آبادی ءِ تہ ءَ گیشی معیشت ءِ سر ءَ زور دیگ ءَ اِنت ، وھدے کہ گیش بوھوکیں آبادی پاکستان ءِ دراجیں مدتی اقتصادی استحکام ءِ واستہ ھترہ اِنت ، وفاقی وزیراں آبادی ءِ سروک دیوان ءَ گوں تران کنان ءَ  گشتانک

اسلام آباد۔1دسمبر  (اے پی پی): وفاقی وزیراں گوشت کہ آبادی ءِ گیشی ءَ چہ معیشت ءِ سر ءَ زور دیگ بوھگ ءَ اِنت، وھدے کہ گیش بوھوکیں آبادی پاکستان ءِ دراجیں مدتی اقتصادی برجائی ءِ واستہ ھترہ اِنت۔ ایشاں اے جیڈھ آنی درشانی ادا آبادی ءِ سروک دیوان ءَ گوں تران کنان ءَ کت۔ وفاقی وزیر، میاں اوستمانی نمائندگ ءُ ماہرین ءَ آبادی ءِ بے لگامیں گیشی ءَ را پاکستان ءِ دیم ءَ مزنیں چیلنج آنی تہ ءَ یکے لیک اتگ۔ آبادی ءِ سروک دیوان ءَ آبادی، معیشت، موسمیاتی بدلی ءُ انسانی دیمروئی ءِ ھوالگ ءَ ھاسیں نکات آنی سر ءَ گوں تفصیل ءَ گپ ءُ تران کنگ بوتگ۔ اے موہ ءِ سر ءَ واجہ شرلی رحمان ءَ وتی کلوہ ءِ تہ ءَ گوشت کہ آبادی ءِ جیڈھ پاکستان ءِ آیوکیں باندات ءَ گوں بندوک اِنت۔ آئی ءَ گوشت کہ ملک ءَ آبادی ءِ تہ ءَ تیزی ءَ گوں گیشی بوھگ ءَ اِنت وھدیکہ آپ ءِ ورگ ءُ بنیاتی ڈھانچگ ءِ سک باز کمی اِنت۔ آئی ءَ گوشت کہ ما چارگی اِنت کہ چنچو زھگ چہ گریبی ءُ وانگ ءُ زانگ ءَ زبھر اَنت۔ ش. رحمان ءَ گوشت کہ ھمک سال یک ءُ نیم ملین نوکیں روزگار ءِ ضلورت انت وھدیکہ آبادی ءِ گیشی ءَ چہ معیشت ءِ سر ءَ دباؤ گیش بوھگ ءَ انت۔ منصوبہ بندی ءُ دیمروئی ءِ وفاقی وزیر احسن اقبال ءَ ویڈیو لنک ءِ وسیلگ ءَ وتی گشتانک ءِ تہ ءَ گوشت کہ پاکستان راجدپتر ءِ مستریں ڈیموگرافک نقطہ ءِ سر ءَ اوشتاتگ۔ آئی ءَ گوشت کہ ملک ءِ 60درسد آبادی 30سال ءَ چہ کم عمر اِنت، ھپت ضلع زھگ آنی تہ ءَ سٹنٹنگ ءِ شرح 50درسد ءَ چہ گیش اِنت۔ احسن اقبال ءَ گوشت کہ آبادی ءِ تہ ءَ بے کنٹرولیں گیشی پاکستان ءِ دراجیں مدت ءِ اقتصادی برجائی ءِ واستہ ھترہ اِنت۔ آئی ءَ گوشت کہ حکومت ءِ نیمگ ءَ چہ فریم ورک پلاننگ ءُ انسانی دیمروئی ءِ سرمایہ ءِ سر ءَ گوں مھکمیں رنگ ءَ کار کنگ بوھگ ءَ اِنت۔ وفاقی وزیر حزانگ محمد اورنگزیب ءَ گوشت کہ پاکستان ءِ دیم ءَ دو مزنیں چیلنج موسمی مٹ ءُ بدلی ءُ آبادی انت۔ آئی ءَ گوشت کہ موسمی اثر آنی سر ءَ ھم میاں اوستمانی دیوان آنی تہ ءَ گپ ءُ تران کنگ لوٹ ایت پرچا کہ موسمی بحران ءَ چہ معیشت ءَ را براہ راست متاثر کنگ بیت۔ وزیر ءِ ھزانگ ءَ گوشت کہ مھکمیں پالیشی ءُ ایشی ءِ سر ءَ عمل کنگ جیڈھ آنی گیواری ءِ یکیں گیواری انت۔ برطانیہ ءِ ہائی کمشنر جینی میرٹ ءَ گوشت کہ پاکستان ءِ آبادی سالانہ 2.5درسد ءِ شرح ءَ گیش بوھگ ءَ اِنت، 2050ءَ تاں ملک ءَ 68ملین روزگار پیداک کنگی اِنت، ءُ دو دہائی ءَ 150ہزار نوکیں اسکول آنی ضلورت بیت۔ آئی ءَ اے گپ ءِ سر ءَ زور پر دات کہ فریم ورک پلاننگ ، زالبول آنی جان سلامتی ءُ وشھالی ءِ پڑ آنی تہ ءَ بدلی آرگ المی اِنت ءُ ایشی ءِ واستہ ھمے رنگیں عزم ناگزیر اِنت۔