درملکی سفارتکار ءُ درملکی مشنز آنی نمائندگ NDMA ءِ نیشنل ایمرجنسی آپریشن سینٹر ءِ تر ءُ تاب

اسلام آباد – 11ستمبر (اے پی پی): نیشنل ڈیزاسٹر مینجمنٹ اتھارٹی ءِ نیشنل ایمرجنسی آپریشن سینٹر ءِ تر ءُ تاب ءَ درملکی سفارتکار ءُ درملکی مشن آنی نمائندگ آں ملک ءَ گوستگیں سیلاب ءِ جاور ءُ برجاھیں کمکی کار آنی بابت ءَ سرجمیں بریفنگ دیگ بوت۔ اے مہمان آنی تہ ءَ ترکیہ، آسٹریلیا، روس، جرمنی، جاپان، کینیڈا، جنوبی افریقہ، پولینڈ ءُ آئرلینڈ ءَ ھوار 30 ءَ چہ گیش ملک آنی سفیر ھوار بوتگ اَنت۔ این ڈی ایم اے ءِ جارکش ءِ رد ءَ این ڈی ایم اے ءِ چیئرمین لیفٹیننٹ جنرل انعام حیدر ملک ءَ شریکیں مردم آناں آماچیں دمگ آنی تہ ءَ کمک ءُُ کمکی گامگیج آنی بابت ءَ سرپدی دات ءُ گوشت کہ این ڈی ایم اے یک ھمگرنچیں حکمت عملی ءُ صوبائی ءُ دمگی ادارگ آنی گوما یکجائی گامگیج آنی چیر دستی ءَ کمکی کار آناں برجاہ دارگ ءَ اِنت۔ بریفنگ ءِ تہ ءَ پیشگی تیاری، موسم ءِ تجزیہ ءُُ آفت آنی گوما گر ءُ چیل بوھگ ءِ واستہ نوکیں ٹیکنالوجی ءِ کارمردی ءِ سر ءَ ھم زور پر دیگ بوت۔ وزارت ءِ درئی کار ءِ نمائندگ آں ھم گند ءُُ نند ءَ بھر زرتگ، وھدیکہ جتا جتائیں ملک آنی تہ ءَ تعینات بوتگیں پاکستانی سفیر آناں ویڈیو لنک ءِ وسیلگ ءَ بھر زرتگ۔ درملکی سفارتکاراں این ڈی ایم اے ءِ وھد ءُ پاس ءِ سر ءَ کارآمدیں گامگیج آنی ستا کرتگ ءُ انسانی جان ءُ ملک ءِ معیشت ءِ رکھینگ ءِ واستہ سک باز المی لیک اتگ۔