پاکستان ءَ را موسمیاتی ھترہ آنی چہ رکھینگ ءِ واستہ سائنسی منصوبگ بندی، ترندیں گامگیج ءُ یکجاھیں حکمت عملی المی اِنت، ڈاکٹر مصدق ملک

اسلام آباد ۔30نومبر  (اے پی پی):موسمی مٹ ءُ بدلی ءُ چاگردی رابطہ ءِ وفاقی وزیر ڈاکٹر مصدق ملک ءَ گوشت کہ پاکستان ءَ را موسمی ھتر آنی چہ رکھینگ ءِ واستہ سائنسی منصوبگ بندی، زوتیں گامگیج ءُ یکجاھیں حکمت عملی المی اِنت۔ موسمیاتی رجحانات ءِ بدل بوھگ کم آمدنی ءِ گل آنی واستہ مزنیں چیلنج جوڑ بوھگ ءَ انت، ایشی ءِ واستہ حکومت ہنگامی بنیاد ءَ جامع گامگیج زورگ ءَ انت۔ آئی ءَ آغا خان یونیورسٹی ءَ موسمیاتی لچک ءُ پائیدار جوڑ کتگیں چاگرد ءِ ھوالگ ءَ میاں اوستمانی کانفرنس ءَ گوں تران کنان ءَ کت۔ اے دیوان ءِ بندوبست انسٹی ٹیوٹ آف گلوبل ہیلتھ اینڈ ڈویلپمنٹ ءَ کتگ ات کہ ایشی ءِ تہا چاگردی کارندہ، پالیسی ساز، پٹ ءُ پولکار ءُ جتا جتائیں پڑانی نمائندگاں بہر زرتگ ات۔ شرکاء ءَ موسمیاتی بدلی ءِ گیش بوھوکیں خطرات، شہری ءُ میتگ ءِ بنیاتی ڈھانچہ ءِ سرا آئی ءِ اثرات ءُ کم وسیلہ ءِ آبادی ءِ رکھینگ ءِ ھاتر ءَ عملی سوج آنی سرا چار ءُ تپاسی کتگ۔ ڈاکٹر مصدق ملک ءَ وتی کلوہ ءِ گشتانک ءِ تہ ءَ گوشت کہ پاکستان ءِ حکومت موسمی بدلی ءِ انسانی، اقتصادی، ءُ چاگردی اثر آناں کم کنگ ءِ واستہ جوانیں گامگیج آنی سر ءَ کار کنگ ءَ اِنت۔ آئی ءَ گوشت کہ مزن وزیر ءِ ہدایت ءِ سر ءَ 300 روچ ءِ یک سرجمیں منصوبگ جوڑ کنگ بوتگ ایشی ءِ تہ ءَ مون سون 2026 ءِ واستہ پیسریگیں تیاری، ممکنہ تاوان آنی تہ ءَ مزنیں کساس ءَ کمی ءُ آماچیں دمگ آناں بحالی ءِ ھاترا دل یکیمی کنگ بوتگ۔ وفاقی وزیر ءِ رد ءَ آیوکیں 300 روچ آنی تہ ءَ موسمیاتی ھترہ آناں چہ آماچیں دمگ آنی تہ ءَ مھکمیں ڈرینیج سسٹم، سیلاپ ءِ بندوبست، نازرکیں بنیاتی ڈھانچگ ءِ گہتری، ءُ ترندیں رکھینگ ءِ گامگیج آنی سر ءَ ھاسیں دلگوشی دیگ بیت۔ آئی ءَ گوشت کہ اے بھر ءَ پد دومی بھر بندات بیت ایشی ءِ تہ ءَ دراجیں مدتی انکولی پالیشی جوڑ کنگ بنت ءُ استیں گامگیج آناں گیش وسعت دیگ بیت۔ آئی ءَ اے مرحلہ واریں منصوبہ ءَ را ”فکس، گرو، بلڈ“ ءِ یک ھاسیں لیکہ ءِ رنگ ءَ بیان کتگ۔ ڈاکٹر مصدق ملک ءَ گوشت کہ موسمیاتی تابکاری ھما وھد ءَ راستی جوڑ بوت کنت کہ صوبائی حکومت، وفاقی ادارگ، بنجاہی انتظامیہ ءُ کمیونٹی یکجاھی ءَ کار بہ کن اَنت۔ آئی ءَ گوشت کہ بنجاہی پیسلہ کنگ ءُ چاگرد ءِ ھوار بوھگ ءَ ابید پائیداریں بدلی ممکن نہ انت۔ پاکستان ءِ جھان ءِ موسمیاتی نزوری ءِ ھوالگ ءَ وفاقی وزیر ءَ گوشت کہ جھان ءِ کاربن ءِ کشگ ءِ تہ ءَ ملک ءِ بھر یکدرسد ءَ چہ کم اِنت بلے موسمی بدلی ءَ چہ گیش آماچیں ملک آنی تہ ءَ پاکستان ھوار اِنت۔ آئی ءَ گوشت کہ ایشی ءِ برخلاف ءَ کلیں جھان ءِ کشگ ءِ 70درسد ءَ چہ گیش ءِ ذمہ وار ایوک ءَ 10 ملک اَنت۔ آئی ءَ میاں اوستمانی براتی ءَ را منصفانہ گامگیج آنی وسیلگ ءَ وتی ذمہ واری ءَ را منگ ءِ لوٹ کتگ، دیمروئی کنوکیں ملک آناں کمک ءَ را گیش کنگ ءُ یکجائی کوشست آنی وسیلگ ءَ موسمی بحران ءِ ھلاپ ءَ جنگ ءِ لوٹ کتگ۔