بنجائی وزیر حوالکاری  عطاء اللہ تارڑ تون سری لنکا نانائب وزیر امور نوجوانان و گوازی سوگاتھ تھلاکر اتھنے نا اوڑدہی

اسلام آباد۔ 20 نومبر (اے پی پی) بنجائی وزیر حوالکاری و شینکاری عطاء اللہ تارڑ تون سری لنکانا نائب وزیر امور نوجوانان و گوازی سوگاتھ تھلاکراتھنے اوڑدہی کرے۔ داوخت آ سری لنکا نا ہائی کمشنر ریئر ایڈمرل فریڈ سینویراتھنے، ڈپٹی ہائی کمشنر کرسٹی روبن و منسٹر قونصلر (ڈیفنس) بریگیڈ یئر جی اے کے آرگنارتنے ہم اوڑتون اوار ئسر۔ اوڑدہی ٹی کرکٹ نا مون آ دننگ، گوازی تیٹی تین پہ تینی کمکاری و ہڑتوم آ کنڈآتا رابطہ غاتیا سرجمی اٹ گپ وتران مس۔ ہڑتوم آ ملک آتا کنڈآن گوازی تے السی کہول آ رابطہ غاتا مون آ دننگ نا گچین ذریعہ گوندسا دابشخ اٹی شریداری عمل ءِ پین ودفنگ آ امنا کننگا۔ بنجائی وزیر حوالکاری پارے کہ پاکستان و سری لنکا نا تعلقداری پت، شرف و اسیجائی قدر آ قائم ءُ، گوازی تا پڑ اٹی کمکاری نئے بیرہ ورناچین ءِ خڑک اتیک بلکن ہڑتوم آملک آتا الس نا نیام اٹ تعلقداری تے پین سوگو کیک۔ اوپارے کہ پاکستان ڈیہہ اٹی سپورٹس ڈپلومیسی ءِ مون آ دننگ کن سنجیدہ گام گیج کننگ ءِ۔ بنجائی وزیر حوالکاری گوازی تیٹی کمکاری نا مون آ دننگ آ سری لنکا نا حکومت و سرکڑدہ غاتا منت واری ءِ ہرفسا پارے کہ سری لنکن پارلیمنٹ نا بجٹ دیوان آن پد ہم سری لنکا نانائب وزیرنا دورہ پاکستان ہڑتوم آملک آتا متکن آ دوستانہ و باپت تعلقداری تا پیدوار درشانی ءِ، اومیت ءِ دا دورہ ہڑتوم آ کنڈآتا تعلقداری، خاص کر گوازی و ورناتا بشخ اٹی پوسکن ءُ کسر ملک۔ سری لنکا نا ڈل وزیرداخلہ محسن نقوی نا کنڈآن ٹرائی نیشن سیریز کن گچین بست وبند آتا ستاءِ کرے۔ یات سلے کہ وزیراعظم شہباز شریف تدوک آ دے ٹرائی نیشن ٹیم تا اعزاز اٹی تروک آ دے انا اِرغ اٹی سری لنکن کرکٹ ٹیم و سری لنکا نا حکومت نا منت واری ءِ ہرفے۔ سری لنکا نا ڈل پاکستان نا مہمانداری نا بڑزکو آب و سپورٹس ڈپلومیسی نا مون آ دننگ نا عزم انا ستاءِ کرے۔ سری لنکن ڈل پاکستان اٹی مروک آ ٹرائی نیشن سیریز نا میچ آتے ہم ہرک۔