دری کارانی کارگس ءِ جارکش مزن وزیر شہباز شریف ءِ دعوت ءِ رد ءَ جمہوریہ کرغزستان ءِ صدر مرچی ءَ چہ پاکستان ءِ دو روچی سرکاری تر ءُ تاب

اسلام آباد۔3دسمبر  (اے پی پی): مزن وزیر محمد شہباز شریف ءِ دعوت ءِ رد ءَ جمہوریہ کرغزستان ءِ صدر سادیر نور گوز جاپاروف چار شمبے ءِ روچ ءَ بگر داں 4 دسمبر ءَ پاکستان ءِ اولی سرکاری تر ءُ تاب ءَ کنت۔ ڈل ءِ سرا کار کنگ ءَ انت کہ ایشی ءِ تہا کابینہ ءِ مزنیں وزیر، مزنیں اگدہ دار ءُ کاروباری رہشون ھوار انت۔ جمہوریہ کرغزستان ءِ صدر ءِ تر ءُ تاب ءِ ساھت ءَ صدر ءِ مملکت ءَ گوں گند ءُ نند کنگ ءِ امیت انت، مزن وزیر ءَ گوں گند ءُ نند کنگ ءُ ڈل ءِ تک ءَ گپ ءُ تران کنگ ءِ امیت انت وھدیکہ آئی ءَ پاکستان ءُ کرغزستان بزنس فورم ءَ گوں تران کنگ ءِ امیت ہم انت۔ گپ ءُ تران ءِ ساھت ءَ دوئیں نیمگ ءَ دو نیمگی سیادی آنی سرجمیں سپیکٹرم ءِ چار ءُ تپاسی کنگ بیت ءُ تجارت، توانائی، دفاع، وانگ ءُ زانگ، مردم آنی نیام ءَ تبادلہ ءُ دمگی رابطہ ءَ ھوار جتا جتائیں شوبگ آنی تہ ءَ کمک ءَ را گیش گیش کنگ ءِ راہ آنی سر ءَ ھیال ءُ لیکہ کنگ بیت۔ یات دارگ بہ بیت کہ جمہوریہ کرغزستان ءِ صدر ءِ گڈی تر ءُ تاب جنوری 2005 ءَ بوتگ ات۔بیان ءِ رد ءَ اے تر ءُ تاب پاکستان ءُ جمہوریہ کرغزستان ءِ نیام ءَ براتی سیادی ءِ درشان انت کہ ایشی ءِ بُن ھشت یکجائی راجدپتر، ایمان ءُ میان استمانی ءُ جنوبی ایشیا ءَ امن ءُ وشھالی ءِ یکجائی واھشت آنی تہ ءَ انت۔ امیت انت کہ اے تر ءُ تاب ءَ چہ دو نیمگی کمک ءَ را نوکیں موہ رس ایت ءُ دمگی ءُ کثیر نیمگی فورم آنی تہ ءَ کمک ءَ را گیش مھکم کنگ بیت۔