نواز شریف ءُ شہید بے نظیر بھٹو ءَ ملک ءِ ھاتر ءَ جمہوریت ءِ منشور ءِ سرا دستخط کتگ، ما پی ٹی آئی ءِ دور ءِ تلوسک ءَ برداشت کتگ، جیل ءَ گند ءُ نند پہ سازشاں نہ انت بلکیں قانونی معاملہانی ھاتر ءَ انت، ناجائزیں لوٹ کدی پیلو نہ بنت، عطا اللہ تراڑ

اسلام آباد۔ یکم دسمبر (اے پی پی): وفاقی وزیر ءِ اھوالکاری ءُ شنگکاری عطا اللہ تراڑ ءَ گوشت کہ مسلم لیگ ءِ سروک محمد نواز شریف ءُ شھید بے نظیر بھٹو ءَ ملک ءِ واستہ جمہوریت ءِ منشور ءِ سر ءَ دستخط کتگ، ایشی ءَ پد سیاسی عمل بحال بوتگ، ما پی ٹی آئی ءِ دور ءِ تلخی ءَ برداشت کتگ، ملک ءِ ھلاپ ءِ واستہ دیوان نہ اِنت۔ معاملہ، غیر قانونی لوٹ کدی پیلو نہ بنت۔ دوشمبے ءِ روچ ءَ ادا راجی اسمبلی ءَ تران کنان ءَ وفاقی وزیر ءِ اھوالکاری ءَ گوشت کہ پی ٹی آئی ءِ سروک علی محمد خان ءِ پٹ ءُ پول جوان اِنت، ما آئی ءِ گشتانکاں چہ بازیں چیزے دربرتگ کہ پارلیمانی عمل ءَ را چوں دیم ءَ برگ بہ بیت، آئی ءِ سینگ ءِ سر ءَ انگت ءَ پاکستان ءِ بیرک اِنت، آئی ءِ ارزشت سک باز اِنت بلے اے گچینی یات پرچا اِنت؟ علی محمد خان ءَ جیل ءَ دیوان ءِ ذکر کتگ بلے پرچا نہ گشتگ کہ آئی ءِ سروک درملک ءَ اوشتاتگ اتنت ءُ گشگ ءَ اتنت کہ من آہانی اے سی ءَ ایر کناں، من شاہد خاقان عباسی ءَ جیل ءَ بند کناں۔ عطا اللہ تراڑ ءَ علی محمد خان ءِ وانگ ءِ شعر ءِ پسو ءَ یک شعرے ونت کہ ” اے وھد ءَ کئے ءِ فضل ھراب بوتگ ات، کئے ھُدا ءِ لہجہ ءَ گپ ءَ ات؟” آئی ئَ گوشت کہ چادر ئُُ سیمسر دیوال ئِ تقدس لگتمال کنگ ئِ روایت ھم وتی دور ئَ دیما آرگ بوتگ۔ آئی ءَ گوشت کہ مئے پیپلز پارٹی ءِ گوما سیاسی تلخی بوتگ، بلے ایشی ءِ باوجود محمد نواز شریف ءُُ شہید محترمہ بے نظیر بھٹو ءَ یکجائی ءَ جمہوریت ءِ منشور ءِ سر ءَ دستخط کتگ، ایشی ءِ آسر ءَ ملک ءَ جمہوری عمل بحال بوتگ۔ وفاقی اھوالکاری ءِ وزیر ءَ گوشت کہ ما تحریک انصاف ءِ دور ءِ تلخی برداشت کتگ، کئے ءَ گشتگ ات کہ فلانی ءِ گھار ءُ جنک ءَ دزگیر کن ات ءُ جیل ءَ بند کن ات۔ سہب ءُ شام ءَ دزگیریں مردمانی لسٹ کئے ءَ جُست کُتگ اَنت؟ اے ہما مردم اتنت کہ بار بار جیل ءِ انتظامیہ ءَ جست کتگ ات کہ ورگ است انت یا دوا ءُ درمان نیست انت۔ آئی ءَ گوشت کہ بدنامیں شھزاد اکبر مرچی ادا نیست، ما ھما وھد ءَ ھم گْوشگ ءَ اِتیں کہ چشیں مردماں سیاسی چاگرد ءَ سکیں تلخی یے پیداک کتگ ءُ اے مردم اولی رند ءَ ملک ءَ چہ درکپ اَنت وھدے کہ دگہ مردماں گرانیں جاور برداشت کنگی اَنت ءُ مرچی اے گپ راست ثابت بوھگ ءَ اِنت۔ وفاقی وزیر ءِ اھوالکاری ءَ گوشت کہ وھدے اے مردم تلخی ءِ شور کنگ ءَ اتنت ءُُ پارلیمنٹ ءِ ادارگ ءِ سر ءَ اُرش کنگ ءَ اتنت گڈا سرجمیں اپوزیشن جیل آنی تہ ءَ بند کنگ بوتگ وھدیکہ مزن وزیر گس ءِ تہ ءَ ھمک روچ دیوان برجم دارگ بوتگ انت۔ آئی ءَ گوشت کہ جیل ءَ گند ءُ نند ءِ مول ءُ مراد کانود ءِ شور ءُ سلاہ کنگ انت، نہ کہ پاکستانی فوج ءِ ھلاپ ءَ گپ جنوکاں تھپڑ جنگ انت ءُ نہ ھندی ٹی وی چینل آنی سر ءَ ملک ءِ ادارگ آناں بدنام کنگ انت ۔ جیل ءَ گند ءُ نند شہیدانی مسخرہ کنگ نہ انت یا فوج ءُ راجی سلامتی ءِ ادارہانی حلاف ءَ سوشل میڈیا ءِ سرا کمپین ءِ بندات کنگ نہ انت۔ آئی ءَ گوشت کہ جیل ءَ دیوان ءِ واستہ دستی کتاب است انت پمیشکا ناجائزیں لوٹ کدی پیلو نہ بیت۔