مزن وزیر شہباز شریف ءَ جائزہ ءِ دیوان ءَ گوں تران کنان ءَ راجی ٹیرف پالیسی یک آشوبی گامگیج ءِ سر ءَ عمل کنگ بیت کہ ملکی صنعتی پیداوار ءَ را جوانیں رنگ ءَ آسراتی بہ دنت

اسلام آباد۔3دسمبر  (اے پی پی): مزن وزیر محمد شہباز شریف ءَ بنجاھی پیداوار ءِ ھرچ ءُ درچ ءَ را کم کنگ ءِ واستہ جوانیں گامگیج چست کنگ ءِ ضلورت ءِ سر ءَ زور پر دات ءُ گوشت کہ حکومت ءِ نیمگ ءَ منظور بوتگیں راجی ٹیرف پالیسی یک آشوبی گامگیج اِنت۔ آئی ءَ اے ھیالانی درشانی چار شمبے ءِ روچ ءَ تجارتی شوبگ ءَ کسٹم ڈیوٹی ءُ ایندگر اصلاحات ءِ ھوالگ ءَ وتی چیئرمین شپ ءَ جوڑ بوتگیں ذیلی ورکنگ گروپ ءِ سفارش آنی سر ءَ چار ءُ تپاسی دیوان ءَ گوں تران کنان ءَ کت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ گوشت کہ ملکی صنعتی پیداوار ءُ تجارت ءِ تہ ءَ گیشی ءِ واستہ شعبہ ءِ ھوالگ ءَ سوج ءُ جیڈھ ناگزیر اَنت۔ آئی ءَ گوشت کہ دہائیاں چہ ایکسپورٹ ڈویلپمنٹ فنڈ ءَ را اقتصادی ءُ صنعتی پیداواری ءِ تہ ءَ گیشی ءِ واستہ پٹ ءُ پول ءُ تربیت ءِ سر ءَ کارمرد کنگ نہ بوتگ، ملکی برآمدات ءُ درآمدات ءِ شوبگ ءَ ماہرین آنی نیمگ ءَ چہ سفارشات ءُ اصلاحات ءِ تجویز راستی ءِ اعداد و شمار ءِ رد ءَ بہ بنت۔ آئی ءَ گوشت کہ دمگی صنعت ءُ تجارت ءُ دمگی آبادی ءِ واستہ صنعتی چیز آنی پیداواری ھرچ ءُ درچ ءَ را کم کنگ ءِ واستہ موثر گامگیج چست کنگ حکومت ءِ اولی ترجی آنی تہ ءَ ھوار اِنت۔ حکومت ءِ نیمگ ءَ منظور بوتگیں راجی ٹیرف پالیشی یک آشوبی گامگیج اِنت کہ ملک ءِ صنعتی پیداوار ءَ را گیش کنت ءُ کاروبار ءَ را بنجاہی ءُ جھان ءِ مارکیٹ آنی تہ ءَ مقابلہ ءِ لائک جوڑ کنت۔ مزن وزیر ءَ پنت ءُ شون کت کہ ایندگہ ملک آنی گوما دو نیمگی ءُ ٹرانزٹ تجارتی مصنوعات ءِ سیم سر ءَ کسٹم ڈیوٹی ءِ گرگ ءِ سر ءَ نزیکی ءَ گوں چار ءُ بچار کنگ بہ بیت۔ مزن وزیر ءَ را ورکنگ گل ءِ بریفنگ ءِ تہ ءَ گوشت بوت کہ برآمدات ءِ بنیات ءَ برجمیں اقتصادی دیمروئی ملک ءَ سرمایہ کاری ءُ پیداواری ءِ تہ ءَ گیشی، حکومتی رکھینگ ءُ بنیاتی ڈھانچگ ءِ گہتری ءِ گوما ایوک ءَ ممکن بوت کنت۔ محمد علی طبا ءُ ایندگر آں ملک ءِ نمائندہ کاروباری مردم آناں جوڑ بوتگیں ذیلی ورکنگ گروپ ءِ نیمگ ءَ مزن وزیر ءَ را کسٹم ءُ ٹیکس جم کنگ ءِ ھوالگ ءَ جیڈھ آنی بابت ءَ سرپد کت ءُ وتی سفارشات پیش کت۔ مزن وزیر ءَ اے سفارشات ءَ را وش اتک کت ءُ سیادی داروکیں وزارت ءُ ادارگ آناں ملک ءِ صنعتی پیداوار ءَ را گیش کنگ ءُ کاروباری مردم ءُ سرمایہ کار آناں ھمک رنگ ءِ آسراتی پجاری کنگ ءِ ھاترا ھاسیں پنت ءُ شون دات۔ مزن وزیر ء گوشت کہ گوستگیں راجی ٹیرف پالیشی ء ملک ءِ صنعتی پیداوار ء را جوانیں رنگ ء آسراتی دیگ ءِ ھاترا عمل درآمد کنگ بوتگ تانکہ برآمد ءُ درآمد ملک ءِ سرجمیں اقتصادی دیمروئی ءِ گوما ھمگرنچ بہ بنت۔ گند ءُ نند ءَ وفاقی وزیر ءِ ھزانگ محمد اورنگزیب، وفاقی وزیر ءِ اطلاعات ءُ شنگکاری عطا اللہ تارڑ، موسمیاتی بدلی ءِ وفاقی وزیر ڈاکٹر مصادق ملک، وفاقی وزیر بجلی سردار اویس احمد لغاری، وفاقی وزیر اقتصادی ڈویژن ءِ وفاقی وزیر علی خان پیترو چیما، مالیات اظہر بلال کیانی، مزن وزیر ءِ ھاسیں کمکار ہارون اختر، چیئرمین ایس آئی ایف سی، ملک ءِ صنعتی ءُ کاروباری ادارہانی نمائندگ ءُ دگہ سیادی داروکیں سرکاری کارندہ۔