پاکستان ءُ مصر ءِ نیام ءَ تجارتی ءُ اقتصادی سیادی ءَ را دیمروئی دیگ ءِ واستہ نوکیں پاکستان ءُ مصر بزنس کونسل جوڑ کنگ بیت، اسحاق ڈار ءَ مصر ءِ درئی کارانی وزیر ءِ گوما یکجائی پریس کانفرنس

اسلام آباد۔30نومبر  (اے پی پی): نائب مزن وزیر ءُ دری کارانی وزیر سینیٹر محمد اسحاق ڈار ءَ گوشت کہ پاکستان ءُ مصر ءِ نیام ءَ تجارتی ءُ اقتصادی سیادی آناں دیمروئی دیگ ءِ واستہ نوکیں پاکستان ءُ مصر بزنس کونسل جوڑ کنگ بیت تانکہ دو نیمگی کمک ادارگی جوڑ کنگ بہ بیت ءُ وت مہ وتی مفاد آنی سر ءَ بنیات ءِ سر ءَ تجارتی کار ءُ کاروباری سیادی آناں مھکم کنگ بہ بیت۔ مصر ءِ درئی کارانی وزیر ڈاکٹر بدر احمد محمد عبدالعتی ءِ گوما یکجائی پریس کانفرنس ءَ گوں گشتانک دیان ءَ آئی ءَ گوشت کہ پاکستان ءُ مصر بزنس فورم ءِ ھم جوڑ کنگ بیت، ایشی ءِ سروکی ءَ دوئیں درئی کارانی وزیر ھوار بنت۔ ایشی ءِ اولی دیوان 2026ءِ دومی سہ ماہی ءَ قاہرہ ءَ برجم دارگ بیت تانکہ تجارتی، سرمایہ کاری ءُ اقتصادی کمک ءَ را گیش دیمروئی دیگ بہ بیت۔ آئی ءَ گوشت کہ دوئیں ملک آنی نامداریں کاروباری ادارگ اے فورم آنی تہ ءَ بھر زوری کن اَنت۔ نائب مزن وزیر/درئی کارانی وزیر ءِ رد ءَ دوئیں ملک آنی نیمگ ءَ بی ٹو بی ءِ تک ءَ سرگرمی آناں دیمروئی دیگ ءِ پیسلہ کتگ تانکہ دوئیں ملک آنی نیام ءَ نزیک ءَ 300ملین ڈالر ءِ انوگیں بیپار وتی دو نیمگی سیادی آنی تہ ءَ گہتری ءِ رد ءَ نہ اِنت۔ اسحاق ڈار ءَ گوشت کہ پاکستان ءِ نیمگ ءَ جتا جتائیں شوبگ آنی نمائندگی کنوکیں 250بزنس ادارگ آنی لسٹ جوڑ کنگ بیت، ایشی ءَ را فیڈریشن آف پاکستان چیمبرز آف کامرس اینڈ انڈسٹری ءُ ھمگرنچیں چیمبر آنی گوما شور ءُ سلاھ ءَ شفافیں عمل ءِ وسیلگ ءَ گچین کنگ بیت۔ اے کاروباری ادارگ آناں دو نیمگی تجارت ءُ سرمایہ کاری ءِ تہ ءَ گیشی ءِ واستہ آسراتی پجاری کنگ بیت ءُ رند ءَ آ مصر ءَ وائٹ لسٹ ءَ ھوار کنگ بنت۔ آئی ءَ گیش گوشت کہ کاروباری براتی ءِ واستہ ویزا ءِ آسراتی ھم گہتر کنگ بنت، وھدیکہ شش ماہ ءَ پد دگہ 250 ادارگ اے لسٹ ءَ ھوار کنگ بنت، کلیں کساس 500 ءَ سر بیت۔مصر ءِ درئی کارانی وزیر ءَ ھم وتی نیمگ ءَ ھمے رنگیں لسٹ تیار کنگ ءِ سر ءَ تپاک کتگ۔ اسحاق ڈار ءَ گوشت کہ سال 2010 ءَ چہ پاکستان ءُ مصر ءِ نیام ءَ یکجائی وزارتی دیوان نہ بوتگ، پمیشکا اے گپ ءِ سر ءَ تپاک کنگ بوتگ کہ آیوکیں سال ءِ اولی سہ ماہی ءَ دوئیں ملک آنی دری کارانی وزارت آنی مزنیں کارندہ آنی نیام ءَ سیاسی مشاورت دیوان کنگ بہ بیت۔ آئی ءَ مصر ءِ دری کارانی وزیر ءِ نیمگ ءَ پاکستانی نودربر آنی واستہ دینی وانگ ءُ زانگ ءِ واستہ اسکالرشپ دوگنا کنگ ءِ جار ءَ را ھم وش اتک کت۔ وتی بیان ءِ تہ ءَ مصر ءِ دری کارانی وزیر ءَ ناشرکاری اُرش آنی تہ ءَ گران بھائیں جانی بیرانی ءِ سر ءَ پاکستانی حکومت ءُ الس ءِ گوما دلپدردی ءُ ھمدردی ءِ درشانی کت ءُ ناشرکاری ءِ ھلاسی ءِ واستہ پاکستان ءِ کوشست آناں سرجمیں رنگ ءَ کمک ءِ درشان کت۔ آئی ءَ گوشت کہ مصر ءُ پاکستان دود ءُ ربیدگ، مذھب ءُ دیریں دوستی ءِ مھکمیں سیادی ءَ گوں بندوک اَنت ءُ دوئیں ملک آنی دمگی ءُ جھان ءِ جیڈھ آنی سر ءَ یک وڑیں لیکہ آنی سر ءَ کار کن اَنت۔ آئی ءَ گوشت کہ دوئیں ملک آنی نیام ءَ بیپار، سرمایہ کاری ءُ کاروباری دیمروئی ءِ واستہ ٹھوس گامگیج آنی سر ءَ تپاک کنگ بوتگ ءُ پاکستانی کاروباری مردم آناں مصر ءَ سرمایہ کاری ءِ موہ آناں پٹ ءُ پول کنگ ءِ واستہ دعوت داتگ۔ مصر ءِ وزیر ءَ دوئیں ملک آنی نیام ءَ رابطہ آناں گیش کنگ ءِ ضلورت ءِ سر ءَ ھم زور پر دات۔