حکومت ءَ اسلام آباد ءَ جان سلامتی ءِ شوبگ ءَ را گہتر کنگ ءِ ھاتر ءَ اولویت ءِ بنیاد ءَ گامگیج زورگ ءِ جار جتگ، وزیر مملکت طلال چوہدری

اسلام آباد۔2دسمبر  (اے پی پی): حکومت ءَ اسلام آباد ءَ جان سلامتی ءِ شوبگ ءَ را گہتر کنگ ءِ واستہ اولویت ءِ بنیاد ءَ گامگیج زورگ ءِ جار جتگ۔ وزیر مملکت داخلہ طلال چوہدری ءَ سئے شمبے ءِ روچ ءَ راجی اسمبلی ءَ گوں تران کنان ءَ گوشت کہ حکومت جان سلامتی ءِ شوبگ ءَ را نوکیں لیکہ آنی سر ءَ دیمروئی دیگ ءِ واستہ بازیں گامگیج کنگ ءَ اِنت۔ آئی ءَ گوشت کہ اسلام آباد ءِ اسپتال نہ ایوک ءَ شہر ءِ دمگی نادراھ آناں بلکینگ ءَ خیبر پختونخوا، آزات جموں کشمیر ءُ تاں اوگانستان ءَ چہ آیوکیں نادراھ آناں ھم ازمت دیگ ءَ اَنت، ایشی ءِ سبب ءَ اسپتال آنی سر ءَ نادراھ آنی دباؤ گیش بوھگ ءَ اِنت ءُ آسراتی پجاری ءِ رد ءَ چیلنج آنی دیمپان بوھگ ءَ اِنت۔ وزیر مملکت ءَ گیش گوشت کہ اے جاور ھال ءَ را ھیال ءَ دارگ ءَ حکومت ہسپتال آنی تہ ءَ میڈیکل سٹاف ءِ تہ ءَ گیشی کنگ، نوکیں میڈیکل سامان آنی پجاری ءُ انفراسٹرکچر ءَ را اپ گریڈ کنگ ءِ سر ءَ کار کنگ ءَ اِنت۔ اے گامگیج آنی مول ءُ مراد نہ ایوک ءَ نادراہ آنی الاج ءِ گہتر کنگ اِنت بلکیں نادراھجاہ آنی انتظامی ڈھانچہ ءِ مھکم کنگ اِنت۔ آئی ءَ گوشت کہ اسلام آباد ءِ نادراھجاھ آنی تہ ءَ آیوکیں نادراہ آنی تہ ءَ مدام گیشی بوھگ ءَ اِنت، حکومت اے گیش بوھوکیں زور ءَ گوں گر ءُ چیل بوھگ ءِ واستہ ایمرجنسی گامگیج آنی سر ءَ منصوبگ بندی کنگ ءَ اِنت۔