صدر آصف علی زرداری 12 ءَ بگر داں 21 ستمبر ءَ چین ءِ تر ءُ تاب ءَ کنت، درئی کارانی کارگس

اسلام آباد۔11ستمبر  (اے پی پی): چین ءِ حکومت ءِ دعوت ءِ رد ءَ صدر آصف علی زرداری 12 ءَ بگر داں 21 ستمبر 2025 ءَ چین ءِ تر ءُ تاب ءَ کنت۔ پنچ شمبے ءِ روچ ءَ درئی کارانی کارگس ءِ جارکش ءِ نیمگ ءَ جاڑی بوتگیں بیان ءِ رد ءَ صدر ءِ مملکت چین ءِ تر ءُ تاب ءِ وھد ءَ چینگڈو، شنگھائی، سینکیانگ ءُ اویغور ءَ ھوار جتا جتائیں دمگ آنی تر ءُ تاب ءَ کنت ءُ اودا چین ءِ صوبائی سروکی ءَ گوں گند ءُ نند کنت۔ اے گند ءُ نند آنی تہ ءَ پاکستان ءُ چین ءِ نیام ءَ دو نیمگی سیادی ، ھاسیں رنگ ءَ اقتصادی ءُ تجارتی کمک ، چین ءُ پاکستان اقتصادی راہداری (سی پیک) ءُ آیوکیں کنکٹیویٹی منصوبگ آنی سر ءَ گپ ءُ تران کنگ بیت۔ دوئیں ملک کثیر نیمگی فورم آنی تہ ءَ وت مہ وتی کمک ءِ ھوالگ ءَ ھم ھیال ریچی کن اَنت۔ صدر ءِ تر ءُ تاب دوئیں ملک آنی نیام ءَ مزن تک ءِ رابطہ آنی برجائی اِنت، ایشی ءَ چہ دوئیں نیمگ آنی واھشت ءُ جزم ءِ درشان اِنت کہ آ درستیں جاور آنی تہ ءَ اسٹریٹجک کمک ءِ بنیات ءَ شریکداری ءَ را مھکم کنگ بہ بنت۔ اے تر ءُ تاب ءَ سی پیک ءَ ھوار اقتصادی ءُ تجارتی کمک ءَ را دیم ءَ برگ ءِ واستہ یکوئی کمک ءِ دوبر پدر کنگ ءُ دمگی امن، دیمروئی ءُ استحکام ءِ واستہ یکجائی جزم  ءِ سر ءَ چمشانک دیگ بوتگ۔