وفاقی وزیر داخلہ محسن نقوی ءَ پنجاب ءِ ٹرانسپورٹ ءُ ماس ٹرانزٹ ءِ وزیر بلال اکبر خان ءَ گوں گند ءُ نند

اسلام آباد۔1دسمبر  (اے پی پی): وفاقی تہی کارانی وزیر محسن نقوی ءَ گوں پنجاب ءِ ٹرانسپورٹ ءُ ماس ٹرانزٹ ءِ وزیر بلال اکبر خان ءَ گند ءُ نند کت ایشی ءِ ساھت ءَ ٹرانسپورٹ ءِ شوبگ ءِ گہتری ءُ راولپنڈی اسلام آباد میٹرو بس سروس ءِ کارکردگی ءَ را گہتر کنگ ءِ جیڈھ آنی سر ءَ سرجمی ءَ گپ ءُ تران کت۔ گند ءُ نند ءِ ساھت ءَ میٹروبس سروس ءَ را گیش فعال کنگ ءُ ایشی ءِ جتا جتائیں اسٹیشن آنی جاور ھال ءَ را گہتر کنگ ءِ واستہ بازیں سوج آنی سر ءَ ھیال ءُ لیکہ کنگ بوت، وھدیکہ سروس ءِ روٹ ءَ را گیش ءَ چہ گیش وسعت دیگ ءِ امکان آنی سر ءَ ھم ھیال ءُ لیکہ کنگ بوت۔ گند ءُ نند ءَ راولپنڈی اسلام آباد میٹرو بس سروس ءَ را گہتر کنگ ءِ واستہ یکجائی رابطہ میکانزم ءِ جوڑ کنگ ءِ ہم پیسلہ کنگ بوتگ۔ دانکہ دوئیں شہرانی مہلوک ءَ را شرتر ءُ باقاعدہ تر ءُ تاب ءِ آسراتی پجارینگ بہ بیت۔ اے موہ ءِ سر ءَ محسن نقوی ءَ گوشت کہ میٹرو بس سروس ءِ وسیلگ ءَ راولپنڈی ءُ اسلام آباد ءِ نیام ءَ روچے ھزاراں مسافر سفر کن اَنت ءُ حکومت ءِ اولی ترجی ایش اِنت کہ آھاں ایمن، آرام ءُ ارزانیں سفری آسراتی پجارینگ بہ بیت۔ وفاقی داخلہ ءِ وزیر ءَ الس ءِ آسراتی ءُ سموگ ءِ کمی ءِ واستہ الیکٹرک ٹرانسپورٹ ءِ ارزشت ءِ سر ءَ زور پر دیان ءَ گوشت کہ راجدپتر ءِ تہ ءَ اولی رند ءَ اسلام آباد ءِ شہری آنی واستہ الیکٹرک بس آنی بندات کنگ بوتگ ءُ ایشی ءِ دائرہ کار کم کم ءَ گیش بوھگ ءَ اِنت۔ بلال اکبر خان ءَ وفاقی وزیر داخلہ ءَ را پنجاب ءَ ٹرانسپورٹ ءِ شوبگ ءِ گہتری ءِ واستہ چست کتگیں گامگیج آنی بابت ءَ ھم سرپد کت۔