بنجائی وزیر پیٹرولیم علی پرویز ملک تون ترک ڈل انا اوڑدہی ، توانائی، پیٹرولیم و معدنی بشخ آتیٹی ودوک آ تین پہ تینی کمکاری نا جاچ ءِ ہلنگا

اسلام آباد۔ 01 دسمبر (اے پی پی) بنجائی وزیر پیٹرولیم علی پرویز ملک پارینے کہ ترک ڈل انا دورہ توانائی و معدنیات نا بشخ آتیٹی ہڑتوم آ کنڈآتا کمکاری ءِ پوسکن ءُ سمت اس تننگ اٹ اہم کڑد ادا کیک۔ داخیال آتا درشانی ءِ او دوشنبے نادے آ داڑے جمہوریہ ترکیہ نا سفیر عرفان نذیر اوغلو تون اوڑدہی ٹی کرے۔ اوڑدہی ٹی ترکیہ نا وزیر توانائی و قدرتی وسیلہ الپ ارسلان بائر اکتارنا کماشی ٹی پاکستان بروک آ بڑزکو کہولی ترک ڈل اناتیاری تے گڈیکو دروشم اس تننگا۔ داوخت آ سیکرٹری پیٹرولیم مومن آغا و ایم ڈی او جی ڈی سی ایل احمد حیات لک ئسک ہم ساڑی ئسر۔ وزیر پیٹرولیم علی پرویز ملک پارے کہ نن ترکیہ نا وزیر و اونا ٹیم انا پاکستان اٹ بیابخیری نا چاری اُن۔ اوڑدہی ٹی توانائی، پیٹرولیم ومعدنی بشخ آتیٹی پاکستان و ترکی نا ودوک آ کمکاری نا جاچ ءِ ہلنگا۔ داہیت آ است جمی نا درشانی ءِ کننگا کہ ترکش پیٹرولیم پاکستان اٹی آف شور و آن شور ایکسپلوریشن سرجزآتیٹی شمولیت اختیار کرینے، ہراکہ ہڑتوم آ کنڈآتا توانائی کمکاری ٹی اسہ اہم ءُ مزل نا نشان اسے۔ ترکیہ نا سفیر پارے کہ ترکی نا اسہ نمان معدنیاتی کمپنی اس ہم پگہ بروک آ ڈل انا بشخ مریک، ہرا پاکستان نا معدنی شونداری بشخ آتیٹی ترکی نا بھا ز است خواہی نا ڈیک ءِ۔ وزیرعلی پرویز ملک داپیش رفت انا ستاءِ کرسا پارے کہ پاکستان نا سرکڑدہ ایکسپلوریشن کمپنی  او جی ڈی سی ایل ، پی پی ایل و ماڑی انرجیز ترکش پیٹرولیم (ٹی پی اے او) تون شمولیت اختیار کرینو، ہرااسیجائی ڈٹ آتیکن پوسکن وارخواہی و جہانی کہول آ کمکاری ءِ سوگو کننگ ءُ۔ سفیر عرفان نزیر اوغلو پاکستا ن تون شویداری نا عزم انا درشانی ءِ کرسا پارے کہ ہڑتوم آ ایلم ملک آتا نیام اٹ کمکاری نا بے شمار روشنا گمان ساڑی ءِ۔ اوپارے کہ ترکیہ نا ڈل انا دورہ پاکستان ہڑتوم آملک آتا نیام اٹ رابطہ غاتے پین سوگو و گہرا کیک۔ ہڑتوم آ راہشونک دورہ نا سرسہب اڈتننگ ءِ پک کننگ و تین پہ تینی خیرخواہی ءِ گچین اقتصادی و تزویراتی شریداری ٹی بدل کننگ نا عزم انا درشانی ءِ کریر۔