پاکستان بجلی ءِ بہر ءُ بانگ ءِ کمپنیانی نجکاری ءِ ھاتر ءَ میاں اوستمانی نجی شعبہ ءِ سرمایہ کار آنی بھر زوری ءِ ودار ءَ اِنت، وفاقی وزیر سردار اویس احمد خان لغاری

اسلام آباد۔2دسمبر  (اے پی پی):توان ءِ وفاقی وزیر سردار اویس احمد خان لغاری ءَ گوشت کہ پاکستان بجلی ءِ بہر ءُ بانگ ءِ کمپنی آنی نجکاری ءِ واستہ بھروسہ مند ءُ تجربہ کاریں میاں اوستمانی نجی شوبگ ءِ سرمایہ کار آنی بھر زوری ءِ ودار ءَ اِنت، مزنیں تجربگ ءِ واھندیں ترک کمپنی آنی بھر زوری سک باز المی اِنت۔ آئی ءَ اے ھیالانی درشانی جمھوریہ ترکی ءِ توان ءُ قدرتی وسیلگ ءِ وزیر الفرسلان بیرکتر ءَ گوں سئے شمبے ءِ روچ ءَ ایوان ءِ تہ ءَ گند ءُ نند ءِ ساھت ءَ کت اَنت۔ وفاقی وزیر ءَ ترکی ءِ حکومت ءِ منت گپت کہ آئی ءَ پاکستانی توانائی ءِ ماہرین آناں ترکی ءِ بجلی ءِ نظام ءِ سر ءَ پٹ ءُ پول کنگ ءِ موہ داتگ کہ اے مزنیں کساس ءَ نجی شوبگ ءِ چیر دستی ءَ کار کنگ ءَ اِنت۔ آئی ءَ گوشت کہ پاکستان زوت سئے ڈی ایس سی او آناں نجکاری کنت ءُ سرمایہ کار آنی واستہ ایکسپریشن آف انٹرسٹ جاری کنگ ءِ واستہ تیار انت۔ سردار اویس لغاری ءَ ترکی ءِ ماڈل ءِ توسیپ کنان ءَ نجکاری ءِ عمل ءِ وھد ءَ دوئیں ملک آنی ادارگ ءُ افسر آنی نیام ءَ گیشیں کمک ءِ ضلورت ءِ سر ءَ زور پر دات۔ آئی ءَ خاص رنگ ءَ رعایتی ماڈل ءِ حوالہ داتگ کہ ترکی ءَ سوبمندیں رنگے ءَ ایشی ءِ سر ءَ عمل کتگ۔ وفاقی وزیر ءَ پاکستان ءِ توانائی ءِ ادارگ آنی انسانی وسائل ءِ تربیت ءِ تہ ءَ ترکی ءِ کمک ءِ ضلورت ءِ سر ءَ ھم زور پر دات۔ اے موہ ءِ سر ءَ سردار اویس لغاری ءَ وتی ترک ھمکار ءَ را بجلی ءِ شوبگ ءَ برجاھیں اصلاحات ءُ جتا جتائیں ادارگ آنی تہ ءَ استیں سرمایہ کاری ءِ موہ آنی بابت ءَ ھم سرپد کت۔ آئی ءَ گوشت کہ پاور ڈویژن ملک ءِ واستہ یکجاھیں توانائی منصوبگ ءِ سر ءَ کار کنگ ءَ اِنت ایشی ءِ تیاری ءَ ترکی ءِ کمک ءِ ضلورت اِنت ھاسیں رنگ ءَ ترکی ءَ را اے پڑ ءَ مزنیں تجربگ ھست۔ ترک توانائی ءِ وزیر ءَ گرمیں مہمانداری ءِ سر ءَ پاکستان ءِ منت گپت کنان ءَ گوشت کہ ترک سرمایہ کار پاکستان ءِ بجلی ءِ شوبگ ءِ نجکاری ءِ عمل ءَ را گوں دلگوشی ءَ چارگ ءَ اَنت ءُ آئی ءَ را اُمیت اِنت کہ ترک سرمایہ کار ایشی ءِ تہ ءَ جوانیں تک ءَ بھر زور اَنت۔ ترکی ءِ وزیر ءَ ترکی ءَ روڈ شوز ءِ برجم دارگ ءِ سرا تپاک کت ءُ اے مول ءُ مراد ءِ واستہ ترکی ءِ سرمایہ کاری فورم ءَ را کارمرد کنگ ءِ پیشکش کت ءُ سرجمیں رنگ ءَ کمک ءِ دل یکیمی دات۔ آئی ءَ گوشت کہ پاکستان ءِ توان ءِ مارکیٹ ترکی ءِ واستہ سک باز المی اِنت ءُ چیا کہ ترکی پیسر ءَ چہ پاکستان ءِ جتا جتائیں شوبگ ھاسیں رنگ ءَ معدنیات ءِ تہ ءَ مزنیں سرمایہ کار اِنت پمیشکا بجلی ءِ شوبگ ءَ ھم کمک ءِ سک باز گنجائش است اِنت۔