ترکی ءِ ڈل ءَ پٹرولیم ءِ وفاقی وزیر علی پرویز ملک ءَ گوں گند ءُ نند کتگ، توانائی، پٹرولیم ءُ معدنیات ءِ شوبگ ءَ گیش بوھوکیں کمک ءِ سر ءَ چار ءُ تپاسی

اسلام آباد۔1دسمبر  (اے پی پی): پٹرولیم ءِ وفاقی وزیر علی پرویز ملک ءَ گوشت کہ ترکی ءِ ڈل ءِ تر ءُ تاب ءَ چہ توان ءُ معدنیات ءِ شوبگ ءَ دو نیمگی کمک ءَ را نوکیں رھشونی دیگ ءَ ھاسیں کرد پیلو کنت۔ اے ھیالانی درشانی آئی ءَ دو شمبے ءِ روچ ءَ جمہوریہ ترکی ءِ سفیر عرفان نازیروغلو ءَ گوں گند ءُ نند ءِ ساھت ءَ کت انت۔ گند ءُ نند ءَ ترک توان ءُ قدرتی وسیلگ ءِ وزیر الپ ارسلان بیرکتر ءِ سروکی ءَ پاکستان ءَ ترکی ءِ مزن تک ءِ ڈل ءِ تیاری ءَ را گڈی رنگ دات۔ اے موہ ءِ سر ءَ سیکرٹری پٹرولیم مومن آغا ءُ ایم ڈی او جی ڈی سی ایل احمد حیاتلک ھم ساڑی ات۔ پٹرولیم ءِ وزیر علی پرویز ملک ءَ گوشت کہ ما ترکی ءِ وزیر ءُ آئی ءِ ٹیم ءَ را پاکستان ءَ وش آتک کنگ ءِ واھشت مند آں۔ گند ءُ نند ءَ پاکستان ءُ ترکی ءِ نیام ءَ توان، پٹرولیم ءُ معدنیات ءِ شوبگ ءَ گیش بوھوکیں کمک ءِ سر ءَ چار ءُ تپاسی کنگ بوت۔ اے گپ ءِ سر ءَ دل یکیمی ءِ درشان کنگ بوت کہ ترکی پٹرولیم ءَ پاکستان ءَ آف شور ءُ آن شور ریسرچ ءِ کار آنی تہ ءَ ھوار بوتگ، ایشی ءَ چہ دو نیمگی توان ءِ کمک ءِ تہ ءَ یک ھاسیں سنگ میل ءِ اِنت۔ ترکی ءِ سفیر ءَ گوشت کہ باندا آیوکیں ڈل ءِ تہ ءَ یک نامداریں ترکی ءِ کان کنی کمپنی ھم ھوار بیت، ایشی ءَ چہ پاکستان ءِ معدنی دیمروئی ءِ شوبگ ءَ ترکی ءِ سکیں دلگوشی ءِ درشان اِنت۔ وزیر علی پرویز ملک ءَ اے دیمروئی ءِ ساڑات ءُ گوشت کہ پاکستان ءِ مزنیں پٹ ءُ پولی کمپنی او جی ڈی سی ایل، پی پی ایل ءُ ماری انرجیز ءَ ترک پٹرولیم ءِ گوما دست ءُ دپ کتگ، ایشی ءَ چہ یکجائی منصوبگ آنی واستہ نوکیں موہ پچ بوھگ ءَ انت ءُ جھان ءِ تک ءَ کمک ءَ را مھکم کنگ ءَ انت۔ سفیر عرفان نظیروغلو ءَ پاکستان ءِ گوما شریکداری ءِ وتی عزم ءِ پدر کنگ ءَ گوشت کہ دوئیں براتیں ملک آنی نیام ءَ کمک ءِ واستہ بے کساس وشیں آسراتی است انت۔ ترک ڈل ءِ پاکستان ءِ تر ءُ تاب ءَ چہ دوئیں ملکانی سیادی گیش مھکم ءُ گہتر بنت ۔ دوئیں رہشوناں سوبمندیں تر ءُ تاب ءَ را دل یکیمی کنگ ءُ یکوئی نیک راھی ءَ را یک جوانیں اقتصادی ءُ اسٹریٹجک شریکداری ءِ تہ ءَ بدل کنگ ءِ وتی عزم ءِ پدا زور دات۔