پروفیسر  احسن اقبال ءَ سنکیانگ یونیورسٹی ءُ قراقرام یونیورسٹی گلگت ءِ نیام ءَ اکیڈمک شراکت داری ءِ  شور ءُ  سلاھ

اُرمچی۔4دسمبر  (اے پی پی): منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ ارومی ءِ سنکیانگ یونیورسٹی ءِ تر ءُ تاب ءِ ساھت ءَ دوئیں ملک آنی سیمسر دمگ آنی تہ ءَ اکیڈمک کمک ءِ دیمروئی ءِ تجویز پیش کتگ۔ سینکیانگ یونیورسٹی ءَ سر بوھگ ءِ سر ءَ وفاقی وزیر ءَ را یونیورسٹی ءِ نائب صدر ءُ پاکستانی نودربر آنی نیمگ ءَ چہ وش آتک کنگ بوت۔ پروفیسر احسن اقبال ءَ وتی گشتانک ءِ تہ ءَ سنکیانگ  یونیورسٹی ءُ قراقرم انٹرنیشنل یونیورسٹی گلگت ءِ نیام ءَ باقاعدہ اکیڈمک ءُ پٹ ءُ پولی شریکداری ءِ جوڑ کنگ ءِ تجویز داتگ۔ اے ھمکاری ءِ مول ءُ مراد سینکیانگ ءُ گلگت بلتستان ءِ سیمسر ءِ دمگاں زانت، پٹ ءُ پول، نوکیں ٹیکنالوجی ءُ انسانی منابع ءِ دیمروئی اِنت۔ سینکیانگ یونیورسٹی ءِ نائب صدر ءَ اے تجویز ءِ سر ءَ تپاک کتگ ءُ یکجائی وانگ ءُ زانگ ءُ پٹ ءُ پولی پروگرام، فیکلٹی ءِ تبادلہ ءُ نودربر آنی پٹ ءُ پولی کمک ءِ واستہ آیوکیں وھد ءَ یکجائی فریم ورک ءِ جوڑ کنگ ءِ واھشت ءِ درشانی کتگ۔ وفاقی وزیر ءَ را یونیورسٹی ءِ راجدپتر، فیکلٹی ءِ صلاحیت، پٹ ءُ پولی کاروائی، صنعتی شریکداری ءُ راجی دیمروئی ءِ مول ءُ مراد ءِ رد ءَ پٹ ءُ پولی فنڈنگ ​​ماڈل ءِ بابت ءَ ھم سرجمیں بریفنگ دیگ بوتگ۔ بریفنگ ءِ وھد ءَ اے گپ ءِ ھال دیگ بوت کہ سنکیانگ  یونیورسٹی ءَ پٹ ءُ پولی فنڈنگ ​​ءِ مزنیں بھرے -40 درسد ءِ نزیک ءَ – صنعت ءَ چہ دیم پہ دیم کیت ، ایشی ءِ تہ ءَ رند ءِ پٹ ءُ پولی کمک سرکاری دیمروئی ءِ اولویتاں گوں بندوک اِنت ، ایشی ءَ چہ یک مھکمیں اکیڈمیا ءُ صنعت ءِ یکجاھی ءِ ماڈل ءِ درشانی کنگ بیت۔ پروفیسر احسن اقبال ءَ اے پٹ ءُ پولی ماڈل ءَ را پاکستان ءِ واستہ مثالی ماڈل لیک اتگ ءُ گوشت کہ دوئیں ملک آنی وانگ ءُ زانگ ءِ ادارگ آنی نیام ءَ جوانیں کمک نہ ایوک ءَ دمگ ءِ دیمروئی ءِ تہ ءَ ھاسیں کرد پیلو کنت بلکیں پاک چین دوستی ءِ نوکیں تک ءُ پہنات آناں ھم پدر کنت۔ اے دیمروئی ءَ چہ پاک چین ءِ سیمسر ءِ دمگاں وانگ ءُ زانگ ءِ کمک، پٹ ءُ پولی کمک ءُ ورنا آنی تعامل ءِ نوکیں دور ءِ بندات بیت۔