ھاسیں مردم مئے چاگرد ءِ یک ھاسیں، برجائیں ءُ شرپ مندیں بہرے، آھانی وت واجہی پہ پاکستان ءِ سرجمیں اقتصادی ءُ چاگردی دیمروئی ءَ المی  اِنت، سردار ایاز صادق

اسلام آباد۔2دسمبر  (اے پی پی): راجی اسمبلی ءِ اسپیکر سردار ایاز صادق ءَ گوشت کہ خاصیں مردم مئے چاگرد ءِ یک ھاسیں، فعال ءُ شرپ مندیں بہر انت۔ اگاں ھاسیں مردماں کمک، جوانیں آسراتی ءُ برابریں موہ دیگ بہ بنت گڈا آہانی تہا وانگ ءُ زانگ، ٹیکنالوجی، سول سروس، پبلک، بزنس ءُ سوشل سروسز ءَ ھوار ہر پڑ ءَ ملک ءِ نام ءَ نامدار کنگ ءِ سرجمیں صلاحیت است انت۔ آئی ءَ معذور آنی میاں اوستمانی روچ ءِ موہ ءَ وتی کلوہ ءِ تہ ءَ گوشت کہ اقوام متحدہ ءِ چیردستی ءَ برجم دارگ بوھوکیں اے روچ ھاسیں مردم آناں سرجمیں شمولیت، بااختیار کنگ، باوقاریں زندمان ءُ دیمروئی ءِ واستہ یک وڑیں موہ آناں راجی اولیت آنی بھر جوڑ کنگ ءِ جزم ءِ نوک کنگ اِنت۔ اسپیکر ءَ گوشت کہ وتی زانت، جزم ءُ مہارت ءِ باوجود پاکستان ءَ لاکھوں ھاسیں مردم آناں رسائی ءِ کمی، چاگرد ءِ نا ھمگامی ءِ آماچ انت ءُ مارا چاگردی رویہ آنی سبب ءَ جتا جتائیں چیلنج آنی آماچ انت۔ آئی ءَ سرکاری ءُ نجی ادارگ آنی تہ ءَ ھاسیں رنگ ءَ اہل مردم آنی واستہ ریزرو کتگیں کوٹہ آنی سر ءَ سکیں عملی کنگ، آھاں نوکری آنی تہ ءَ ھوار کنگ ءُ اقتصادی آجوئی ءِ دیمروئی ءَ را وھد ءِ ھاسیں لوٹ لیک اِت۔ سردار ایاز صادق ءَ گوشت کہ پاکستان اقوام متحدہ ءِ معذور آنی ھک آنی کنونشن ءِ سر ءَ دستخط کنوک اِنت ءُ اے میاں اوستمانی کنونشن ءِ چیر دستی ءَ ملک یک وڑیں ھک آنی رکھینگ، تبعیض ءِ ھلاسی ءُ دیمروئی ءِ واستہ یک وڑیں موہ پجاری ءِ واستہ جزم اِنت۔ آئی ءَ گوشت کہ پارلیمنٹ کانود سازی، موثر نگرانی ءُ پناہ گاہ آنی جوڑیشت ءِ وسیلگ ءَ ھاسیں مردم آنی ھک آنی رکھینگ ءِ تہ ءَ وتی سرگرمیں کرد ءَ پیلو کنگ ءَ اِنت۔ اسپیکر ءَ گیش گوشت کہ پاکستان ءِ پارلیمانی راجدپتر ءَ اولی رند ءَ عینیش پاکستان ءَ آئین ءِ بریل ورژن جوڑ کتگ ایشی ءَ چہ نادراھ آنی واستہ آئینہ ءِ سر ءَ براہ راست رسائی ءِ موہ رستگ۔ ھمے رنگ ءَ راجی اسمبلی ءِ ماڑی ءَ ریمپ ءُ ایندگر رسائی ءِ مراگش جوڑ کنگ بوتگ انت تانکہ آ ایوان ءَ آسان ءُ باوقاریں رسائی ءِ واھند بہ بنت۔ آئی ءَ گوشت کہ راجی ءُ میاں اوستمانی تک ءَ جتا جتائیں توانمندیں مردم آنی کامیابی اے گپ ءِ ثبوت انت کہ اگاں آھاں موہ ءُ موزوں آسراتی پجاری کنگ بہ بیت گڈا آ ھرچ پڑ ءَ جوانیں کارکردگی ءِ درشان کت کن انت۔ اسپیکر ءَ وانگ ءُ زانگ ءِ تہ ءَ گیشی، ٹیکنیکل ٹریننگ، ڈیٹا ٹیکنالوجی ءِ رسائی، جان سلامتی ءِ آسراتی ءُ معذوریں مردم آنی واستہ روزگار ءِ موہ آنی سر ءَ زور پر دات ءُ گوشت کہ اے گامگیج نہ ایوک ءَ آوانی وت واجہی ءِ واستہ بلکینگ ءَ پاکستان ءِ سرجمیں اقتصادی ءُ چاگردی دیمروئی ءِ واستہ ھم المی اَنت۔ قومی اسمبلی ءِ ڈپٹی اسپیکر سید غلام مصطفی شاہ ءَ وتی کلوہ ءِ تہا گوشت کہ معذوریں مردم آناں دیم ءَ اتکگیں جیڈھ آنی گیواری ءِ واستہ کانود سازی ءِ گوما چاگردی رویہ آنی تہ ءَ جوانیں بدلی، اندری آسراتی آنی پھجارینگ ءُ سیادی داروکیں ادارگ آنی ھمگام ءُ فعال کرد ءِ ضلورت اِنت۔ آئی ءَ گوشت کہ ھاسیں مردم آنی وشھالی، چاگردی شمولیت ءُ ھک آنی رکھینگ ءِ واستہ پارلیمنٹ ھمک رنگ ءِ گامگیج ءَ را برجاہ دار ایت۔