سرمایہ کاری بورڈ ءِ وفاقی وزیر قیصر احمد شیخ ءَ سیلاپ ءِ آماچیں دمگ آنی تر ءُ تاب کتگ، بحالی ءِ کار آنی سر ءَ چار ءُ تپاسی

چنیوٹ۔ 30 نومبر (اے پی پی):سرمایہ کاری بورڈ ءِ وفاقی وزیر قیصر احمد شیخ ءَ چنیوٹ ءِ دوریں ءُ نوکیں سیلاپ ءِ آماچیں دمگ آنی تر ءُ تاب ءِ ساھت ءَ بحالی ءِ کار آنی سر ءَ چار ءُ تپاسی کت ءُ میڈیا ءَ گوں تران کنان ءَ گوشت کہ حکومت آماچیں مردم آنی بحالی ءِ واستہ شپ ءُ روچ کار کنگ ءَ اِنت۔ آئی ءَ گوشت کہ اے دمگ چنیوٹ شہر ءَ چہ 45منٹ ءِ کساس ءَ دوری ءَ انت ءُ ایشی ءَ را تحصیل ءِ سیمسر آنی تہ ءَ انوگیں وھد ءَ ھوار کنگ بوتگ پمیشکا ادا بنیاتی آسراتی آنی کمی انت۔ وفاقی وزیر ءَ گوشت کہ دوریں میتگ آنی تہ ءَ میڈیکل کیمپ جوڑ کنگ بوتگ اَنت کہ اودا مزنیں کساس ءَ مردم مفت علاج ءَ چہ سیت چست کنگ ءَ اَنت، البت ادا ہسپتال ءُ اسپیشلسٹ ڈاکٹر آنی کمی ءِ سبب ءَ مردم الاج ءِ واستہ دراجیں دور ءِ سفر کنگ ءَ اَنت۔ آئی ءَ گوشت کہ حکومت جان سلامتی ءُ وانگ ءُ زانگ ءِ شوبگ ءَ گہتر کنگ ءِ سر ءَ ھاسیں دلگوشی دیگ ءَ انت بلے آبادی ءِ تہ ءَ ترندی ءَ گوں گیشی ءِ سبب ءَ گیش ءَ چہ گیش آسراتی پجاری ناگزیر انت۔ آئی ءَ اے گپ ءِ سر ءَ زور پر دات کہ توان خریداری ءُ الس ءِ زندمان ءِ تک ءُ پھنات ءِ گہتر کنگ حکومت ءِ اولی ترجی اِنت۔ آئی ءَ گوشت کہ جان سلامتی ءُ وانگ ءُ زانگ صوبائی محکمہ آنی دائرہ کار ءِ چیر دستی ءَ انت، پمیشکا صوبائی حکومت آناں ھم گیش فعالیں کرد پیلو کنگی انت تانکہ بنیاتی آسراتی سرجمیں ملک ءَ الس ءَ سر بہ بنت۔ ضمنی گچین کاری ءَ گوں ھوالگ ءَ جست ءِ سر ءَ قیصر احمد شیخ ءَ گوشت کہ ن لیگ ءَ سرجمیں سیٹ آنی سر ءَ مزنیں سوبمندی یے رستگ ایش الس ءِ بھروسہ ءِ درشان اِنت۔ آئی ءَ گوشت کہ الس آنی بازیں لوٹ انگت ءَ پیلو کنگ لوٹ ایت ایشانی سر ءَ حکومت مسلسل کار کنگ ءَ انت۔ آئی ءَ گوشت کہ پاکستان ھما ملک آنی تہ ءَ ھوار اِنت کہ اودا زندمان ءِ کچ ءُ کساس کم اِنت، پمیشکا مارا یکجائی کوشست آنی وسیلگ ءَ معیشت ءَ را گہتر جوڑ کنگی اِنت۔ وفاقی وزیر ءَ گوشت کہ حکومت ءِ مول ءُ مراد استیں جی ڈی پی ءِ گیشی ءِ شرح ءَ را سئے ءُ نیم درسد ءَ چہ کم چہ کم شش درسد ءَ سر کنگ انت۔ آئی ءَ گوشت کہ "قرآن قرآن” پروگرام ءِ چیر دستی ءَ آیوکیں دہ سال آنی تہ ءَ ملکی معیشت ءَ را 400 ارب ڈالر ءَ چہ یک ہزار ارب ڈالر ءَ سر کنگ ءِ منصوبگ است انت۔ آئی ءَ سوج دات کہ درستیں سیاسی گل معیشت ءِ یکجائی منشور ءِ سر ءَ تپاک کنگ بہ بنت تانکہ سیاسی اختلافات ءَ چہ ابید ملک ءِ دیمروئی ءِ واستہ یکجائی کوشست کنگ بہ بیت۔ اقتصادی جاور ھالانی بابت ءَ گپ جنان ءَ آئی ءَ گوشت کہ سئے سال پیسر پاکستان ءَ را ڈیفالٹ ءِ ھترہ ءِ دیم ءَ ات، بلے آئی ایم ایف پروگرام ءَ ھوار بوھگ ءِ واستہ مزن وزیر شہباز شریف ءَ ذاتی کوشست کت نوں ملک ءِ معیشت گہتر بوھگ ءَ انت۔ آئی ءَ گوشت کہ پاکستان ءَ سرمایہ کاری ءِ بے کساس موہ است انت ءُ دگنیا ھاسیں رنگ ءَ پاکستان ءِ نادریں معدنیات آنی تہ ءَ سک باز دلگوشی دیگ ءَ انت کہ ایشی ءِ سر ءَ دگنیا ءِ تک ءَ سک باز لوٹ ءُ گزر انت۔ آئی ءَ گوشت کہ سرمایہ کاری ءِ تہ ءَ ھاسیں گیشی ءِ امیت اِنت، ایشی ءَ چہ ملک ءَ روزگار ءِ موہ پیداک بنت ءُ ویلیو ایڈڈ انڈسٹری ءَ را دیمروئی رسیت۔ بلے آئی ءَ اے گپ ھم من اِت کہ سرمایہ کاری ءِ متوقع آسر انگت ءَ سر نہ بوتگ اَنت بلے کوشست گیش کنگ بوھگ ءَ اِنت۔ آئی ءَ مخالفیں سیاسی گلاں ھم یک پیغامے دیم داتگ کہ راجی مفاد ءِ ھاترا ھرکس ءَ را یکجاہ کار کنگ لوٹ ایت دانکہ پاکستان دیمروئی ءِ راہ ءَ دارگ بہ بیت۔