پاکستان ءَ سیل ءُ سواد ءِ بے دروریں موہ است انت، ملک ءِ جوانیں عکس ءَ را جھان ءِ تک ءَ پدر کنگ ءِ ضلورت انت، عطا اللہ تارڑ

اسلام آباد۔2دسمبر (اے پی پی): وفاقی وزیر اھوالکاری ءُ شنگ کاری عطا اللہ تارڑ ءَ پاکستان ءِ جہانی تک ءَ جوانیں عکس ءَ را پدر کنگ ءِ ضلورت ءِ سر ءَ زور پر دیان ءَ گوشت کہ پاکستان ءَ بے دروریں سیل ءُ سواد ءِ موہ است انت، پاکستان ءَ کوھنیں گندھرا تہذیب، نانگا پربت ءُ براڈ پیک ءِ وڑیں جوانیں جاگہ است انت، مئے کرا جوانیں کسہ است کہ دگنیا ءَ را گوش بداریناں۔ آئی ءَ اے گپ سئے شمبے ءِ روچ ءَ ڈسکور پاکستان ءِ نیمگ ءَ برجم داشتگیں ’’نیشنل ٹورزم ایوارڈز 2025‘‘ ءِ مراگش ءَ گوں تران کنان ءَ کت۔ وفاقی وزیر برائے اھوالکاری ءَ ڈسکور پاکستان ءِ سی ای او ڈاکٹر قیصر رفیق ءِ راجی سیل ءُ سواد ءِ دیمروئی ءِ ھاتر ءَ کوشست آنی سر ءَ دل ءِ جہلانکی ءَ چہ منت واری ءِ درشانی کنان ءَ گوشت کہ آ نزیک ءَ یک دہائی ءَ چہ درملک ءَ نشتگ، پمیشکا آ سرپد بیت کہ پاکستان ءِ بابت ءَ ردیں لیکہ ایوک ءَ اے وڑیں کوشست آنی وسیلگ ءَ دور کنگ بوت کن اَنت۔ آئی ءَ گوشت کہ یک رندے پاکستان ءَ دری سیل ءُ سواد کنوک کاینت پدا پدا کاینت۔ درملکی سیاح پاکستانی مہمان نوازی ءِ شائقین انت، مہمان نوازی مئے وشیں دود ءُ ربیدگ آنی بہر انت۔ آئی ءَ گوشت کہ اے پاکستان ءِ جوانیں امیج اِنت ایشی ءَ را گلوبل تک ءَ پیش کنگ ءِ ضلورت اِنت پرچا کہ پاکستان ءِ یک انفرادی کسہ ءِ است اِنت۔ وفاقی وزیر ءَ ملک ءِ جتا جتائیں جغرافیائی تب آنی سر ءَ دلگوشی کنان ءَ پاکستان ءَ را یک سرجمیں پیکج ءِ رنگ ءَ گوشت۔ رودراتکی دمگ آنی زیبائی ءِ نیمگ ءَ اشارہ کنان ءَ آئی ءَ گوشت کہ دگنیا ءِ 14 برزتریں کوہ آنی تہ ءَ پنچ کوہ ادا انت ایشانی تہ ءَ کے ٹو، ننگا پربت، گشر برومل اول ءُ دومی ءُ براڈ پیک ھوار انت۔ اے گپ ءَ ابید آئی ءَ ملام جبہ ءِ اسکی ءِ ڈھل ءِ ھم گپ جتگ۔ وفاقی وزیر ءَ شندور پولو فیسٹیول ءِ بابت ءَ گوشت کہ اے دگنیا ءِ برز تریں پولو گراؤنڈ ءِ سر ءَ سئے ھزار میٹر ءَ چہ گیش ءِ بُرزی ءَ برجم دارگ بیت۔ آئی ءَ گوشت کہ پاکستان قدرتی زیبائی ءَ ابید دود ءُ ربیدگی وارثی ءَ چہ ھم مالا مال اِنت، ادا گندھارا تہذیب است وھدیکہ سداں سال کوھنیں دود ءُ ربیدگ است انت کہ انگت ءَ کیلاش قبیلہ ءِ مردم وتی کنگ ءَ انت۔ وفاقی وزیر اھوالکاری ءَ سندھ ءُ بلوچستان ءُ چولستان ءِ صحرا آنی تہ ءَ سالانہ جیپ ریلی ءِ ذکر کنان ءَ ایشی ءَ را یک دلکشیں کھیڈ ءِ لیک اتگ۔ وفاقی وزیر ءَ گوشت کہ شمال ءِ بُرزیں برفانی کوہ بہ بنت، جنوب ءِ زرین صحرا بہ بنت یا گندھارا تہذیب، پاکستان ءَ سیل ءُ سواد ءِ بے دروریں موہ است انت۔ آئی ءَ گوشت کہ ڈسکور پاکستان ءَ نا ایوک ءَ سیل ءُ سواد ءِ بلکینگ ءَ پاکستان ءِ الس ءِ دلیری ءُ مہمان داری ءَ را برجا کنگ ءَ مزنیں راجی ازمت کتگ ۔ مزن وزیر شہباز شریف، صدر آصف علی زرداری ءُ فیلڈ مارشل سید عاصم منیر ءِ سروکی ءَ سفارتی کامیابی آنی وسیلگ ءَ مارا سک باز عزت ءُ شرپ زرتگ۔ وفاقی وزیر ءِ اھوالکاری ءَ وتی گشتانک ءِ گڈ ءَ ڈسکور پاکستان پلیٹ فارم ءَ را جھان ءِ تک ءَ سر کنگ ءِ واستہ یک کارگس ءِ جوڑ کنگ ءِ تجویز پیش کت ایشی ءِ تہ ءَ خیبر پختونخوا ءِ گورنر، سیل ءُ سواد ءِ ھوالگ ءَ مزن وزیر ءِ ھاسیں کمکار ءُ ڈسکور پاکستان ءِ سی ای او ھوار بنت۔ آئی ءَ گیش سوج دات کہ درملک ءَ پوسٹ بوتگیں درئی کارانی کارگس ءُ پریس اٹیچی چینل ءِ برانڈ ایمبیسڈر ءِ بستار ءَ کار بہ کن اَنت۔ وفاقی وزیر ءَ ڈسکور پاکستان ءَ را سرکاری ترغیب ءِ ھم پیشکش کت کہ آ انگریزی زبان ءِ چینل ءِ بندات ءَ بہ کنت تانکہ پاکستان ءِ جوانیں عکس ءَ را جھان ءِ پڑ ءَ جوانیں رنگ ءَ پیش دارگ بہ بیت۔