بیرسٹر گوہر علی خان ءِ گشتانک ءِ سرا اسپیکر قومی اسمبلی سردار ایاز صادق ءِ پسو

اسلام آباد۔ یکم دسمبر (اے پی پی): راجی اسمبلی ءِ اسپیکر سردار ایاز صادق ءَ گشتگ کہ پارلیمنٹ ءِ درستیں باسک سک شر زان انت کہ منی دروازگ مدام پچ انت، منی کتگیں کوشست درستانی دیم ءَ انت ءُ کس ءَ چہ چیر نہ انت۔ راجی اسمبلی ءِ دیوان ءَ باسک راجی اسمبلی ءِ بیرسٹر گوہر علی خان ءِ گشتانک ءِ سر ءَ رد عمل پیش کنان ءَ سپیکر راجی اسمبلی ءَ گوشت کہ مزن وزیر، وزیر کانود ءُُ من باز رند ءَ اے گپ پدر کتگ کہ جیڈھ دیم پہ دیم ءِ وسیلگ ءَ نہ بلکیں گپ ءُُ تران ءِ وسیلگ ءَ گیش ءُُ گیوار کنگ بنت۔ آئی ءَ گوشت کہ شما گوں من ءَ مہر ءُُ شرپ ءَ گوں گپ بہ کن اِت، من ءَ ہچ جنجال نیست، من وتی آئینی ءُُ پارلیمانی ذمہ واری ءَ پیلو کنگ ءَ آں۔ اسپیکر راجی اسمبلی ءَ گشتگ کہ اگاں کسے گشیت کہ ما مہلوک ءَ پارلیمنٹ ءِ سرا اُرش کنگ ءَ آرگ ءَ ایں گڈا آ بہ کنت ءُ بہ چاریت بلے من اے لہجہ ءَ ہچ رنگ ءَ قبول نہ کناں۔ پارلیمنٹ الس ءِ گس انت ایشی ءِ عزت ءُ شرپ ءِ رکھینگ ہر مول ءُ مراد ءَ کنگ بیت۔ سردار ایاز صادق ءَ گیش گشت کہ من ہما روچ ءَ تئی سروک ءَ گپ ءُ تران ءِ پیشکش کتگ ات بلے آئی ءَ گشتگ ات کہ ما گوں ہندوستان ءُ اوگانستان ءَ گپ بہ کنیں گوں تو نہ۔ اے گپ ءِ باوجود من ترا مائیک دات۔ تو وت گُشت کہ ما گپ کنگ لوٹ ایں۔ من ترا وتی چیمبر ءَ دعوت داتگ ات۔ منی کرد منفی ات؟ تاں سرکار من شمئے دیم ءَ نشت کہ گپ ءُ تران دیم ءَ بہ روت۔ پارلیمنٹ سیاسی گپ ءُ تران ءِ گس انت کہ اودا ہرچ تپاوتے قانون ءُ آئین ءِ تہا گیش ءُ گیوار کنگ بیت۔