ڈی 8 ءِ باسکیں ملکاں دمگی اقتصادی کمک ءَ را مھکم کنگ لوٹ ایت، وفاقی وزیر تجارت جام کمال خان

قاہرہ ۔3دسمبر  (اے پی پی): تجارت ءِ وفاقی وزیر جام کمال خان ءَ گوشت کہ ڈی 8 ءِ باسکیں ملک آناں دمگی اقتصادی کمک ءَ را مھکم کنگ لوٹ ایت، ترجیحی تجارتی معاہدہ ءَ را چالو کنگ لوٹ ایت ءُ ڈیجیٹل تجارت ءِ تہ ءَ پیداکیں موہ آناں وتی سرا زورگ لوٹ ایت۔ آئی ءَ اے ھیالانی درشانی چار شمبے ءِ روچ ءَ قاہرہ ءَ برجم داشتگیں ڈی 8 کونسل آف ٹریڈ منسٹرز ءِ چارمی دیوان ءَ گوں تران کنان ءَ کت۔ سیشن ءِ تہ ءَ وفاقی وزیر برائے تجارت جام کمال خان ءَ تنازعات ءِ گیواری ءِ میکانزم ءِ بابت ءَ ڈی 8 پروٹوکول ءِ سر ءَ ھم دستخط کت کہ اے تنظیم ءِ ادارگی مھکم کنگ ءِ نیمگ ءَ یک ھاسیں گامگیج اِنت۔ وتی گشتانک ءِ تہ ءَ وفاقی وزیر تجارت ءَ مصر ءِ حکومت ءُ وزیر تجارت حسن الخطیب ءِ منت گپت۔ آذربائیجان ءَ را ڈی 8 ءِ نوکیں ءُ 9می باسک ءِ رنگ ءَ وش اتک کنان ءَ اے امیت ءِ درشانی کت کہ ایشی ءِ ھوار بوھگ ءَ چہ تنظیم ءِ اجتماعی اقتصادی طاقت گیش بیت۔ جام کمال خان ءَ ڈی 8 ءِ وڑیں دمگی پلیٹ فارم آنی ضلورت ءِ سر ءَ زور پر دات کہ آ سپلائی چین ءِ تہ ءَ ھرابکاری، موسمیاتی بدلی ءُ شے ءِ مارکیٹ ءِ تہ ءَ نا وشھالی ءَ را یکجاھی ءَ گوں گیش ءُ گیوار بہ کن اَنت۔ جام کمال ءَ ڈی 8 ترجیحی تجارتی معاہدے ءِ مرکزی کرد ءَ را انٹرا ڈی 8 تجارت ءِ دیمروئی ءِ ھاتر ءَ المی لیک اتگ ءُ ایشی ءِ سرجمیں نپ ءِ کٹگ ءِ ھاتر ءَ ایشی ءِ موثر عمل درآمد ءَ را المی لیک اتگ۔ آئی ءَ پی ٹی اے ءَ را سرجمیں باسک آنی واستہ سرجمی ءَ کارآمد ءُ موثر جوڑ کنگ ءِ واستہ کارروائی آناں ھمگرنچ کنگ، آپریشنل چیلنج آناں گیواری ءُ دستاویزات ءَ را گیش ءُ گیوار کنگ ءِ واستہ پاکستان ءِ جزم ءِ سر ءَ زور پر دات۔ آئی ءَ گوشت کہ دمگی تجارت ءِ گنجائش آناں پچ کنگ ءِ واستہ کارآمدیں ٹرانسپورٹ راہداری، ڈیجیٹل یکجاھی، ءُ پیش گوئی ءِ ٹرانزٹ سسٹم المی انت ءُ پاکستان اے کوشست آنی تہ ءَ جوڑیشت ءِ واستہ تیار انت۔ جام کمال ءَ گوشت کہ فوڈ سیکیورٹی، ٹیکسٹائل، کشت ءُ کشاری، توانائی، ءُ ٹیکنالوجی ءِ جدت ءَ را اولیت ءِ رنگ ءَ ھوار کنگ بہ بیت کہ اودا یکجائی کمک ءَ چہ لچک ءُ دراجیں مدتی وشھالی ءَ را دیم ءَ برگ بوت کنت۔ آئی ءَ گیش گوشت کہ ڈی 8 ءِ تہ ءَ گنجائش سازی ءُ جوانیں کارروائی آنی بھر ءُ بانگ ءِ وسیلگ ءَ کمک ءِ واستہ یک مثال جوڑ بوھگ ءِ صلاحیت است اِنت۔ وفاقی وزیر ءَ باسکیں ملک آنی سر ءَ زور پر دات کہ آ ڈیجیٹل انفراسٹرکچر، ڈیجیٹل سواد ءُ سرحد ءِ سر ءَ ای کامرس پلیٹ فارم آنی تہ ءَ سرمایہ کاری بہ کن اَنت۔ آئی ءَ گوشت کہ پاکستان ڈی 8 ءِ شریک آنی گوما فن ٹیک، ڈیجیٹل ادائیگی ءُ نوآبادیاتی بنیات ءِ سر ءَ گامگیج آنی سر ءَ کار کنگ ءَ تیار اِنت۔ آئی ءَ یکجائی وشھالی ءُ دمگی یکوئی ءِ واستہ ڈی 8 ایجنڈا ءَ را دیم ءَ برگ ءِ واستہ پاکستان ءِ سرجمیں جزم ءِ سر ءَ زور پر دات۔ آئی ءَ گوشت کہ یکجاہ بوھگ ءَ گوں راستیں پالیشی ءُ شریکداری ءِ مھکمیں روح ءَ ما ڈی 8 ءِ دمگ ءَ را وتی سرجمیں راج ءِ واستہ تجارت، دیمروئی ءُ موہ آنی یک زندگیں مرکز ءِ رنگ ءَ بدل کن ایں ۔