وزیر مملکت طلال چوہدری ءَ شمالی وزیرستان ءَ ناشرکاری اُرش ءِ سک باز مذمت کتگ

اسلام آباد۔2دسمبر  (اے پی پی): وزیر مملکت ءِ تہی کار طلال چوہدری ءَ شمالی وزیرستان ءَ یک دگہ ناشرکاری ءِ وئیل ءِ سک باز مذمت کتگ ءُ گوشتگ کہ اے بدبھتیں اُرش ءَ اسسٹنٹ کمشنر وزیرستان شھید بوتگ، وھدیکہ دگہ سرکاری کارندہ ءُ یک راہ گوزے ھم شھید بوتگ۔ وتی ویڈیو بیان ءِ تہ ءَ آئی ءَ گوشت کہ خوارج مُدام ھمساھگیں ملک ءَ چہ آھگ ءَ اَنت ءُ پاکستان ءَ ناشرکاری ءِ کار کنگ ءَ اَنت کہ مارا درستاں یکجائی ءَ ایشی ءَ را بند کنگی اِنت۔ ناشرکاری ءِ ھلاپ ءَ جنگ ایوک ءَ حکومت ءِ نہ انت بلکینگ ءَ سرجمیں راج ءِ ذمہ واری انت ءُ ہرکس ءَ وتی فرض پیلو کنگی انت ۔ طلال چوہدری ءَ بنجاھی وزیر خیبر پختونخوا ءَ گوں زھر ءَ جُست کُت کہ اسسٹنٹ کمشنر ءِ شھادت ءَ روگ المی اِنت یا اڈیالہ جیل ءَ آیگ گیشتر المی اِنت؟ آئی ءَ گوشت کہ استیں بنجاھی وزیر ءِ دور ءَ ناشرکاری ءِ بازیں وئیل بوتگ، بلے اے زانگ نہ بیت بنجاھی وزیر ءَ تسلیت ءِ درشان کنگ ءِ واستہ چنچو شھید آنی گورا تر ءُ تاب کتگ۔ آئی ءَ گوشت کہ مرچی اے پیسلہ کنگ المی بیت کہ ناشرکار آنی ھلاپ ءَ اوشتگ المی انت یا سیاسی سٹنٹ کنگ، شھید آنی گوما یکوئی ءِ درشان کنگ واجب انت یا بس زھرشانی ءُ دیوان آنی ڈرامہ انت۔ آئی ءَ اپسوز ءِ درشانی کت ءُ گوشت کہ انچوش سما بیت کہ صوبہ ءِ مستریں کارندہ ءَ ھچ جیڑہ نیست، اگاں چہ ھما افسر شھید کنگ بوھگ ءَ اَنت کہ آ مستقیم سر وزیر ءِ چیر دستی ءَ اَنت۔ وزیر مملکت ءَ گیش گوشت کہ بنجاھی وزیر سڑک آنی سر ءَ شپ گوازینگ ءُ سیاسی گوازی کنگ ءَ را ترجیح دیگ ءَ انت وھدیکہ صوبہ ناشرکاری ءِ آس ءَ سُچگ ءَ انت۔ آئی ءَ اے گپ ءِ پدرائی کت کہ کانود ءِ تہ ءَ داتگیں کارروائی ءِ رد ءَ ناشرکاری ءِ ھلاپ ءَ خیبر پختونخوا ءِ وسیلگ آناں کارمرد کنگ ءِ واستہ گامگیج چست کنگ بیت، ءُ آھاں سیاسی کار آنی تہ ءَ زوال کنگ ءِ موہ نہ دیگ بیت۔ گڈسرا آئی ءَ گوشت کہ ناشرکار آنی ھلاپ ءَ سکیں کارروائی ءُ الس ءِ رکھینگ حکومت ءِ اولی ترجی اِنت ءُ اے رد ءَ ھچ وڑیں لاپرواہی برداشت کنگ نہ بیت۔