ترکی ءِ توانائی ءُ قدرتی وسیلگ ءِ وزیر الپرسلان بیریکتر  ءَ مزن وزیر شہباز شریف ءَ گوں گند ءُ نند کتگ، توانائی، پٹرولیم ءُ معدنیات ءَ ھوار جتا جتائیں شوبگ آنی تہ ءَ کمک ءَ را گیش وسعت دیگ ءِ پاکستان ءِ مھکمیں جزم ءِ  درشان

اسلام آباد۔2دسمبر  (اے پی پی): مزن وزیر محمد شہباز شریف ءَ پاکستان ءُ ترکی ءِ نیام ءَ دو نیمگی سیادی ءِ جوانیں رپک ءِ سر ءَ دل یکیمی ءِ درشان کت ءُ توانائی، پٹرولیم ءُ معدنیات ءَ ھوار جتا جتائیں شوبگ آنی تہ ءَ ترکی ءِ گوما کمک ءَ را گیش وسعت دیگ ءِ واستہ پاکستان ءِ مھکمیں جزم ءِ سر ءَ زور پر دات۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ سئے شمبے ءِ روچ ءَ مزن وزیر گس ءَ ترک توانائی ءُ قدرتی وسیلگ ءِ وزیر الپرسلان  بیریکتر  ءَ گوں گند ءُ نند کت۔ مزن وزیر ءَ پاکستان ءُ ترکی ءِ نیام ءَ راجدپتری ءُ براتی سیادی آنی سر ءَ زور پر دیان ءَ دوئیں ملک آنی نیام ءَ دو نیمگی سیادی آنی جوانیں رفتار ءِ سر ءَ دل یکیمی ءِ درشان کت ءُ ترکی ءِ گوما ھاسیں رنگ ءَ توان ءِ شوبگ ءَ کمک ءَ را گیش وسعت دیگ ءِ واستہ پاکستان ءِ مھکمیں جزم ءِ سر ءَ پدا زور دات۔ مزن وزیر ءَ پاکستان ءُ ترکی ءِ نیام ءَ توان، پٹرولیم ءُ معدنیات ءِ شوبگ ءَ کمک ءَ را گیش کنگ ءِ ارزشت ءِ سر ءَ زور پر دات۔ آئی ءَ اے گپ ءِ سر ءَ دل یکیمی ءِ درشان کت کہ ترک پٹرولیم ءَ تیل شوھازگ ءِ ھوالگ ءَ پاکستان ءَ آف شور ءُ آنشور چست ءُ ایر آنی تہ ءَ ھوار بوتگ، ایشی ءَ چہ توانائی ءِ شوبگ ءَ دو نیمگی کمک ءِ تہ ءَ یک ھاسیں سنگ میل ءِ انت۔ آئی ءَ ترک کمپنی آناں پاکستان ءِ توان ءِ مارکیٹ ءَ سرمایہ کاری ءَ را گیش کنگ ءِ ھم دعوت دات۔ مزن وزیر ءَ اے سال ءَ صدر رجب طیب اردوان ءِ گوما وتی بازیں گند ءُ نند آنی حوالہ ءَ گوشت کہ ترندی ءَ گوں بدل بوھوکیں دمگی ءُ جھان ءِ چاگرد ءِ درگت ءَ دوئیں نیمگ آنی نیام ءَ نزیکیں یکوئی ءَ را دل یکیمی کنگ ءِ ضلورت ءِ سر ءَ زور پر دات۔ بیان ءِ رد ءَ دوئیں نیمگ ءِ نیام ءَ اے گپ ءِ سر ءَ تپاک کنگ بوتگ کہ پاکستان ءَ چہ یک وزارتی ڈل زوت ترکی ءِ تر ءُ تاب ءَ کنت تانکہ دوئیں ملک آنی نیام ءَ ھاسیں رنگ ءَ توان ءُ بجلی ءِ شوبگ ءَ گیشیں کمک ءِ پٹ ءُ پول کنگ بہ بیت۔ گند ءُ نند ءَ نائب مزن وزیر ءُ درئی کارانی وزیر سینیٹر محمد اسحاق ڈار، پٹرولیم ءِ وزیر علی پرویز ملک، بجلی ءِ وزیر سردار اویس خان لغاری، دری کارانی باروا مزن وزیر ءِ ھاسیں کمکار سید طارق فاطمی ءُ حکومت ءِ مزنیں کارندہ آں ھم بھر زوری کت۔ دوئیں رہشوناں ترکی ءُ پاکستان ءِ نیام ءَ کان کنی ءِ شوبگ ءَ مفاہمت نامہ ءُ معاہدہ آنی تبادلہ ءِ ھم گندگ بوتگ۔ دوئیں ملک آنی نیام ءَ ڈیڈز آف اسائنمنٹ ءِ تبادلہ کنگ بوتگ – مشرقی آف شور انڈس سی، پٹرولیم ءِ رعایت ءِ معاہدہ زیارت نارتھ بلاک، پٹرولیم ءِ رعایت ءِ معاہدہ سکھپور دوم بلاک، ڈیپ ایف بلاک ای بلاک، ڈیپ ایف بلاک ءُ ڈیپ ایف بلاک۔