میاں اوستمانی تک ءَ اسرائیل ءِ زوراکی ءَ را بند کنگ بہ بیت، مزن وزیر شہباز شریف ءَ گتری امیر ءَ گوں گند ءُ نند کتگ

دوحہ۔11ستمبر  (اے پی پی): مزن وزیر شہباز شریف ءَ گتری سروکی ءَ را اسرائیل ءِ بے جاہیں آشوب آنی ھلاپ ءَ پاکستان ءِ سرجمیں یکوئی ءُ کمک ءِ دل یکیمی داتگ ءُ گوشت کہ میاں اوستمانی تک ءَ اسرائیل ءِ بے دروریں زوراکی ءَ را بند کنگ لوٹ ایت۔ پنچ شمبے ءِ روچ ءَ مزن وزیر شہباز شریف ءَ دوحہ ءِ سر ءَ اسرائیل ءِ گوستگیں اُرش ءِ پد ءَ گتر ءِ سروکی ءُ الس ءِ گوما یکوئی ءِ درشان کنگ ءِ ھاترا گتر ءِ یک روچی سرکاری تر ءُ تاب کتگ۔ تر ءُ تاب ءِ وھد ءَ مزن وزیر شہباز شریف ءَ گتر ءِ امیر شیخ تمیم بن حمد الثانی ءَ گوں گند ءُ نند کت۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ 9ستمبر ءَ دوحہ ءِ سر ءَ اسرائیل ءِ اُرش ءِ سک باز مذمت کتگ ءُ اے اُرش ءَ را گتر ءِ وت واجہی ءُ علاقائی یکوئی ءِ بے دروریں ھلاپ ورزی لیک اتگ۔ آئی ءَ گوشت کہ براتیں ملک گتر ءِ سر ءَ اے اُرش ءِ سر ءَ پاکستان ءِ سروکی ءُ اُلس سک دلپدرد اَنت کہ میاں اوستمانی کانود ءِ ھلاپ اِنت۔ مزن وزیر ءَ پاکستان ءُ گتر ءِ نیام ءَ راجدپتری براتی سیادی آناں پدا زور پر دیان ءَ گوشت کہ دوئیں ملک یکے دومی ءِ گوما اوشتاتگ اَنت، ءُ اے براتی ءِ جذبہ ءَ پاکستان اے گرانیں وھد ءَ امیر گتر، شاہی ھاندان ءُ گتر ءِ براتیں الس ءِ گوما شانہ پہ شانہ اوشتاتگ۔ آئی ءَ گتری سروکی ءَ را اے بے جاہیں آشوب ءِ ھلاپ ءَ پاکستان ءِ سرجمیں یکوئی ءُ کمک ءِ دل یکیمی دات۔ آئی ءَ اے بربریت ءُ زھرناکیں اسرائیلی اُرش ءَ گران بھائیں جانی بیرانی ءِ سر ءَ دلپدردی درشان کتگ ءُ ٹپی آنی زوت جان سلامتی ءِ دعا کتگ۔ مزن وزیر ءَ اے گپ ءِ سر ءَ زور پر دات کہ میاں اوستمانی تک ءَ اسرائیل ءِ بے دروریں زوراکی ءَ را بند کنگ بہ بیت ءُ امت ءَ را اسرائیل ءِ آشوب آنی ھلاپ ءَ وتی صف آنی تہ ءَ یکجا بوھگ ءِ ضلورت اِنت۔ مزن وزیر ءَ غزہ ءَ امن ءِ کوشست آنی تہ ءَ گتر ءِ ذمہ وار ءُ تعمیری ثالثی ءِ کرد ءِ توسیپ کت ءُ اے گپ ءِ سر ءَ زور پر دات کہ اسرائیل ءِ زوراکی ءِ اے وڑیں کار آنی ھاسیں مول ءُ مراد دمگی استحکام ءَ را ھراب کنگ ءُ برجاھیں سفارتی ءُ انسانی کوشست آناں ھترہ ءِ تہ ءَ ھوار کنگ اِنت۔ مزن وزیر ءَ گوشت کہ گتر ءِ لوٹ ءِ پد ءَ پاکستان ءَ اقوام متحدہ ءِ سلامتی کونسل ءِ ایمرجنسی دیوان ءِ لوٹ کتگ ایشی ءِ تہ ءَ میاں اوستمانی تک ءَ نوکیں استاد آنی سر ءَ ھیال ریچی کنگ بہ بیت۔ آئی ءَ 15ستمبر ءَ عرب اسلامی غیر معمولی سروک دیوان ءِ میزبانی ءِ گتر ءِ پیسلہ ءِ ھم وش اتک کت ءُ گوشت کہ پاکستان ءَ او آئی سی ءَ سروک دیوان ءِ شریکیں اسپانسر ءُ شریکیں میزبانی ءِ واھشت ءِ درشان کتگ۔ مزن وزیر ءَ اے سال ءِ بندات ءَ پاکستان ءِ سر ءَ بھارت ءِ ناجائزیں زوراکی ءِ وھد ءَ گتر ءِ پاکستان ءِ مھکمیں کمک ءِ سر ءَ امیر گتر ءِ ھم منت گپت۔ امیر گتر ءَ یکجہتی ءِ درشان کنگ ءِ واستہ دوحہ ءِ تر ءُ تاب ءِ سر ءَ مزن وزیر شہباز شریف ءِ شگر ءُ منت گپت۔ دوئیں رہشوناں دمگی امن ءِ دیمروئی، میاں اوستمانی کانود ءِ برجائی ءُ فلسطینی اُلس ءِ جائزیں ھک آنی حمایت ءِ تہ ءَ نزیکیں ھمگرنچی ءِ برجائی ءِ سر ءَ تپاک کتگ۔ تر ءُ تاب ءِ ساھت ءَ دوئیں رہشون آں پاکستان ءُ گتر ءِ نیام ءَ گہتریں براتی سیادی ءُ خطہ ءَ امن ءُ ایمنی ءِ واستہ یکجائی جزم  ءِ ھم پدر کت۔