حکومت سستیں انٹرنیٹ ءُ رکاوٹ آناں بے تاھیری ءَ را ھلاس کنگ ءِ واستہ سرگرمیں رنگ ءَ کار کنگ ءَ انت، سیلاب ءَ چہ آماچیں دمگ آنی تہ ءَ نیٹ کنکٹیویٹی ءَ را دل یکیمی کنگ بیت، وفاقی وزیر شازہ فاطمہ خواجہ

اسلام آباد۔13ستمبر  (اے پی پی):آئی ٹی ءِ وفاقی وزیر شازہ فاطمہ خواجہ ءَ دل یکیمی داتگ کہ حکومت پی ٹی سی ایل ءُ میاں اوستمانی شریک آنی گوما سستیں انٹرنیٹ سروس ءُ رکاوٹ آنی ھلاسی ءِ واستہ سرگرمیں رنگ ءَ کار کنگ ءَ انت، سیلاب ءَ چہ آماچیں دمگ آنی تہ ءَ انٹرنیٹ ءِ رابطہ ءَ را دل یکیمی کنگ بیت۔ شمبے ءِ روچ ءَ یک انٹرویو ءِ ساھت ءَ شازہ فاطمہ خواجہ ءَ راج ءَ را دل یکیمی دات کہ حکومت سرجمیں ملک ءَ کارمرز کنوک آنی آسراتی ءِ واستہ انٹرنیٹ ءِ جیڈھ آنی گیواری ءِ واستہ سرگرمیں رنگ ءَ کار کنگ ءَ اِنت۔ آئی ءَ اے گپ ءِ سر ءَ زور پر دات کہ حکومت پی ٹی سی ایل ءُ گلوبل ٹیکنالوجی پارٹنر آنی کمک ءَ سستیں انٹرنیٹ سروسز ءُ موبائل فون سروس ءِ تہ ءَ رکاوٹ آناں زوت ھلاس کنگ ءِ واستہ جزم اِنت۔ وفاقی وزیر ءَ گوشت کہ حکومت جاور ھال آنی سر ءَ نزیکی ءَ گوں چار ءُ بچار کنگ ءَ انت ءُ زوتاں چہ زوت سرجمی ءَ رابطہ بحال کنگ ءِ واستہ گامگیج بندات کنگ بوتگ۔ آئی ءَ درائینتگ کہ تکنیکی ٹیم 24 کلاک ءَ چہ رکاوٹ آنی سبب آناں پجارینگ ءُ راست کنگ ءِ واستہ کار کنگ ءَ اَنت، ایشی ءَ ابید حکومت آیوکیں وھد ءَ رکاوٹ آنی رکگ ءُ سروس ءَ را سرجمی ءَ گہتر کنگ ءِ واستہ متبادل گیواری ءُ بیک اپ سسٹم ءِ سر ءَ ھم کار کنگ ءَ اِنت۔ آئی ءَ شہری آنی دیم ءَ اتکگیں مشکل آناں من اِت ءُ دل یکیمی کت کہ ایشانی زوت بحالی ءِ واستہ کوشست کنگ بوھگ ءَ اِنت۔ وفاقی وزیر ءَ روچ مرزی کار، کار ءُ وانگ ءُ زانگ ءِ کمک ءِ واستہ یک مھکمیں کمیونیکیشن انفراسٹرکچر ءِ برجائی ءِ سر ءَ ھم زور پر دات۔ سیلاب ءَ چہ آماچیں دمگ آنی جیڈھ ءِ سر ءَ شازہ فاطمہ خواجہ ءَ ھاسیں رنگ ءَ اے گپ ءِ ذکر کت کہ حکومت ھما دمگ آنی تہ ءَ انٹرنیٹ ءِ رابطہ ءَ را اولیت دیگ ءَ اِنت کہ اودا گوستگیں قدرتی آفت آنی سبب ءَ رابطہ سک باز متاثر بوتگ۔ وفاقی وزیر ءَ گوشت کہ سیلاب ءَ چہ آماچیں دمگ آنی تہ ءَ انٹرنیٹ سروسز ءِ بحالی ءِ واستہ سرپدیں ٹیم کار کنگ ءَ اَنت ءُ اے گپ ءَ را دل یکیمی کنگ بوھگ ءَ اِنت کہ السی رابطہ ءُ ریکوری کار ءِ واستہ رابطہ ءِ المی وسیلگ دستیاب بہ بنت۔ آئی ءَ اے گپ ءِ ھم پدرائی کت کہ آماچیں دمگ آنی تہ ءَ بیک اپ انٹرنیٹ ءِ گنجائش چالو کنگ بوتگ تانکہ اے گرانیں وھد ءَ رکاوٹ کم چہ کم بہ بنت ءُ کمیونٹیز ءَ را یکجا بہ دار ایت۔ یک جست ءِ پسو ءَ وفاقی وزیر ءَ گوشت کہ حکومت ءِ اولی ترجی ھر شہری ءَ را 5 جی انٹرنیٹ ءِ رسائی ءِ پھجارینگ اِنت۔ آئی ءَ زور پر دات کہ گلوبل ڈیجیٹل ٹرانسفارمیشن ءِ برجائی ءِ واستہ تیز رفتار کنکٹیویٹی ءَ را دل یکیمی کنگ المی اِنت ءُ ایشی ءَ چہ اقتصادی دیمروئی ءُ جدت ءِ تہ ءَ کمک رسیت۔