وزیر خزانہ محمد اورنگزیب ءَ  گوشتگ  کہ سیلاب ءِ آماچیں مردمانی بحالی حکومت ءِ اولی ترجی انت، دستیابیں وسیلگاں چہ ترندیں کمک ءِ ھاتر ءَ کارمرز کنگ بوھگ ءَ انت

فیصل آباد ۔ 14 ستمبر (اے پی پی): وفاقی وزیر خزانہ سینیٹر محمد اورنگزیب ءَ گوشت کہ سیلاب ءَ چہ آماچیں مردمانی بحالی پاکستان ءِ حکومت ءِ اولی ترجی اِنت ءُ ایشی ءِ واستہ اولی رند ءَ دستیابیں ملکی وسیلگ آناں کارمرد کنگ بوھگ ءَ اِنت تانکہ آماچیں مردم آناں زوتیں رنگ ءَ کمک پجارینگ بہ بیت۔ کمالیا ضلع ٹوبا ٹیک سنگھ ءِ سیلاب ءَ چہ آماچیں دمگ آنی تر ءُ تاب ءُ مالفاتیانا پل ءَ میڈیا ءَ گوں گپ ءُ تران کنان ءَ وزیر ءِ ھزانگ ءَ گوشت کہ بحالی ءِ مول ءُ مراد ایوک ءَ بنیاتی ڈھانچہ ءِ پدا جوڑ کنگ نہ اِنت بلکیں آماچیں ھاندان آناں وتی پیسریگیں زند ءَ را پدا واتر کنگ اِنت۔ آئی ءَ اے گپ ءِ پدرائی کت کہ آماچیں کشت ءُ کشاری ءُ الس ءَ را ھرچ وڑیں آسراتی پجاری کنگ بیت تانکہ آھانی زندمان ءَ را زوتاں چہ زوت وتی جاہ ءَ آرگ بہ بیت۔ آئی ءَ گوشت کہ استیں جاور آنی تہ ءَ کشاردار آناں دیگ ءِ واستہ ھاسیں پیکج آنی سر ءَ چار ءُ بچار کنگ بوھگ ءَ انت تانکہ آ دیم ءِ فصل ءَ وھد ءِ سر ءَ بہ کش انت۔ آئی ءَ گوشت کہ حکومت ءَ موسمیاتی ایمرجنسی ءُ کشت ءُ کشاری ایمرجنسی ءِ جار جتگ، ایشی ءِ چیر دستی ءَ کشت ءُ کشاری پیداوار ءِ رکھینگ ءُ آماچیں مردم آناں بحالی ءِ واستہ عملی گامگیج کنگ بوھگ ءَ انت۔ وفاقی وزیر ءِ ھزانگ ءَ گوشت کہ وشیں ھال ایش انت کہ جھان ءِ تک ءَ تیل ءُ ایندگر سامان آنی بہا آنی تہ ءَ کمی بوھگ ءَ انت ایشی ءَ چہ پاکستان ءَ را براہ راست نپ رسیت ءُ حکومت ھمک پڑ ءَ مصنوعی مہنگائی ءِ گر ءُ دار ءِ واستہ گامگیج چست کنت۔ آئی ءَ گوشت کہ اگست ءِ بجلی ءِ بل سیلاب ءِ آماچیں مردم آناں دیم دیگ نہ بنت ءُ ھمایاں بل رستگ آں ایڈجسٹمنٹ کنگ بیت۔ آئی ءَ گوشت کہ کمالیہ ءِ اعداد و شمار ءِ رد ءَ 117ہزار زدگیں مردم آنی تہ ءَ 116ہزار آناں ریلیف کور دیگ بوتگ۔ آئی ءَ گوشت کہ آیوکیں پانزدہ روچ آنی تہ ءَ تاوان آنی اندازہ کنگ بندات بیت، سیلاب ءَ چہ آماچیں دمگ آنی تہ ءَ دان ءُ کود آنی پھجاری ءِ سروے کنگ بوھگ ءَ اِنت تانکہ کشت ءُ کشاری ءَ را وھد ءِ سر ءَ کمک پجاری کنگ بہ بیت۔ آئی ءَ گیش گوشت کہ مزن وزیر شہباز شریف ءَ سیلاب ءَ چہ آماچیں مردمانی بحالی ءِ واستہ 100 روچ ءِ ٹارگٹ ایر کتگ ءُ پنجاب ءِ سر وزیر مریم نواز ءَ ھوار پاکستانی فوج ءُ ضلعی انتظامیہ آماچیں مردمانی بحالی ءِ واستہ شپ ءُ روچ سرگرمیں رنگ ءَ کار کنگ ءَ انت۔ وزیر ءِ ھزانگ ءَ گوشت کہ راجدپتر ءَ اے وڑیں ریلیف آپریشن ءِ مثال نیست ءُ ھدا ءِ شکر اِنت کہ ٹوبا ٹیک سنگھ ءَ جانی تاوان سک کم بوتگ۔ دنیا گندگ ءَ اِنت کہ پاکستانی راج ھما گرانیں جاوراں چہ گوزگ ءَ اِنت، البت سرکار پہ زدگیں مردماں سیاست ءَ چہ بُرز کار کنگ ءَ اِنت۔ آئی ءَ اے گپ ءِ سر ءَ زور پر دات کہ گوستگیں سیلاب ءَ چہ سبق زورگ ءُ جوانیں منصوبگ بندی کنگ لوٹ ایت تانکہ آیوکیں وھد ءَ اے وڑیں نگیگیں جاور ھال ءِ دیمپانی مہ بیت۔ ھزانگ ءِ وزیر ءَ وتی تر ءُ تاب ءِ وھد ءَ سیلاب ءَ آماچیں ھاندان آناں راشن، زھگانی واستہ شیر، ٹولز ءُ پوشاک بھر ءُ بانگ کتگ۔ آئی ءَ ضلعی انتظامیہ ءُ ریسکیو ادارگ آنی کوشست آناں ھم ساڑات۔ ڈپٹی کمشنر ٹوبہ ٹیک سنگھ محمد نعیم سندھو، ڈسٹرکٹ پولیس آفیسر عبادت نثار  ءُ  اسسٹنٹ کمشنر اقراء ناصر  ءَ وفاقی وزیر خزانہ ءَ را ریلیف ءُ بحالی ءِ گامگیج آنی بابت ءَ سرپدی دات، وھدیکہ پیسریگیں ایڈووکیٹ جنرل مصطفیٰ رمدے ءُ اے ایس پی معز الرحمن ھم ھوار اتنت۔