سری لنکا ءِ صدرانورا کمارا ڈسانائیکے ءَ مزن وزیر محمد شہباز شریف ءَ گوں گند ءُ نند کتگ، مشکلیں وھد ءَ یکوئی ءُ دل ءِ جہلانکی ءَ کمک ءِ منت واری ءِ درشانی کتگ

اسلام آباد۔2دسمبر (اے پی پی): سری لنکا ءِ صدرانورا کمارا ڈسانائیکے ءَ مزن وزیر محمد شہباز شریف ءَ را فون کتگ ءُ مشکلیں وھد ءَ یکوئی ءُ دل ءِ جہلانکی ءَ کمک ءِ سرا آئی ءِ منت گپتگ۔ مزن وزیر کارگس ءِ میڈیا ونگ ءِ نیمگ ءَ چہ جاڑی بوتگیں بیان ءِ رد ءَ سری لنکا ءِ جمہوری سوشلسٹ ریپبلک ءِ صدر انورا کمارا دیسانایکے ءَ سئے شمبے ءِ روچ ءَ مزن وزیر محمد شہباز شریف ءَ گوں فون کتگ۔ مزن وزیر ئَ سری لنکا ئَ طوفان داتو ئِ سبب ئَ جانی تاوان ءُ مزنیں کساس ئَ تباہی ئِ سر ئَ دلپدردی ئِ درشان کت۔ مزن وزیر ءَ سری لنکا ءِ الس ءُ حکومت ءِ گوما دلی دلپدردی ءِ درشانی کت۔ آئی ءَ ھما ھاندان ءِ گوما ھمدردی ءِ درشانی کت کہ آھاں وتی نزیکیں مردم تباہ کنوکیں سیلاب ءُ زمین چنڈ ءَ چہ بیران بوتگ اَنت۔ مزن وزیر ءَ سداں گران بھائیں جان ءِ بیرانی ءُ جزیرہ ءَ ھزاراں مردم آنی بے لوگ بوھگ ءِ سر ءَ ھم دلپدردی ءِ درشان کت۔ مزن وزیر ءَ اے مشکلیں جاور آنی تہ ءَ کمکی کارروائی آنی تہ ءَ سری لنکا ءِ واکدار، اُرد ءُ ریسکیو ٹیم آنی ترندیں رنگ ءَ کمک ءِ ساڑاتگ۔ موسمی بدلی ءِ سبب ءَ بوتگیں آفت آنی رد ءَ پاکستان ءَ را بوتگیں تاوان آنی حوالہ ءَ آئی ءَ یک رندے پدا گوشت کہ پاکستان اے گران تریں جاور ھال آنی تہ ءَ سری لنکا ءِ گوما سرجمیں یکوئی ءِ تہ ءَ اوشتاتگ۔ مزن وزیر ءَ سری لنکا ءِ صدر ءَ را سرپد کت کہ پاکستان سری لنکا ءِ اُلس ءَ را اے قدرتی آفت ءِ سبب ءَ بوتگیں تباہی ءَ چہ گر ءُ چیل بوھگ ءِ واستہ کمک ءِ واستہ ترندیں انسانی کمک روان دیگ ءَ انت۔ بیان ءِ رد ءَ سری لنکا ءِ صدر ءَ اے گرانیں وھد ءَ سری لنکا ءِ راج ءِ گوما یکوئی ءِ درشان کنگ ءِ ھوار دل ءِ جہلانکی ءَ انسانی کمک پجاری کنگ ءِ سر ءَ مزن وزیر ءِ منت گپت۔ آئی ءَ اے گپ ءِ ساڑات کہ پاکستان طوفان ءِ پد ءَ کمکی آپریشن آنی تہ ءَ بھر زوری کنوکیں اولی ملک آنی تہ ءَ ھوار اِنت۔ دوئیں بامرد آں وتی گوستگیں گند ءُ نند آناں یات کنان ءَ توامیں شوبگ آنی تہ ءَ دو نیمگی کمک ءَ را گیش گیش کنگ ءِ واستہ یکجائی جزم ءِ ھم درشان کت۔