم ءِ دوبر پدر کتگ۔ توانائی، تجارت , ما تعلقاتاں دیم ءَ برگ ءُ دگہ دمگاں کمک ءَ گیش کنیں۔ جتا جتائیں پڑ آنی تہ ءَ کمک ءِ واستہ 15 منوگری ءُ تپاک نامہ ھاسیں پیشرفت اِنت۔ ما دوئیں ملک آنی الس ءِ آسراتی ءُ دمگی برجائی ءِ واستہ یکجائی ءَ دیم ءَ روان کن ایں ۔ دوئیں ملک یکجائی ءَ دود ءُ ربیدگ ءِ شوبگ ءَ کمک ءَ را دیم ءَ برگ ءِ واستہ جتاجتائیں مراگش آنی برجائی ءَ کن اَنت۔ کرغزستان ءِ صدر صادر ژاپاروف ءَ گوشت کہ گرمیں وش اتک ءُ دل ءِ جہلانکی ءَ پاکستان ءِ حکومت ءُ الس ءِ منت وار آں ۔ اے 20سال ءَ پد کرغزستان ءِ صدر ءِ پاکستان ءِ اولی تر ءُ تاب اِنت ءُ 2021 ءَ وتی اگدہ ءِ سر ءَ نندگ ءَ پد منی اولی پاکستان ءِ تر ءُ تاب اِنت۔من مزن وزیر شہباز شریف ءِ منت وار آں کہ آئی ءَ من ءَ تر ءُ تاب ءِ دعوت داتگ۔ پاکستان جنوبی ایشیا ءِ تہا کرغزستان ءِ یک ھاسیں شریک انت۔ مئے نیام ءَ تاریخی سیادی است انت۔ ما تجارت، سائنس، وانگ ءُ زانگ ءُ اے دگہ شوبگ آنی تہ ءَ کمک ءِ دیمروئی ءِ ھوالگ ءَ گپ ءُ تران کتگ۔ اقتصادی استحکام ءُ دیمروئی ءِ واستہ کوشست پاکستان ءِ مزن وزیر ءِ ویژن ءِ آدینک انت۔ ما دو نیمگی کمک ءُ آیوکیں منصوبگ آنی بابت ءَ سرجمیں رنگ ءَ گپ ءُ تران کتگ۔ آئی ءَ گوشت کہ تجارتی سیادی آنی تہ ءَ گیشی ءِ واستہ کاروباری فورم ءِ برجائی المی اِنت۔ 1000 منصوبگ ءِ ارزشت ءِ سر ءَ زور پر دیان ءَ آئی ءَ گوشت کہ اے منصوبگ ءِ وھد ءِ سر ءَ سرجم کنگ وت مہ وتی سیت مند بیت۔ ما رابطہ، ٹرانسپورٹ ءُ ایندگر شوبگ آنی تہ ءَ کمک ءَ را گیش کنگ ءِ گنجائش آنی سر ءَ تران کتگ۔ اے وھد ءَ کرغزستان ءَ 12 ہزار ءَ چہ گیش پاکستانی نودربر وانگ ءَ انت۔ کاسا 1000 منصوبہ توانائی ءِ لوٹ آناں پیلو کنگ ءِ ھاترا المی انت۔ ما دمگ ءِ امن، برجائی ءُ ایمنی ءِ واستہ کمک ءِ تہ ءَ گیشی ءِ سر ءَ تپاک کتگ۔ تجارت، وانگ ءُ زانگ، سائنس ءُ اے دگہ شوبگ آنی تہ ءَ کمک ءَ را گیش کنگ لوٹ ایت۔ آئی ءَ مزن وزیر شہباز شریف ءَ را کرغزستان ءِ آجوئی ءِ روچ ءِ مراگش ءَ بہر زورگ ءِ دعوت داتگ۔ دوئیں ملک ناشرکاری ءِ ھلاسی ءِ واستہ جزمیگ اَنت ءُ جتاجتائیں دمگی ءُ میاں اوستمانی جیڈھ آنی سر ءَ مئے ھیال ءُ لیکہ یک اَنت ۔ آئی ءَ گوشت کہ 2027 ءَ بشکیک ءَ گلوبل کلائمیٹ سمٹ برجم دارگ بوھگ ءَ اِنت، ایشی ءِ تہ ءَ مزن وزیر شہباز شریف ءَ را وش آتک کنگ بیت۔ آئی ءَ گوشت کہ ما معیشت، بندرگاہ ءِ کارمردی، وانگ ءُ زانگ، کشت ءُ کشاری ءُ اے دگہ شوبگ آنی تہ ءَ کمک ءَ را دیمروئی دیگ ءِ واستہ منوگری ءُ تپاک نامہ آنی سر ءَ دستخط کتگ ۔ پاکستان کرغزستان ءِ دوست ءُ معتبریں شریک انت۔ مرچی دستخط کتگیں منوگری مئے الس ءِ سیت ءُ دوئیں ملک آنی نیام ءَ سیادی ءِ دیمروئی ءِ واستہ کمکار بنت۔