موسمیاتی بدلی و آبادی ٹی ودکی کون آ دمدستی و اہم چیلنج آتا مون ءِ توننگ المی ءِ، بنجائی وزیر خزانہ سینیٹر محمد اورنگزیب

اسلام آباد۔ 01 دسمبر (اے پی پی) بنجائی وزیر خزانہ سینیٹر محمد اورنگزیب پارینے کہ ملک انا حقی اقتصادی لائخی ءِ کاریم اٹ اتنگ کن موسمیاتی بدلی و آبادی ٹی ودکی کون آ دمدستی و اہم چیلنج آتا مون ءِ توننگ المی ءِ۔ اوداہیت ءِ دوشنبے نادے آ ’’پاکستان پاپولیشن سمٹ 2025‘‘ آن تران اٹی پارے۔ وزیرخزانہ داوخت آ وسیلہ غاتا اولیتی بنداو تیا دُوارہ بشخنگ نا گرج آ ہم زور شاغا، تانکہ ہمو بشخ ہرافتے غٹ آن زیات دمدستی چکار نا گرج ءِ، اوفتے ٹی زرکاری و گام گیج آتے اولیت تننگ مرے۔ اوپارے کہ قومی مالیاتی کمیشن (این ایف سی )ایوارڈ آ مروک آ آخبت مذاکرات امنائی سلاہ نا کمک اٹ طے مریک غٹ فریق آتا فائدہ غاتا توازن برقرار سلے۔ سینیٹر محمد اورنگزیب پارے کہ کنٹری پارٹنر شپ پروگرام نا رداٹ ایشیائی شونداری بینک بروک آ دہ سال آتیٹی ہرسال اِرا ارب ڈالر فراوان کیک۔ اوپارے کہ داپروگرام نا شش اہم ایجنڈاآئٹم تیان چار، موسمیاتی بدلی و آبادی کون آ ملکی اہم ویل آتیا چکار ءِ۔ اوپارے کہ حکومت نا زمواری ءِ کہ داوڑنا ڈٹ و گام گیج تیار کننگے ہرا دا چیلنج آتون مون تننگ اٹ گچین پک مریر۔ وزیرخزانہ مستی پارے کہ پاکستان زوت تینا اولیکو اسکلز امپیکٹ بانڈ نا بناءِ کیک، ہرانا مسخت ورناتا مہارت آتے گچین کننگ و اوفتے ملکی شونداری ٹی فعال کڑد ادا کننگ کن قابل کننگ ءِ۔ اوپارے کہ ورناتے پوسکن مہارت آتیان شپ کننگ ملک انا زرگزرانی شونداری کن بے کچ المی ءِ۔ اوداوخت آ پارے کہ ننے دمدستی و گچین گام گیج کننگ نا گرج ءِ تانکہ موسمیاتی و آبادی نا ودوک آ زور اتون مون تننگ مرے و ملک انا حقی اقتصادی لائخی ءِ کاریم اٹ اتنگ مرے۔ پاکستان پاپولیشن سمٹ 2025 اٹی چندی حکومتی محکمہ، چاہندار، شونداری ادارہ و سول سوسائٹی نا نمائندہ غاک ہم بشخ ہلکر۔ ہراڑے آبادی ، جان جوڑی، تعلیم و غذائیت نا بشخ آتیٹی مربوط حکمت عملی آ گپ وتران کننگا۔