کرغزستان ءِ دری کارانی وزیر ءَ کمکار مزن وزیر اسحاق ڈار ءَ گوں گند ءُ نند کت، وت مہ وتی سیت ءِ جیڈھ، دمگی ءُ جھان ءِ دیمروئی ءِ جیڈھ آنی سر ءَ گپ ءُ تران

اسلام آباد۔3دسمبر  (اے پی پی): وزارت ءِ درئی کار ءَ نائب مزن وزیر ءُ درئی کارانی وزیر محمد اسحاق ڈار ءَ کرغزستان ءِ درئی کارانی وزیر زین بیک کلولو بائیوو  ءَ گوں گند ءُ نند کت۔ چار شمبے ءِ روچ ءَ دری کارانی کارگس ءِ نیمگ ءَ جاڑی بوتگیں بیان ءِ رد ءَ گند ءُ نند ءِ ساھت ءَ وزیر ءِ درئی کار ءَ کرغزستان ءِ صدر صادر ژپاروف  ءِ پاکستان ءِ تر ءُ تاب ءَ ھوالگ ءَ اقتصادی، سیاسی، توانائی، رابطہ، دود ءُ ربیدگی ءُ وانگ ءُ زانگ ءِ کمک ءَ ھوار پاک کرغزستان ءِ دو نیمگی سیادی ءِ توامیں تک آنی سر ءَ چار ءُ تپاسی کتگ۔ دوئیں نیمگ ءَ تر ءُ تاب ءِ ساھت ءَ دستخط کنگ بوھوکیں جتا جتائیں دو نیمگی معاہدہ آنی سر ءَ ھم چار ءُ تپاسی کنگ بوت۔ دری کارانی وزیر آں پاکستان ءُ کرغزستان دو نیمگی سیاسی مشاورت ءُ بین حکومتی کمیشن آنی باقاعدہ دیوان آنی برجم دارگ ءِ سر ءَ تپاک کت تانکہ دو نیمگی سیادی ءِ توانائی ءَ را سرجمی ءَ کارمرد کنگ بہ بیت۔ دوئیں بامرد آں وت مہ وتی اقتصادی کمک ءَ را گیش ودینگ ءِ سر ءَ تپاک کت ءُ اے گپ ءِ سر ءَ دل یکیمی کت کہ تر ءُ تاب ءِ ساھت ءَ کاروباری فورم ءِ ھم برجم دارگ بیت۔ دوئیں دری کارانی وزیر آں اے امیت ھم درشان کت کہ ٹرانزٹ ٹریڈ ایگریمنٹ ءِ زوتیں وھد ءَ آسر کنگ ءَ چہ 100 ملین امریکی ڈالر ءِ دو نیمگی تجارت ءِ ٹارگٹ ءِ سرجمی ءَ کمک رسیت۔ دوئیں نیمگاں کاسا 1000 منصوبگ ءِ وھد ءُ پاس ءِ سر ءَ جوانیں رنگ ءَ عمل کنگ ءِ واستہ وتی یکجائی عزم ءِ پدر کنگ بوت۔ ایشاں پاکستان ءُ کرغزستان ءِ نیام ءَ ایمن، پائیدار ءُ جتائیں رابطہ کاری ءِ ارزشت ءِ سر ءَ ھم زور پر دات تانکہ نہ ایوک ءَ دو نیمگی بلکن ءَ دمگی تجارت ءَ را گیش دیمروئی دیگ بہ بیت۔ نائب مزن وزیر ءُ دری کارانی وزیر اسحاق ڈار ءَ پاکستانی نودربر ءُ کارکن آنی میزبانی ءِ سر ءَ کرغزستان ءِ حکومت ءُ الس ءِ منت گپت ءُ مردم آنی نیام ءَ رابطہ آناں دیمروئی دیگ ءِ واستہ کمک ءَ را ادارگ جوڑ کنگ ءُ گیش کنگ ءِ سر ءَ تپاک کت۔ اسحاق ڈار ءَ جنوبی ایشیا ءِ امن ءُ ایمنی ءِ ھاترا ھترہ آنی سر ءَ چمشانک دیگ ءِ وھد ءَ دمگی ملک آنی نیمگ ءَ چہ تحمل ءُ ذمہ واریں رویہ ءِ سر ءَ زور پر دات۔ آئی ءَ اے گپ ءِ سر ءَ ھم زور پر دات کہ اقوام متحدہ ءِ سلامتی کونسل ءِ سیادی داروکیں قرارداد آنی رد ءَ جموں ءُ کشمیر ءِ جیڈھ ءِ پرامن گیواری جنوبی ایشیا ءَ دائمی امن ءِ واستہ المی اِنت۔ نائب مزن وزیر ءَ ناشرکاری ءِ ھوپ ءَ را گر ءُ دار کنگ ءُ پاکستان ءَ ھوار کجام ھم ملک ءِ ھلاپ ءَ اوگان سرزمین ءِ کارمرد کنگ ءِ گر ءُ دار ءِ واستہ گپ ءُ تران ءُ سفارتکاری ءِ ارزشت ءِ سر ءَ ھم زور پر دات۔ آئی ءَ وتی واھشت ءِ درشان کت کہ اوگانستان یک مھکمیں، دمگی یکجاھیں ملکے بہ بیت ءُ وتی اُلس ءُ ھمساھگ آنی گوما امن ءُ ایمنی بہ بیت۔ دوئیں دری کارانی وزیر آنی نیمگ ءَ اقوام متحدہ، شنگھائی کمکی گل، او آئی سی ءُ ایکو ءَ ھوار درستیں فورم آنی تہ ءَ نزیکیں کمک ءِ برجاہ دارگ ءِ سر ءَ تپاک کنگ بوت، تانکہ دمگ ءَ امن ءُ ایمنی ءِ ھوار دیمروئی ءُ وشھالی ءِ تہ ءَ دیمروئی کنگ بہ بیت۔