وزیر خزانہ سینیٹر محمد اورنگزیب ءَ آئی ایم ایف ءِ رپورٹ ءِ شنگ کنگ ءِ بند کنگ ءِ تاثر رد کتگ

یکم دسمبر (اے پی پی): وزیر خزانہ سینیٹر محمد اورنگزیب ءَ سینیٹ ءِ تہا اے تاثر ءَ را سک رد کتگ کہ حکومت ءَ آئی ایم ایف ءِ گورننس ءُُ کرپشن ءِ تشخیصی رپورٹ ءِ شنگ کنگ ءَ دیر کتگ یا بند کنگ ءِ کوشست کتگ۔ آئی ءَ گوشت کہ رپورٹ ءِ شنگ کنگ ءَ چہ پیسر یک سرجمیں چار ءُُ تپاسی ءِ کنگ بوتگ ایشی ءِ تہ ءَ مزنیں کساس ءَ شور ءُ سلاھ ھوار بوتگ۔ دو شمبے ءِ روچ ءَ ایوان ءِ بالائی دیوان ءَ سینیٹر کامران مرتضی ءِ نیمگ ءَ پیش کتگیں تحریک ءِ سر ءَ بحث ءِ آسر کنان ءَ وزیر ءِ ھزانگ ءَ ایوان ءَ گوشت کہ آئی ایم ایف ءِ رپورٹ ءَ کرپشن ءَ را دیمروئی ءِ تہ ءَ مزنیں رکاوٹ لیک اتگ بلے شنگ کنگ ءِ تہ ءَ دیر کنگ ءِ دعویٰ غیر منطقی انت۔ آئی ءَ گوشت کہ من پرائیویٹ سیکٹر ءَ چہ کایاں، وھدے کہ رپورٹ جاری کنگ بیت گڑا آ سیادی داروکیں ادارگ آناں روان دیگ بیت، فیڈ بیک زورگ بیت، لھتیں نکات ھوار کنگ بنت ءُُ لھتیں نکات رد کنگ بنت، اے کار ءَ ھم دو ءُُ دو ءُُ نیم ماہ لگ ایت، ادا ھم ھمے کارروائی ءِ سرا عمل کنگ بوتگ، رپورٹ ءِ شنگ کنگ ءَ پد 100 ءِ کساس ءَ دیوان کنگ بوتگ ءُُ 2019 ءَ 30 ءِ رد ءَ ڈیولیشن کنگ بوتگ۔ آئی ءَ اے گپ ءِ پدرائی کت کہ حکومت ءَ سرجمیں عمل ءِ تہ ءَ سرجمیں آسراتی داتگ ءُُ رپورٹ ءِ شنگ نہ کنگ ءِ ھچ وڑیں سبب نیست۔ وزیر ءِ ھزانگ ءَ گوشت کہ حکومت جتاجتائیں سسٹم آناں ڈیجیٹلائزیشن ءِ سر ءَ کار کنگ ءَ انت تانکہ انسانی مداخلت ءَ دور کنگ ءَ چہ لیکیج ءَ را کم کنگ ءُُ کرپشن ءِ گر ءُُ دار کنگ بہ بیت۔ انچو کہ انسانی عمل کم بنت، کرپشن ھم کم بیت۔ آئی ءَ گوشت کہ گورننس ءِ تہ ءَ گہتری، آئی ءَ تکنیکی وزارت آنی گنجائش ءُُ افسر آنی پگار ءِ ڈھانچہ ءِ ھوالگ ءَ نکات آنی حمایت کت ءُُ گوشت کہ اے جیڈھ سول سروس ریفارم کمیٹی ءِ سروکی ءَ انت کہ ایشی ءِ سروکی ءَ منصوبگ بندی ءِ وزیر احسن اقبال انت وھدیکہ آ وت ایشی ءِ باسک انت۔ وزیر ءِ ھزانگ ءَ ٹیکس اصلاحات ءِ ھوالگ ءَ بریفنگ ءِ تجویز ءِ حمایت کنان ءَ گوشت کہ ایوان ءِ لوٹ ءِ سر ءَ چیئرمین ایف بی آر مردم، کارروائی، ٹیکنالوجی ءُ بدلی ءِ ھوالگ ءَ سرجمیں پریزنٹیشن دات کنت، ایشی ءَ پیسر ءَ چہ سفارتخانہ، پاکستان بزنس کونسل، اوورسیز پاکستانی ءُُ دیمروئی شریک آناں دیگ بوتگ۔ آئی ءَ گیش گوشت کہ مزن وزیر شہباز شریف ’’کیش لیس ءُُ ڈیجیٹل پاکستان‘‘ ءِ وژن ءِ سر ءَ ذاتی رنگ ءَ نگرانی کنگ ءَ اِنت ایشی ءِ واستہ دسمبر 2025، جون 2026 ءُُ دسمبر 2026 ءِ ھاسیں ٹائم لائن جوڑ کنگ بوتگ ءُ حکومت وتی لوٹ ءِ رد ءَ ایوان ءَ را پیشرفت ءِ بابت ءَ سرپد کنت۔ سینیٹر جام صفیہ اللہ خان ءُ محمد عبدالقدیر ءَ ھم گپ ءُ تران ءِ تہ ءَ بھر زرتگ ءُ گورننس ءِ کوتاہی، ٹیکس انتظامی ءِ تہ ءَ نزوری ءُ ادارگی اصلاحات ءِ زوتیں لوٹ ءِ سر ءَ زور پر داتگ۔ پارلیمنٹ ءِ باسک آنی اے گپ ءِ سر ءَ تپاک کت کہ کرپشن ءِ ھلاسی ءُ گورننس ءِ مھکم کنگ الس ءِ بھروسہ ءِ بحالی ءُ پاکستان ءِ اقتصادی رھبند ءِ برجائی ءِ واستہ المی اِنت۔