پاکستان ءَ اپ اسکیلنگ گرین پاکستان پروگرام ءِ چیر دستی ءَ جنگل آنی برجائی، جنگل کاری ءِ دیمروئی ءُ ماحولیاتی نظام ءِ مھکم کنگ ءِ تہ ءَ مزنیں سوبمندی رستگ، ڈاکٹر مصدق ملک

اسلام آباد۔20نومبر  (اے پی پی): موسمی مٹ ءُ بدلی ءُ چاگردی ھمگرنچی ءِ وزیر ڈاکٹر مصدق ملک ءَ گوشت کہ اپ اسکیلنگ گرین پاکستان پروگرام ءِ چیر دستی ءَ جنگل آنی برجائی، جنگل کاری ءِ دیمروئی ءُ ماحولیاتی نظام ءِ مھکم کنگ ءِ پڑ ءَ پاکستان ءَ مزنیں سوبمندی رستگ۔ آئی ءَ پنچ شمبے ءِ روچ ءَ موسمیاتی بدلی ءِ وزارت ءِ نیمگ ءَ COP30 ءِ موہ ءَ برجم داشتگیں سائیڈ ایونٹ ”گرین پاکستان پروگرام (یو جی پی پی): یک سوبمندی ءِ کسہ)“ ءِ تہ ءَ ھاسیں ویڈیو کلوہ ءِ وسیلگ ءَ گشتانک دیگ ءَ ات۔ اے مراگش ءِ مول ءُ مراد ایش ات کہ جنگل ءِ رکھینگ، بنجریں زمین آنی برجائی ءُ جنگل کاری ءِ مزنیں منصوبگ آنی تہ ءَ پاکستان ءِ پیشرفت ءَ را میاں اوستمانی براتی ءَ را پدر کنگ بہ بیت۔ اے مراگش ءَ میاں اوستمانی چاگردی کارندہ، دیمروئی ادارگ آنی نمائندگ ءُ جھان ءِ چاگردی گل آنی باسک آنی بھر زوری بوتگ ءُ جنگل آنی برجائی ءُ موسمیاتی تابکاری ءِ سر ءَ ھاسیں پینل ءِ گپ ءُ تران ھم کنگ بوتگ۔ ڈاکٹر مصدق ملک ءَ وتی گشتانک ءِ تہ ءَ گوشت کہ جھان ءِ موسمیاتی گپ ءُ تران ءِ مول ءُ مراد گرین ہاؤس گیس آنی کمی اِنت کہ ایشی ءِ بُنکی رنگ ءَ کاربن ڈائی آکسائیڈ ءِ کشگ ءِ وسیلگ ءَ ماپ کنگ بیت۔ آئی ءَ گوشت کہ ”اصل لوٹ کاربن ڈائی آکسائیڈ ءِ درآمد ءَ را کم کنگ ءُ ھما قدرتی نظام آنی دیمروئی کنگ اِنت کہ آھانی تہ ءَ مزنیں کساسے ءَ کاربن ءِ جذب کنگ ءِ گنجائش ھست۔درچک اصل ءَ کارخانہ اَنت کہ آ چاگرد ءَ چہ کاربن ڈائی آکسائیڈ ءَ را جذب کن اَنت ءُ آکسیجن پیداک کن اَنت۔“ موسمیاتی بدلی ءِ وزیر ءَ گوشت کہ درچک نہ ایوک ءَ ھلاسی ءِ واستہ ناگزیر اَنت بلکیں موسمیاتی ردوم ءِ تہ ءَ ھم سک باز المی کرد پیلو کن اَنت۔ آئی ءَ گوشت کہ گرین پاکستان پروگرام ءِ چیر دستی ءَ سرجمیں ملک ءَ ارباں درچک گیری ءَ چہ بے آباد ءُ بنسریں زمین آناں برجائی کنگ بوتگ۔ اے گامگیج ءَ چہ دمگی چاگرد آنی تہ ءَ ماحول دوستی ءِ رجحان ءَ را دیم ءَ برتگ ءُ مردماں جنگل ءِ رکھینگ ءِ تہ ءَ فعالیں کرد پیلو کنگ ءِ اہل کتگ۔ ڈاکٹر مصدق ملک ءَ وتی جزم ءِ درشان کنان ءَ گوشت کہ ما وتی جنگل آنی کش ءَ اوشتاتگیں ءُ سرجمیں دگنیا ءَ جنگل آنی رکھینگ ءِ واستہ جزم ایں، پرچا کہ اے مئے موسمی آیوکیں وھد ءُ بقا ءِ ضمانت اِنت۔ اے مراگش ءِ ساھت ءَ وزارت ءِ نیمگ ءَ جوڑ کتگیں یک کسانیں دستاویزی فلمے ھم پیش دارگ بوتگ کہ ایشی ءِ تہ ءَ پروگرام ءِ چیر دستی ءَ درچک ءِ کشت ءُ کشاری، چاگرد ءِ ھوار بوھگ ءُ ماحول دوستیں گامگیج آنی سر ءَ چمشانک دیگ بوتگ۔