ڈیجیٹل یوتھ ہب، کاروبار ءِ واستہ ورنا آناں 200ارب کلدار ءِ بغیر سود ءِ وام دیگ بوھگ ءَ انت، چیئرمین مزن وزیر ءِ ورنا پروگرام

لاہو ر ۔13ستمبر  (اے پی پی):چیئرمین مزن وزیر ءِ ورنا پروگرام رانا مشہود احمد خان ءَ گوشت کہ ’’ڈیجیٹل ورنا مرکز‘‘ ءِ پلیٹ فارم ورنا آناں بااختیار جوڑ کنگ ءِ نیمگ ءَ یک ھاسیں گامگیج اِنت۔ کاروبار ءِ واستہ ورنا آناں 200ارب کلدار ءِ بے سود ءِ وام دیگ بوھگ ءَ اِنت، ہائیر ایجوکیشن ءِ واھشت مندیں نودربر آناں اسکالرشپ دیگ بیت ءُ ورنا آناں اسٹارٹ اپس ءِ تہ ءَ سرپرستی ءُ سرمایہ کاری ءِ موہ دیگ بیت۔ اے ھیالانی درشانی آئی ءَ شمبے ءِ روچ ءَ چائلڈ ہسپتال لاہور ءَ ڈیجیٹل یوتھ ہب سیمینار ءَ گوں تران کنان ءَ کت۔ رانا مشہود احمد خان ءَ گوشت کہ مئے ورنا آنی تہ ءَ بے دروریں صلاحیت است انت، اگاں آھاں آسراتی ءُ رہشونی دیگ بہ بیت گڈا آھاں دگنیا ءِ سر ءَ فتح کنگ ءِ توان است انت، زالبولیں نودربر پورٹل ءِ سر ءَ رجسٹریشن بہ کن انت ءُ سرکاری آسراتی آنی تہ ءَ پائدگ چست بہ کن انت۔ ڈیجیٹل یوتھ ہب ءَ چہ نا ایوک ءَ انفرادی دیمروئی ءِ موہ رس ایت بلکینگ ءَ ملک ءِ معیشت ھم مھکم بیت ۔ رانا مشہود ءَ گوشت کہ اے گامگیج مزن وزیر محمد شہباز شریف ءِ وژن ءِ بھر انت ایشی ءِ مستریں مول ءُ مراد ورنا آناں راجی دیمروئی ءِ عمل ءَ سرگرمیں شریک جوڑ کنگ ءُ نوکیں ٹیکنالوجی ءَ گوں ھمگرنچ کنان ءَ جھان ءِ مارکیٹ ءَ آھاں مقابلہ لائک جوڑ کنگ انت۔ آئی ءَ گوشت کہ ڈیجیٹل یوتھ ہب ءِ سر ءَ سرجمیں ملک ءَ نودربر ءُ ورنا آناں داتگیں آسراتی آنی رد ءَ ہائیر ایجوکیشن ءِ واھشت مندیں نودربر آناں لوکل ءُ انٹرنیشنل اسکالرشپ دیگ بیت تانکہ ھچ ورنا وسیلگ ءِ کمی ءِ سبب ءَ وانگ ءُ زانگ ءَ چہ زبھر مہ بیت، ایشی ءَ ابید ورنا آناں پیشہ وارانہ رہشونی ءِ رسائی ءِ واستہ یک یکجاھیں نظام ءِ ھوار کنگ بیت۔ آئی ءَ گوشت کہ ورنا آناں جھان ءِ تک ءِ ھنر ءَ گوں لیس کنگ ءِ واستہ آن لائن کورسز ءُ سرٹیفیکیشن پروگرام ھم پجاری کنگ بنت تانکہ آ ڈیجیٹل معیشت ءِ فری لانسنگ ءُ ایندگر شوبگ آنی تہ ءَ وتی نشان ءَ جوڑ بہ کن اَنت۔ آئی ءَ گوشت کہ اسٹارٹ اپس ءَ ابید کاروباری ھیال ءِ واھندیں ورنا آنی واستہ مینٹر شپ، مالی کمک ءُ سرمایہ کاری ءِ موہ پجاری کنگ بنت تانکہ آ آزات اقتصادی یونٹ آنی رنگ ءَ سہرا بہ بنت ءُ روزگار ءِ موہ پیداک بہ بنت۔ آئی ءَ گوشت کہ مزن وزیر ءِ وژن ایش انت کہ پاکستان ءِ ورنا سرجمیں دگنیا ءَ وتی صلاحیت آنی درشان ءَ بہ کن انت، ایشی ءِ واستہ ڈیجیٹل یوتھ ہب اے واب ءِ پیلو کنگ ءِ نیمگ ءَ اولی گام انت۔ مراگش ءِ گڈ سر ءَ شرپ مندیں مہمان آناں شیلڈ ھم پیش کنگ بوت۔