ڈی آئی خان ءَ ناشرکار آنی ھلاپ ءَ سوبمندیں آپریشن ءِ واستہ وفاقی وزیر ڈاکٹر طارق فضل چوہدری ءَ سیکورٹی فورسز ءَ را توسیپ ءُ ستا

اسلام آباد۔1دسمبر  (اے پی پی): پارلیمانی کارانی وفاقی وزیر ڈاکٹر طارق فضل چوہدری ءَ ڈیرہ اسماعیل خان ءَ ناشرکارانی ھلاپ ءَ سوبمندیں آپریشن ءِ پد ءَ سیکورٹی فورسز ءَ را توسیپ ءُ ستا گپت۔ دوشمبے ءِ روچ ءَ سوشل نیٹ ورک ویب سائٹ ایکس ءِ سر ءَ وتی بیان ءِ تہ ءَ آئی ءَ گوشت کہ ڈی آئی خان ءَ پاکستانی سیکورٹی فورس آنی نیمگ ءَ سوبمندیں آپریشن ءِ ساھت ءَ 22 ناشرکار بیران بوتگ اَنت۔ راج دژمنیں عناصر ءِ ھلاپ ءَ اے مزنیں پیشرفت اے گپ ءِ ثبوت اِنت کہ پاکستان ءِ سرڈگار ءِ سر ءَ ناشرکاری ءِ گنجائش نیست۔ آئی ءَ گوشت کہ مئے ھما سپاھیگ آناں سلام اِنت کہ آ وطن ءِ رکھینگ ءِ واستہ شپ ءُ روچ وتی جان ءَ را ریس ءَ ندر کن اَنت۔ آئی ءَ گوشت کہ انشاءاللہ پاکستان امن، برجائی ءُ دیمروئی ءِ سفر ءَ دیم ءَ روان کنت۔