نائب مزن وزیر اسحاق ڈار ءَ درئی کارانی وزیرانی دیوان ءِ ساھت ءَ ایران ءِ دری کارانی وزیر ءَ گوں گند ءُ نند کتگ ءُ اسرائیل ءِ گتر  ءُ دگہ مسلمانیں ملکانی سر ءَ بے سوبیں اُرشانی مذمت

دوحہ ۔14ستمبر  (اے پی پی):   عرب اسلامی سروک دیوان ءِ تیاری ءِ رد ءَ نائب مزن وزیر ءُ درئی کارانی وزیر سینیٹر محمد اسحاق ڈار ءَ ایران ءِ دری کارانی وزیر عباس عرقچی ءَ گوں گند ءُ نند کت۔ یک شمبے ءِ روچ ءَ دری کارانی کارگس ءِ نیمگ ءَ چہ جاڑی بوتگیں بیان ءِ رد ءَ دوئیں دری کارانی وزیراں اسرائیل ءِ گتر ءُ ایندگر مسلمانیں ملک آنی سر ءَ بے سوبیں اُرش آنی سک باز مذمت کتگ ءُ گوشتگ کہ اے کارروائی حاکمیت، میاں اوستمانی کانود ءُ اقوام متحدہ ءِ منشور ءِ مزنیں ھلاپ ورزی اِنت۔ دوئیں نیمگ ءَ مسلمان امت ءِ یکجا کنگ ءِ تہ ءَ عرب لیگ ءُ اسلامی کمک ءِ گل ءِ کلیدی کرد ءِ سر ءَ زور پر دات۔ دوئیں رہشوناں فلسطینی راج ءِ آجوئی ءُ وت واجہی ءِ حق ءِ ھاتر ءَ جائزیں جہد ءِ ھاتر ءَ وتی بے مٹیں حمایت ءِ پدرائی کت۔