صدر آصف علی زرداری ءَ راجی دفاع یونیورسٹی ءِ تر ءُ تاب کتگ، راجی سلامتی ءِ بیست ءُ ھپتمی ورکشاپ ءِ بھر زوروکاں گوں تران

اسلام آباد۔29نومبر  (اے پی پی):صدر ءِ مملکت آصف علی زرداری ءَ شمبے ءِ روچ ءَ راجی دفاعی یونیورسٹی اسلام آباد ءِ تر ءُ تاب کتگ ءُ راجی سلامتی ءِ بیست ءُ ھپتمی ورکشاپ ءِ بھر زوروکاں گوں تران کتگ۔ صدارت ءِ نیمگ ءَ جاڑی بوتگیں بیان ءِ رد ءَ ورکشاپ ءَ پارلیمنٹ ءِ باسک، سینئر سول ءُ ملٹری افسر، وانگ ءُ زانگ ءِ ادارگ ءُ سول سوسائٹی ءِ نمائندگ آناں یکجا کنگ ءِ موہ دات۔ صدر ءِ مملکت ءَ وتی گشتانک ءِ تہ ءَ بھر زوروک آناں ورکشاپ ءِ سوبمندیں سرجمی ءِ سر ءَ مبارک بات دات ءُ راجی سلامتی ءِ بابت ءَ سرپدی ءَ را گیش مھکم کنگ ءِ واستہ آوانی دلگوشی ءَ را ساڑات۔ آئی ءَ پاکستان ءِ ھما وھد ءِ سیکورٹی چیلنج آنی گیواری ءِ واستہ سرپدیں سروکی، راجی یکوئی ءُ یکجاھیں پالیسی سازی ءِ ارزشت ءِ سر ءَ زور پر دات۔ آئی ایس پی آر ءِ رد ءَ 27می راجی سلامتی ورکشاپ ءَ راجی سلامتی ءِ جامع ءِ چیر دستی ءَ راجی طاقت ءِ جتا جتائیں عناصر آنی نیام ءَ یکوئی ءِ بابت ءَ بھر زوروک آنی سرپدی ءَ را گیش کنگ ءِ سر ءَ دلگوشی دیگ بوتگ۔ نیشنل ڈیفنس یونیورسٹی ءِ راجی سلامتی ءِ ورکشاپ راجی تک ءِ گپ ءُ تران ءِ دیمروئی، ادارگی ظرفیت ءِ جوڑ کنگ ءُ راجی سلامتی ءِ ھاترا سرجمیں ملک ءِ رھبند ءِ دیمروئی ءِ ھاترا ملک ءِ کلیدی پلیٹ فارم آنی تہ ءَ یکے ۔ صدر ءَ گریجویشن ءِ شریکیں مردماں سرٹیفکیٹ ھم دات۔